Funjishai Bukine

Kutendeka mu September, mu Kabuku ka Kupwila kwa Bwikalo ne Mwingilo mukekalanga jishinda ja kwisambilamo jakatataka jikatelwanga’mba “Funjishai Bukine.” Kyo tukakebanga ke kwisamba na bantu bukine bwa mu Baibolo kwingijisha bwipuzho ne kinembelo.

Inge twamona kuba’mba muntu ubena kukeba kufunda, tukamushilanga buku uji yense nangwa kumumwesha vidyo wa pa jw.org pa kuba’mba tukabweleko jikwabo. Twafwainwa kubwelako bukiji pa kuba’mba tukatwajijile mwisambo. Mashinda a kwisambilamo ne majashi a baana ba sukulu akafumanga mu bishinka biji mu kitango kya buku wa Nanchi Baibolo Waamba’mba Ka? Mu kibaaba kya kuba’mba bishinka, mukekalanga mepuzho ne binembelo bya kwitukwasha kubwelako nangwa kufunjisha muntu kwingijishatu Baibolo.

Kujitu jishinda jimo jitwala ku bumi. (Mat 7:13, 14) Na mambo a kuba’mba twisamba na bantu ba mu bupopweshi ne nkomeno yapusana pusana, twafwainwa kwamba pa bukine bwa mu Baibolo bwakonsha kufika bantu pa muchima. (1Ti 2:4) Inge twayuka mitwe yavula ya mu Baibolo ne kuwamishako busendwe bwetu bwa ‘kufunjisha ne kulumbulula bulongo mambo a bukine,’ tukekala bingi na lusekelo kabiji tukafunjishanga bantu bulongo bukine.—2Ti 2:15.