Byambo Bikwabo bya mu Mutanchi wa Kupwila kwa Bwikalo ne Mwingilo
MARCH 5-11
BYA BUNEME BIJI MU MAMBO A LESA | MATEO 20–21
“Yense Ukeba Kwikala Mukulumpe Wenu, Wafwainwa Kwikala wa Mwingilo Wenu”
(Mateo 20:3) Kabiji byo ayile pa jiola ja busatu, wamwene bakwabo saka baimanatu pa kisankanyi kwa kubula mingilo;
nwtsty bipikichala
Pa Kisankanyi
Bisankanyi bimo nabiji byo bamwesha pano, bebishimikijile kunsa ya mukwakwa. Bapoteshi batanchikanga bintu byabo mu mukwakwa ne kulengela bantu kukankalwa kwa kupichila. Bantu bapotanga bintu bya mu mazubo, mapuki a buchimba, makapu a mutengo ne kajo kafumatu mu majimi. Na mambo a kuba bantu kechi bajinga na mafuliji ne, kyalengelanga bantu kuya ku kisankanyi pa juba pa juba na kupota bintu. Bapotanga bintu koko baumvwinanga byavula ku basulu nangwa benyi, banyike koko batemenwe kukayila kabiji bantu babujile mingilo koko baikalanga na kupembelela’mba bebatwezheko nkito. Yesu wabukile muntu wakolelwe pa kisankanyi kabiji Paulo naye wasapwijile pa kisankanyi. (By 17:17) Bino banembeshi ne Bafaliseo bakebanga bingi kwibatakaika ku bantu ne kwibemuna mu ano mapunzha mwakinsañananga bantu.
(Mateo 20:20, 21) Kepo muka Zebede aishile pamo na baana banji ba balume kwi Yesu ne kumulambila ne kumulombapo kintu kimo. 21 Wamushikishe’mba: “Ñanyi kintu kyo mubena kukeba?” Aye wamukumbwile’mba: “Ambilai bano baana bami ba balume babiji bakekale umo ku kilujo kyenu, mukwabo ku kipiko kyenu mu Bufumu bwenu.”
wtsty kulumbulula byambo biji pa Mat 20:20, 21
inabo baana ba kwa Zebede: Ko kuba’mba muka Zebede ye wasemene batumwa ba Yakoba ne Yoano. Kwesakana na byaamba jishimikila ja kwa Mako, Yakoba ne Yoano kimye kimo bayile kwi Yesu. Kyamweka bo bakebelenga bifulo, pano bino baingijishe inabo Salome, wajinga inanji Yesu wa mwanyike kuya na kwibambilako.—Mat 27:55, 56; Mak 15:40, 41; Yoa 19:25.
umo ku kilujo kyenu, mukwabo ku kipiko kyenu: Ino ñambilo ibena kumwesha munema ne luusa, pano bino munema mukatampe uji ku kilujo.—Sl 110:1; By 7:55, 56; Lo 8:34.
(Mateo 20:25-28) Bino Yesu wibechile ne kwibambila’mba: “Mwayuka’mba bamfumu ba bisaka bya bantu bobila bunkambo bantu babo kabiji bebalama bibi ku babinemanga. 26 Anweba kange mwikale bino ne; bino yense ukeba kwikala mukulumpe wenu, wafwainwa kwikala wa mwingilo wenu, 27 ne yense ukeba kwikala mutanshi mwi anweba wafwainwa kwikala muzha wenu. 28 Byonkatu Mwana muntu byo aishile, kechi waishile’mba bamwingijile ne, poso amba ebengijile ne kupana bumi bwanji kwikala bukuzhi bwa kukuula bavula.”
nwtsty kulumbulula byambo biji pa Mat 20:26, 28
wa mwingilo: Nangwa’mba “kalume.” Baibolo waingijisha kyambo kya Kingiliki kya di·aʹko·nos kulumbulula muntu uji na muchima wa kwingijila bakwabo. Akino kyambo bekingijisha kulumbulula biji Kilishitu (Lo 15:8), ba mingilo nangwa bakalume ba kwa Kilishitu (1Ko 3:5-7; Kol 1:23) bankwasho mu kipwilo (Fp 1:1; 1Ti 3:8) kuvwangakotu ne ba mingilo ba mu nzubo (Yoa 2:5, 9) ne bakulumpe balama kyalo (Lo 13:4).
Kukeba Bishinka Bikwabo Byanema
(Mateo 21:9) Kabiji mabumba atangijileko kulutwe yanji ne boba bamulondejilenga mu nyuma babijikilenga’mba: “Twalomba’mba, mupulushai Mwana wa kwa Davida! Watokwa awa wiya mu jizhina ja Yehoba! Twalomba’mba, mupulushai, anweba muji mwiulu mwine!”
nwtsty kulumbulula byambo biji pa Mat 21:9
Twalomba’mba, mupulushai: Mu mulaka mutanshi ke “Hosana.” Kino kyambo kya Kingiliki kyafumine ku kyambo kya Kihebelu kilumbulula’mba “twalomba’mba, mupulushai” nangwa’mba “mwane mupulushai.” Akino kyambo bekingijishanga kusashijila Lesa kuba’mba ebapulushe nangwa kwibalwilako; kyakonsha ne kulumbulula’mba “mwane tupulushai.” Mu kuya kwa kimye, bantu batendekele kwikingijisha pa kulomba ne pa kwimba. Kyambo kya Kihebelu kitanwa pa Sl 118:25, bekingijishanga kimye kyonse mu nyimbo yo baimbanga pa Kijiilo kya Lupitailo. Abino byambo bebingijishanga javula pa juba ja Kijiilo kya Lupitailo. Lesa wakumbwile luno lulombelo lwa kuba’mba mupulushai Mwana wa kwa Davida kimye kyo asangwile Yesu. Pa Mat 21:42, Yesu waingijishe byambo biji pa Sl 118:22, 23 kuba’mba bibena kwamba pe Mesiasa.
Mwana wa kwa Davida: Ino ñambilo ibena kumwesha’mba bantu bayukile kisemi kya ku bufumu mwafumine Yesu ne mwingilo ye akengila byo aji Mesiasa.
(Mateo 21:18, 19) Lukelo byo abwelelenga mu muzhi, wafwile nzala.19 Wamwene kichi kya mukuyu kunsa ya jishinda ne kuya konka, bino kafwako byo ataaineko ne, wataainekotu mabuula onka, kabiji wikyambijile’mba: “Kechi ukapangapo bipangwa jibiji ne.” Ne uno mukuyu waumine ponkapotu.
Waingijishe Kichi kya Mukuyu pa Kufunjisha Buneme bwa Kwikala na Lwitabilo
Pano mambo ka Yesu o alengejile kino kichi kuma? Walumbulwile ene mambo byo aambile’mba: “Kine nemwambila namba, umvwe muji na lwitabilo ne kubula luzhinauko, kechi mukobatu byonka byo nauba na uno mukuyu ne, bino inge mwaambila ne uno mutumba amba, ‘Fuma papo uye mu kalunga ka mema,’ kikobiwa byonkabyo. Kabiji bintu byonse byo mukalombanga, umvwe mwaikala na lwitabilo, mukebitambula.” (Mateo 21:21, 22) Onkao mambo, wabwezhezhepo kwamba kishinka kyo aambilepo patanshi kuba’mba lwitabilo lwakonsha kuvilula mutumba.—Mateo 17:20.
Yesu byo alengejile kichi kuma, wafunjishenga buneme bwa kwitabila mwi Lesa. Waambile’mba: “Byonse byo mukalomba ne kukeba, mwikale na lwitabilo lwa kuba’mba mwibitambula kala, kabiji mukebitambula.” (Mako 11:24) Luno lwajinga lufunjisho lwanema bingi ku baana ba bwanga ba kwa Yesu bonse. Kabiji luno lufunjisho lwawamine bingi kikatakata ku batumwa mambo kulutwe bapichile mu meseko akatampe. Pano bino, paji lukwatankano lukwabo pa mambo a kichi kyaumine ne lwitabilo byo lwafwainwa kwikala.
Byonka byajinga kichi kya mukuyu, ne kisaka kya bena Isalela kibepekezhenga kuwama. Bantu ba mu kino kisaka balayañene ne Lesa kutwajijila kwikala na bulunda bwawama ne aye kabiji bamwekelenga nobe bakookela Mizhilo yanji. Pano bino, kino kisaka kechi kyajinga na lwitabilo ne, kabiji kechi kyapanganga bipangwa byawama ne. Kabiji bakaine ne Mwana Lesa. Onkao mambo, Yesu byo alengejile kichi kyabujile kupanga bipangwa kuma, wamwesheshe patoka bintu bikamwekela kino kisaka kyabujilenga kupanga bipangwa kabiji kyabujile lwitabilo.
Kutanga Baibolo: Mateo 20:1-19
MARCH 12-18
BYA BUNEME BIJI MU MAMBO A LESA | MATEO 22–23
“Kookelainga Mikambizho Ibiji Ikatampe”
(Mateo 22:36-38) “Mufunjishi, nanchi mukambizho mukatampe wa mu Mizhilo ye wepi?” 37 Aye wamukumbwile’mba: “‘Wafwainwa kutemwa Yehoba Lesa wobe na muchima wobe yense, ne na mweo wobe yense ne na maana obe onse.’ 38 Uno ye mukambizho mukatampe kabiji ye mutanshi.
nwtsty kulumbulula byambo biji pa Mat 22:37
muchima: Mu kifwanyikizho, kino kyambo kilumbulula muntu mwine wa mukachi. Inge bebingijisha byonse bibiji pamo “mweo” ne “maana,” bilumbulula bintu biji mu muchima wa muntu, byo akeba ne mo amwena bintu. Abino byambo bisatu byo baingijisha pano (muchima, mweo ne maana) bingijila pamo; bebingijisha mu mashinda apusana pusana pa kuba’mba batundaike bantu kutemwa bingi Lesa.
mweo: Nangwa’mba “muntu mwine.”
maana: Ke bilanguluka muntu. Muntu wafwainwa kwingijisha maana anji pa kuba’mba ayuke Lesa ne kumutemwa. (Yoa 17:3, tubyambo twa munshi; Lo 12:1) Byambo biji pa Mpi 6:5, mu mulaka mwine wa Kihebelu baingijisha byambo bisatu bya kuba’mba ‘muchima, mweo ne bulume.’ Pakuba mu buku wa Mateo baingijisha kyambo kya Kingiliki kya “maana” kechi kyambo kya kuba’mba “bulume” ne. Kuji byavula byalengela bino byambo kwibilumbulwila mu mashinda apusana pusana. Kitanshi, nangwa kya kuba mu Kihebelu kya kala kechi mwajinga kine kyambo kilumbulula amba “maana” ne, bino kyalumbululanga kyambo kya “muchima.” Inge twaingijisha kino kyambo mu kifwanyikizho kilumbulula bumuntu bwa mukachi, kuvwangakotu ne bilanguluka muntu, mumwena muntu bintu, byubilo byanji ne bimulengela kuba bintu. (Mpi 29:4; Sl 26:2; 64:6; monai mutanchi wa kulumbulula byambo biji pa muchima mu kino kyepelo.) Onkao mambo, mu Kihebelu po baingijisha kyambo kya “muchima,” mu Baibolo wa Kingiliki wa Septuagint javula baingijisha kyambo kya Kingiliki kipashako na kyambo kya “maana.” (Nt 8:21; 17:17; Maana 2:10; Is 14:13) Kishinka kikwabo kyalengejile Mateo kwingijisha kyambo kya Kingiliki kya “maana” ne kubula kwingijisha kyambo kya “bulume” kiji mu Mpi 6:5, ke na mambo a kuba’mba kyambo kya Kihebelu kya “bulume [nangwa’mba “ngovu,” tubyambo twa munshi]” kyakonsha kulumbulula ngovu ya muntu nangwa byo alanguluka. Onkao mambo, kupimpula pimpula kwa bino byambo mu Kihebelu ne Kingiliki kwamwesha ene mambo banembele Mambo Awama o babujile kunembatu suka byonka byo banemba byambo biji mu Mpitulukilo ya mu Mizhilo.
(Mateo 22:39) Wa bubiji wapasha uno, ke uno: ‘Wafwainwa kutemwa mukwenu byonka byo witemwa obe mwine.’
nwtsty kulumbulula byambo biji pa Mateo 22:39
Wa bubiji: Bino ke byambo Yesu byo akumbwile bwipuzho bwa mwipwizhe Mufaliseo biji pa Mat 22:37. Pano bino, Yesu kechi wapelejiletu pa kukumbula bwipuzho ne, aye wanungilepo ne byambo bikwabo biji mu mukambizho wa bubiji (Le 19:18), walumbulwilenga’mba ino mikambizho yonse ibiji yanema bingi kabiji po paimena Mizhilo yonse ne byambo byaawile Bangauzhi.—Mat 22:40.
mukwenu: Kyambo kya Kingiliki kya “mukwenu” [mu mulaka mwine, kilumbulula “uji pepi ne obewa”] kabiji kechi kilumbululatu bantu bo twikala nabo kipikipi ne. Kyakonsha ne kulumbulula muntu yense ye mwisamba nanji.—Luk 10:29-37; Lo 13:8-10.
(Mateo 22:40) Pa ino mikambizho ibiji, po paimena Mizhilo yonse ne byambo byaawile Bangauzhi.”
nwtsty kulumbulula byambo biji pa Mat 22:40
Mizhilo . . . Bangauzhi: “Mizhilo” ilumbulula mabuku aji mu Baibolo kutatula na Ntendekelo kufika ku Mpitulukilo ya mu Mizhilo. “Bangauzhi” babena kwimenako mabuku a bungauzhi aji mu Binembelo bya Kihebelu. Inge bino byambo bebingijisha pa kimye kimo, byakonsha ne kulumbulula Binembelo byonse bya Kihebelu.—Mat 7:12; 22:40; Luk 16:16.
paimena: Kyambo kya Kingiliki kya “po paimena” bekingijisha mu kifwanyikizho kulumbulula’mba “kyo kishinka; mwapwila byonse.” Yesu kechi waambilengatu pa Mizhilo Jikumi ne, bino waambilenga’mba Binembelo byonse bya Kihebelu byaimena pa butemwe.—Lo 13:9.
Kukeba Bishinka Bikwabo Byanema
(Mateo 22:21) Abo bamukumbwile’mba: “Bya kwa Kesala.” Kepo ebambijile’mba: “Panai bintu bya kwa Kesala kwi Kesala, kabiji bintu bya kwa Lesa, kwi Lesa.”
nwtsty kulumbulula byambo biji pa Mat 22:21
Bintu bya kwa Kesala kwi Kesala: Yesu byo akumbwile ne biji mu Mak 12:17 ne Luk 20:25, mu ano mabuku mo monkatu mo aambile pa mfumu wa bena Loma. “Bintu bya kwa Kesala” byavwangamo kupana misonko ku kafulumende, kupa mushingi balama kyalo ne kwibakookela.—Lo 13:1-7.
bintu bya kwa Lesa, kwi Lesa: Bino byavwangamo kwingijila Lesa na muchima yense, kumutemwa na muchima yense ne kumukookela na muchima yense.—Mat 4:10; 22:37, 38; By 5:29; Lo 14:8.
(Mateo 23:24) Anweba bantangi bampofu, mwatemwa kususa tubyakolwa, pakuba ngamela mumumina!
nwtsty kulumbulula byambo biji pa Mat 23:24
mwatemwa kususa tubyakolwa, pakuba ngamela mumumina: Tubyakolwa ke tubilongolo tucheche bingi kabiji ngamela ke nyama mukatampe, abino byonse byajinga bya muzhilo ku bena Isalela. (Le 11:4, 21-24) Yesu waingijishe kishimpi kulumbulula’mba bantangi ba bupopweshi basusanga maalwa abo pa kuba’mba bafumyemo tubyakolwa twakonsha kwibalengela kulala muzhilo, pano bino saka balengulula byanema bya mu Mizhilo, o ene mambo o ebesakenye ku kumina ngamela.
Kutanga Baibolo: Mateo 22:1-22
MARCH 19-25
BYA BUNEME BIJI MU MAMBO A LESA | MATEO 24
“Twajijilai Kukosesha Bulunda Bwenu ne Lesa mu Ano Moba a Kupelako”
(Mateo 24:12) kabiji na mambo a kuvujilako kwa bubi, butemwe bwa bavula bukakepa.
it-2-E 279 jifu. 6
Butemwe
Butemwe bwa Muntu Bwakonsha Kupwa. Yesu Kilishitu byo abuujilenga baana banji ba bwanga pa bintu bikamweka kulutwe, wibalumbulwijile kuba’mba butemwe (a·gaʹpe) bwa bavula betongola’mba baitabila mwi Lesa bukakepa. (Mat 24:3, 12) Mutumwa Paulo waambile’mba mu moba a kupelako bantu ‘bakatemwa mali.’ (2Ti 3:1, 2) Onkao mambo, kyapeela bingi muntu kuleka kuta muchima ku bintu byanema, kabiji kino kyakonsha kulengela butemwe bo ajinga nabo patanshi kupwa. Akino kishinka kibena kumwesha’mba twafwainwa kutako bingi muchima ne kukosesha butemwe bwetu kupichila mu kulanguluka languluka pa Mambo a Lesa ne kwiengijishanga mu bwikalo bwetu monka mwayila mafunde a Lesa.—Ef 4:15, 22-24.
(Mateo 24:39) kabiji kechi bateleko muchima ne, kufikatu ne kimye Muyulo kyo aishile ne kwibalobeshatu bonse shata, bino byo byo kikekala ne pa kwikalapo kwa Mwana muntu.
w99-E 11/15 19 jifu. 5
Nanchi Mubena Kufikizha Bintu byo Mwalayile Lesa Nyi?
5 Yesu Kilishitu waambile pa ano moba a kupelako o tujimo amba: “Byonkatu byo kyajinga mu moba a kwa Nowa, byo byo kikekala ne pa kwikalapo kwa Mwana muntu. Mambo mu oa moba Muyulo saka akyangye kwiya, bantu bajiilenga ne kutoma, basongwelenga ne kusongolwa, kufikatu ne kimye Nowa kyo atwelele mu bwato, kabiji kechi bateleko muchima ne, kufikatu ne kimye Muyulo kyo aishile ne kwibalobeshatu bonse shata, bino byo byo kikekala ne pa kwikalapo kwa Mwana muntu.” (Mateo 24:37-39) Kechi kyatama inge muntu waja ne kutoma maalwa mu kwesakanya ne, kabiji Lesa ye wabikileko masongola. (Ntendekelo 2:20-24) Onkao mambo, inge twamona’mba twatesha bingi muchima ku bintu bya ku mubiji, kyawama bingi kulombapo kwi Lesa. Yehoba uketukwasha kutangizhako bintu bya Bufumu, kuba bintu byawama ne kufikizha bintu byo twamulayile.—Mateo 6:33; Loma 12:12; 2 Kolinda 13:7.
(Mateo 24:44) Byonkabyo, ne anweba inengezhezhai jimo, mambo Mwana muntu ukeya pa kimye kyo mwabula kuketekela.
Batumwa Bakebelenga Kuyuka Kiyukilo
Waambile’mba baana banji ba bwanga bafwainwa kwikala balaba kabiji benengezhezha jimo. Yesu watwajijile kwamba pa luno lujimuno kwingijisha kishimpi kikwabo amba: “Yukai kino amba: Umvwe mwina nzubo wayukile kilo kyaishijilepo ngivi, inge walabilenga ne kukenkenta kabiji inge kechi walekele ngivi watwela mu nzubo ne. Byonkabyo, ne anweba inengezhezhai jimo, mambo Mwana muntu ukeya pa kimye kyo mwabula kuketekela.”—Mateo 24:43, 44.
Kukeba Bishinka Bikwabo Byanema
(Mateo 24:8) Bino bintu byonse yo ntatwilo ya bisanso.
nwtsty kulumbulula byambo biji pa Mat 24:8
bisanso: Kyambo kya Kingiliki kilumbulula misongo ikala na inetu pa kupaapa. Nangwa kya kuba bekingijisha pano kwamba pa makatazho, misongo ne kumanama, kyakonsha kulumbulula’mba byonkatu biji bisanso, ne bya malwa ne makatazho o baambijile jimo akavujilako bingi ne kupitapo kimye kyabaya malwa akatampe o baambapo pa Mateo 24:21 saka akyangye kufika.
(Mateo 24:20) Lombainga kuba’mba kunyema kwenu kechi kukekale mu kimye kya mashika nangwa pa juba ja Sabado ne;
nwtsty kulumbulula byambo biji pa Mat 24:20
mu kimye kya mashika: Kimye kya mayoo kunoka mvula mukatampe, kwikala miyulo ne mashika. Onkao mambo, kikatazha bingi kwenda mu bano bañondo, kutaana kajo ne mwa kulaala.—Eze 10:9, 13.
pa juba ja Sabado: Mu mapunzha nabiji a mu Yudea, mizhilo ya Juba ja Sabado yakatazhanga bingi bantu kwenda miseke yalepa ne kusenda bintu; kabiji bibelo bya muzhi nabyo bebishinkanga pa juba ja Sabado.—Monai By 1:12 ne Bya Kulumbulula B12.
Kutanga Baibolo: Mateo 24:1-22
MARCH 26–APRIL 1
BYA BUNEME BIJI MU MAMBO A LESA | MATEO 25
“Labainga ne Kukenkenta”
(Mateo 25:1-6) Bufumu bwa mwiulu bakonsha kwibupashañanya ku bakamwale jikumi basendele malampi ne kuya na kutundaila musongoshi. 2 Batanu bajinga bakosama, pakuba bakwabo batanu bajinga na maana. 3 Aba bakosama basendele malampi abo, bino kechi basendelepo manyi akwabo ne, 4 pakuba aba ba maana basendelepo manyi akwabo mu tumilondo ne malampi abo. 5 Na mambo a kuba musongoshi wabanjile kwiya, bonse batatwile kukunuka ne kuponena mu tulo. 6 Pakachi ka bufuku, kwaishile mbila ya kuba’mba: ‘Musongoshi waiya! Yainga mumutundaile.’
(Mateo 25:7-10) Kepo bakamwale bonse baimene ne kunengezha malampi abo. 8 Aba babula maana baambijile aba ba maana amba, ‘Tupepoi manyi, mambo malampi etu katatakatu azhime.’ 9 Aba ba maana bakumbwile’mba: ‘Inge twimupe, kampe kechi tusakwikala na afikilamo a kwingijisha atweba ne anweba ne. Yainga ku bapotesha mukapote.’ 10 Byo bayilenga na kupota, musongoshi wafikile. Bakamwale benengezhezhe bayile nanji ku kijiilo kya masongola kabiji bashinkile ne kinzhilo.
(Mateo 25:11, 12) “Kepo bakamwale bakwabo baishile ne kwamba’mba, ‘Musongoshi, Musongoshi, tushinkwilaiko!’ 12 Aye wibakumbwile’mba, ‘Kine nemwambila namba, kechi nemuyuka ne.’
Kukeba Bishinka Bikwabo Byanema
(Mateo 25:31-33) Kimye Mwana muntu kyo akeya mu lukumo lwanji pamo na bamalaika bonse, ukekala pa jitanda ja lukumo lwanji. 32 Bisaka byonse bya bantu bikeya ko aji, ne aye ukebabanya muntu umo ku muntu mukwabo, byonkatu kafunga byo abanya mikooko ne bambuzhi. 33 Ukafungila mikooko ku kuboko kwanji kwa kilujo, pakuba bambuzhi ukebafungila ku kipiko kyanji.
Kwashainga Balongo ba kwa Kilishitu mu Bukishinka
7 Lelo jino, batokeshapo bingi bulongo pa kishimpi kya mikooko ne bambuzhi. Bajimo bayukanyikwa, Yesu ye “Mwana muntu,” aye Mfumu. Kabiji aba bo atelele’mba “balongo bami” ke balongo ne banyenga bashingwa na mupashi, bakalamanga pamo ne aye Kilishitu mwiulu. (Loma 8:16, 17) “Mikooko” ne “bambuzhi” ke bantu ba mu bisaka bya bantu. Abo kechi bashingwa na mupashi wazhila ne. Pano bunchibamambo bukekalako ñanyi kimye? Bukekalako ku mpelo ya malwa akatampe aji kulutwe. Pano ki ka kikebalengela bamo kwikala ku lubaji lwa mikooko, bakwabo kwikala ku lubaji lwa bambuzhi? Bakebachibila mambo kwesakana na byo baubanga na balongo ba kwa Kilishitu. Mpelo ya buno bwikalo byo yafwenya kala pepi, tumusanchila bingi Yehoba pa kutokeshapo bulongo pa kino kishimpi ne pa bishimpi bikwabo biji mu Mateo kitango 24 ne 25.
(Mateo 25:40) Aye Mfumu ukebakumbula’mba, ‘Kine nemwambila namba, byonkatu byo mwaubijile umo wa mu bano balongo bami bacheche, byo byo mwangubijile ne amiwa.’
“Anweba mwi Balunda Nami”
16 Umvwe muji na luketekelo lwa kwikala pano pa ntanda mu Bufumu bwa Lesa, mwakonsha kumwesha byepi bulunda bwenu ku balongo ba kwa Kilishitu? Twayai twisambe pa mashinda asatu. Jitanshi, ke kupichila mu kwingilako mwingilo wa kusapwila na muchima yense. Kilishitu wakambizhe balongo banji kusapwila mambo awama mwaya ntanda. (Mat. 24:14) Nangwa byonkabyo, balongo ba kwa Kilishitu bashalapo pano pa ntanda lelo jino kyakonsha kwibakatazha kufikizha uno mutembo kwa kubula bukwasho bwa balunda nabo ba mikooko ikwabo. Kya kine, kimye kyonse jibumba ja mikooko ikwabo kyo jingilako mwingilo wa kusapwila, jikwasha balongo ba kwa Kilishitu kufikizha mwingilo wabo wazhila. Kilishitu ne jibumba ja kalume wakishinka kabiji wa maana banemeka bingi buno bulunda.
17 Jishinda ja bubiji jibumba ja mikooko ikwabo mo jakonsha kukwashishamo balongo ba kwa Kilishitu ke kupichila mu kupanako bupe bwa kukwasha mwingilo wa kusapwila. Yesu watundaikile baana banji ba bwanga kwikala balunda na “nsabo yabula koloka.” (Luka 16:9) Kino kechi kilumbulula’mba twakonsha kupota bulunda na Yesu nangwa Yehoba ne. Pakuba ke kupichila mu kwingijisha nsabo yetu kutundaika Bufumu bwa kwa Yehoba, kuba bino kwitulengela kumwesha bulunda ne butemwe bwetu kechi mu byambotu ne, bino ne mu “byubilo ne bukine.” (1 Yoa. 3:16-18) Tupana buno bukwasho kimye kyo twingilako mwingilo wa busapwishi, kubingula mali a buntungi ne kuwamisha mapunzha etu po tupwila ne kubingula mibingu ya mwingilo wa kusapwila mwaya ntanda. Yehoba ne Yesu batemwa bingi bupe bonse bo tupana na lusekelo,.—2 Ko. 9:7.
18 Jishinda ja busatu atweba bonse jo tumwesheshamo amba twi balunda ne Kilishitu ke kulondela lutangijilo lupana bakulumpe mu kipwilo. Mupashi wazhila ye utongola bano banabalume kupichila mwi Kilishitu. (Efi. 5:23) Mutumwa Paulo wanembele’mba: “Kokelai bemutangijila ne kwibanekenena.” (Hebe. 13:17) Kimo kimye, kyakonsha kwitukatazha kulondela lutangijilo lwa mu Baibolo lwitupa bakulumpe mu kipwilo kyetu. Twayuka bulongo bumbulwa kulumbuluka bwabo, kabiji kino kyakonsha kwitulengela kulengulula lujimuno lwabo. Nangwa byonkabyo, Kilishitu, Mutwe wa kipwilo, usekela mu kwingijisha bano banabalume bambulwa kulumbuluka. Onkao mambo, jishinda jo tumwenamo buntangi bwabo jalamata bingi bulunda bwetu ne Kilishitu. Umvwe ketulubeko ku bilubo bya bakulumpe mu kipwilo kabiji ne kulondela lutangijilo lwabo na lusekelo, tukamwesha byo twatemwa Kilishitu.
Kutanga Baibolo: Mateo 25:1-23