Muji na Balunda ba Mutundu ka pa Intaneti?

Mulunda nobe ke muntu wa kutemwa ne kukunemeka. Nabiji Yonafwanyi ne Davida baikele balunda Davida byo aipayile Goliata. (1Sa 18:1) Bonse babiji bajinga na byubilo byawama bibalengejile kwikala balunda. Onkao mambo, bulunda bwakosa bwimena pa kwiyuka bulongo. Papita kimye kyabaya bingi pa kuba’mba uyuke muntu bulongo. Kyapeela bingi kulenga balunda pa intaneti. Bantu batanwa pa intaneti bakonsha kusala byo bakeba kwamba ne kwifya byo baji ku bantu. Onkao mambo mwafwainwa kulangulukishapo bulongo pa bantu bo mwafwainwa kuswisha kwikala balunda nenu pa intaneti. Kange muchiinenga kukaana kuswisha bantu bemutumina pa intaneti kwikala balunda nenu, bo mwabula kuyuka bulongo na mambo a kuba’mba musakwibafichisha ku muchima ne. Na mambo a bino bizumba, bamo basalapo kubula kwingijisha mashinda aji onse a kwisambilamo pa intaneti. Inge mwasalapo mashinda amo a kwisambilamo pa intaneti, ñanyi bintu bimo byo mwafwainwa kuvulukanga?

TAMBAI VIDYO WA KUBA’MBA JIMUKAI NA MASHINDA A KWISAMBILAMO PA INTANETI, APA BINO MUKUMBULE ANO MEPUZHO:

• 

  Ñanyi bintu byo mwafwainwa kulangulukapo saka mukyangye kubika byambo nangwa bipikichala pa intaneti?

• 

  Mambo ka o mwafwainwa kujimukila pa kusala balunda nenu ba pa intaneti?

• 

  Mambo ka o mwafwainwa kubujila kwingijishanga kimye kyabaya inge mubena kwisamba pa intaneti?—Ef 5:15, 16