Ketekelai Kuba’mba Tukazhikijilwa Kimye Kikeya Mpelo ya Buno Bwikalo

Yehoba kechi ukatwajijila kutekenya ino ntanda ne. Bupopweshi bwa bubela bakebonauna. Bisaka bya bantu bikakwatankana kulukuka bantu ba Lesa. Kabiji Yehoba ukakambula bantu babi pa Amagedonyi. Atweba bena Kilishitu tutengela bingi kufika kwa bino bintu.

Nangwa byonkabyo, kechi twayuka byonse bikamweka mu kimye kya malwa akatampe ne. Kyakumwenako, kechi twayuka kimye kine kikatendeka malwa akatampe ne. Kechi twayuka bishinka bikalengela makafulumende a bumulwila ntanda kulukuka bupopweshi bwa bubela ne. Kechi twayuka kubaya kwa kimye bisaka bya bantu kyo bikalukuka bantu ba Lesa nangwa bintu bikwabo bikavwangwamo ne. Kabiji kechi twayuka jishinda jine Yehoba jo akengijisha konawinamo bantu babi pa Amagedonyi ne.

Pano bino Binembelo bitubuulapo bintu bimo bikamweka kulutwe bitulengela kutengela kwakubula moyo. Kyakumwenako, twayuka kuba’mba tubena kwikala ku mpelo ya “moba a kupelako.” (2Ti 3:1) Kabiji twayuka kuba’mba moba a kulukuka bupopweshi ‘bakeakepeshako’ pa kuba’mba bupopweshi bwa kine bakabule kwibonauna. (Mat 24:22) Kabiji twayuka’mba Yehoba ukapokolola bantu banji. (2Pe 2:9) Kabiji twayuka’mba muntu Yehoba ye asala kukambula babi ne kuzhikijila jibumba jikatampe pa Amagedonyi waoloka kabiji uji bingi na bulume.—Lum 19:11, 15, 16.

Kwakubula nangwa kuzhinaukatu ne, bintu bikamweka kulutwe bikalengela bantu ‘kupungila na mambo a moyo.’ Pano bino kutanga ne kulanguluka languluka pe Yehoba byo apulwishe bantu banji kala ne bintu byo etubuula bikamweka kulutwe, tukakonsha ‘kwimana ne kwinuna mitwe yetu’ mambo tukayuka kuba’mba kupokololwa kwetu kujitu pepi.—Luk 21:26, 28