Mashinda Asatu mo Tumweshesha’mba Twaketekela mwi Yehoba

Davida washinjile Goliata mambo waketekejile mwi Yehoba. (1Sa 17:45) Yehoba wingijisha bulume bwanji kukwasha bantu banji. (2Mo 16:9) Twakonsha kumwesha byepi amba twaketekela mu bukwasho bwa Yehoba, kechi mu bintu byo twayuka nangwa mu bulume bwetu ne? Twakonsha kumwesha bino mu mashinda asatu alondelapo:

• Lombainga Kimye Kyonse. Lombainga kuba’mba Yehoba emulekelengako mambo inge mwalubankanya. Kabiji lombainga Yehoba kwimupa bulume bwa kuchinchika inge mubena kupita mu meseko. (Mat 6:12, 13) Kechi mwafwainwa kulombangatu kwi Yehoba kuba’mba apeshe bintu byo mwafuukwila jimo ne, bino mwafwainwa ne kulombanga kwi Yehoba kwimutangijila ne kwimupa maana saka mukyangye kufuukula bintu.—Ya 1:5

• Ikalai na mutanchi wa kutanga ne kufunda Baibolo. Tangainga Baibolo pa juba pa juba. (Sl 1:2) Langulukainga pa bintu byapichilemo bantu bo baambapo mu Baibolo ne kwingijisha byo mwafunjilako mu bwikalo bwenu. (Ya 1:23-25) Nengezhainga bulongo saka mukyangye kuya mu mwingilo. Kechi mwafwainwa kwiketekela na mambo a bintu byo mwayukila jimo ne. Nengezhezhainga jimo kupwila konse pa kuba’mba mumwenengamo.

• Kwatankanai na jibumba ja Yehoba. Endelainga pamo na jibumba ja Lesa ne kulondela byo bemubuula bukiji. (Ba 9:17) Kookelainga bakulumpe mu kipwilo inge bemujimunako nangwa bemubuula bya kuba.—Heb 13:17

TAMBAI VIDYO WA KUBA’MBA KUCHIINANGA KUMANYIKWA NE, APA BINO MUKUMBULE ANO MEPUZHO:

• Ñanyi bintu byachiinanga balongo ne banyenga?

• Ñanyi bintu bibakwashishe kuchinchika?