Ingijishainga Bulongo Mashinda a Kwisambilamo a pa Intaneti

ENE MAMBO O KWANEMENA: Byonkatu biji bingijisho byavula, byakonsha kwitukozha inge twabula kwibingijisha bulongo. Bena Kilishitu bamo kechi bengijisha mashinda a kwisambilamo pa intaneti ne. Bino bamo bengijisha ano mashinda pa kuba’mba besambenga na balongo babo ne balunda. Nangwa byonkabyo, Diabola ukeba’mba tubulenga kwingijisha bulongo ano mashinda a kwisambilamo. Mambo wayuka’mba kuba bino kwakonsha konauna bulunda bwetu ne Yehoba. Byonkatu byaubile Yesu, ne atweba twafwainwa kwingijishanga mafunde a mu Baibolo pa kuba’mba tuyukenga bya kuchinuzhuka bizumba bijimo.—Luk 4:4, 8, 12.

BIZUMBA BIJIMO:

• Kukizhamo kwingijisha Intaneti. Kutaya kimye kyabaya pa intaneti nangwa na kwitumina byambo kwakonsha kwitupwishisha kimye kya kubilamo bintu bya Yehoba.

  Mafunde a mu Baibolo: Ef 5:15, 16; Fp 1:10

• Kutamba bintu byabula kufwainwa. Kutamba bipikichala byatama kwakonsha kulengela muntu kutendeka kutamba bya mulekese nangwa kuba bulalelale. Kutanga byambo bisampanya bansatuki pa intaneti kwakonsha konauna lwitabilo lwetu.

  Mafunde a mu Baibolo: Mat 5:28; Fp 4:8

• Kunemba byambo pa intaneti nangwa kubikapo bipikichala. Muchima wetu uji bingi na bujimbijimbi. Onkao mambo, wakonsha kulengela muntu kutendeka kunemba pa intaneti byambo byatama nangwa kubikapo bipikichala. Kuba bino kwakonsha kutamisha jizhina ja muntu nangwa konauna lwitabilo lwanji

  Mafunde a mu Baibolo: Lo 14:13; Ef 4:29

TAMBAI VIDYO WA KUBA’MBA JIMUKAI NA MASHINDA A KWISAMBILAMO A PA INTANETI, APA BINO MWISAMBE BYO MWAKONSHA KUCHINUZHUKA BINO BYALONDELAPO: