Kufunjisha Mafunjisho a Baibolo Anunguluka
1. Ñanyi jishuko ne mwingilo uji na basapwishi?
1 Kafwako wakonsha kwingijila Lesa ne, poso ‘bamukoka’ kwi Yehoba. (Yoa. 6:44) Nangwa byonkabyo, basapwishi bafunjisha mafunjisho a Baibolo bafwainwa kwingila lubaji lwabo pa kukwasha bantu kufwenya kwipi kwi Shabo wa mwiulu. (Yako. 4:8) Kino kikebewa kwinengezha. Kutangatu jifuka jonse ne kwipuzha bwipuzho bwanembwa kechi kwakonsha kukwasha botufunjisha kumvwa byambo ne kununguluka ne.
2. Kufunjisha lufunjisho lwalumbuluka mwakonsha kufuma ka?
2 Pa kuba’mba basapwishi bekale na mafunjisho alumbuluka, bafwainwa kukwasha bantu bo bafunjisha (1) kumvwisha bifunjisha Baibolo, (2) kuswa bifunjisha Baibolo ne (3) kwingijisha bintu bifunjisha Baibolo. (Yoa. 3:16; 17:3; Yako. 2:26) Kyakonsha kusenda bañondo pa kuba’mba mutangijile muntu mu ino mbaji. Ino mbaji yonse yakonsha kukwasha kukomesha bulunda bwanji ne Yehoba kabiji ne kwipana kwi aye.
3. Mambo ka bafunjishi bayuka kufunjisha o bepwizha mepuzho alengela muntu kwamba biji ku muchima?
3 Ñanyi Bintu Bibena Kulanguluka Ufunda Baibolo?: Pa kuba’mba tuyuke ye tufunjisha Baibolo inge waumvwisha ne kuswa byo abena kufunda, chinuzhukainga kulolobwela ne kumutundaika kwambapo aye mwine. (Yako. 1:19) Nanchi waumvwisha byamba Baibolo pa mutwe ye mubena kwisambapo nyi? Nanchi wafwainwa kulondolola uno mutwe mu byambo byanji nyi? Ubena kumvwa byepi pa bintu byo afunda? Nanchi waitabila kuba’mba bifunjisha Baibolo bya kine nyi? (1 Tesa. 2:13) Abya wayuka kuba’mba byo abena kufunda byakonsha kupimpula bwikalo bwanji nyi? (Kolo. 3:10) Pa kuba’mba tutane mikumbu ku ano mepuzho, twafwainwa kushikisha bulongo mepuzho, apa bino twateleka.—Mat. 16:13-16.
4. Ñanyi kintu kyo twafwainwa kuba inge muntu ye tufunjisha Baibolo ubena kukankalwa kumvwisha nangwa kulondela byo babena kumufunjisha mu Baibolo?
4 Papita kimye pa kuba’mba muntu aleke byubilo ne milanguluko yatama. (2 Ko. 10:5) Kyakonsha kwikala byepi inge ye tufunjisha Baibolo wakana kuswa nangwa kulondela byo abena kufunda? Twafwainwa kutekanya ne kuleka papita kimye kyafwainwa kuba’mba Mambo a Lesa ne mupashi wazhila bingile mu muchima wa muntu ye tufunjisha. (1 Ko. 3:6, 7; Hebe. 4:12) Mu kifulo kya kumukanjikizha, kyawama kuya pa mutwe mukwabo inge ye tufunjisha ubena kukankalwa kumvwisha nangwa kulondela bifunjisha Baibolo. Inge twatwajijila kutekanya ne kumwesha butemwe pa kumufunjisha Baibolo, mukuya kwa kimye ukalenga lupimpu lubena kukebewa mu bwikalo bwanji.