Byambo Bikwabo bya mu Mutanchi wa Kupwila kwa Bwikalo ne Mwingilo
© 2022 Christian Congregation of Jehovah’s Witnesses
JANUARY 2-8
BYA BUNEME BIJI MU MAMBO A LESA | 2 BAMFUMU 22-23
“Mambo ka o Twafwainwa Kwikela Bepelula?”
w00 9/15 29-30
Yehoba Wapesheshenga Yosiya Mambo Wipelwile
Baingijilenga mwingilo wa kuwamisha nzubo ya Lesa baingijilenga bingi na mukoyo kufumatu lukelo. Yosiya wasanchijile bingi Yehoba mambo bamwingilo baingijilenga mwingilo wa kuwamisha nzubo ya Lesa ponse paonawine bashakulu babo. Mwingilo byo atwajijile kuyilako palutwe, Shafwana waletele sawakya wawama bingi. Ñanyi sawakya ye aletele? Waishile saka asenda muvungilo! Walumbulwile kuba’mba Ñanga Mukatampe aye Hilikiya wataana “buku wa mizhilo ya Yehoba yo apaine kwi Mosesa.” (2 Byambo bya Moba 34:12-18) Kwakubula nangwa kuzhinaukatu ne, bataaine buku mwajinga mizhilo ine itanshi yanembelwe kala!
Yosiya wakebelenga kumvwa byanembelwe mu uno buku ye bataaine. Shafwana byo atangilenga, mfumu watesheko muchima pa kuba’mba ayuke byo afwainwa kwingijisha mizhilo yanembwamo aye ne kisaka kyonse. Waumvwine bingi bulongo mizhilo yajinga mu uno buku byo yaambile kikatakata pa bupopweshi bwa kine ne byo yaambijile jimo bya malwa bikamwekela bantu ne byo bakaya mu buzha inge batendeka kwivwanga mu bupopweshi bwa bubela. Byo ayukile’mba bantu kechi babena kuba byaamba mizhilo ya Lesa ne, Yosiya watabwile kivwalo kyanji ne kukambizha Hilikiya, Shafwana ne bantutu bakwabo amba: ‘Yainga mukangipwizheko kwi Yehoba pa mambo a byambo biji mu uno buku ye bataana; mambo Yehoba wituzhingijila bingi, na mambo a kuba bashakulu betu kechi bakookejile byambo bya mu uno buku ne.’—2 Bamfumu 22:11-13; 2 Byambo bya Moba 34:19-21.
w00 9/15 30 jifu. 2
Yehoba Wapesheshenga Yosiya Mambo Wipelwile
Baluwe Yosiya bo atumine kuya kwi Hulada ngauzhi wa mukazhi ku Yelusalema babwezhezhe sawakya. Hulada wibabuujile byaambile Yehoba, amba bya malwa byonse byo baambapo mu buku ye bataana bikafikila akya kisaka kya bantu basatukila Lesa. Bino na mambo a kuba’mba Yosiya wipelwile kwi Yehoba Lesa, kechi ukamonako bino bya malwa ne. Bakamuzhiika kwalaala bashakulu banji mu mutende.—2 Bamfumu 22:14-20; 2 Byambo bya Moba 34:22-28.
Bishinka Bikwabo Byanema
w01 4/15 26 mafu. 3-4
Mwakonsha Kwingijila Lesa Bulongo Nangwa kya Kuba Nkemeno Yenu Kechi Yawamine Ne
Nangwa kya kuba wapichile mu bintu byatama bingi ku bwanyike, bino Yosiya waubanga bintu byaoloka kwi Yehoba. Baibolo waamba pa bintu byawama byo aubile mu bukalama bwanji amba: “Kala kechi kwajingapo mfumu wajinga nobe aye, wabwelele kwi Yehoba na muchima wanji yense ne na mweo wanji yense ne na bulume bwanji bonse, monka mwayijile Mizhilo ya Mosesa ne; kabiji kafwako mukwabo walondejilepo wajinga nobe aye ne.”—2 Bamfumu 23:19-25.
Yosiya ke wakumwenako wawama bingi kubapichile mu bintu byatama ku bwanyike kimye kyo bakomenenga. Twakonsha kufunjilako ka ku byo aubile? Ki ka kyakwashishe Yosiya kutwajijila kwikala bwikalo bwakwakamwa Lesa?
JANUARY 9-15
BYA BUNEME BIJI MU MAMBO A LESA | 2 BAMFUMU 24-25
“Yukai Bimye byo Tubena Kwikalamo”
w01 2/15 12 jifu. 2
Juba ja Yehoba ja Kuletelamo Lonaiko Jafwenya Kala Pepi!
2 Kwakubula nangwa kuzhinaukatu ne, byambo bya awile Zefwaniya byatundaikile Mfumu wakyanyike Yosiya kufumya bupopweshi bwa bubela mu ntanda ya Yuda. Bino byubilo bya mfumu bya kufumya bupopweshi bwa bubela mu yo ya ntanda kechi byafumishepo bubi bonse pa bantu nangwa kufuchila bundengamambo bwa nkambo yanji, Mfumu Manase “wayuzhizhe Yelusalema na mashi a babula mambo” ne. (2 Bamfumu 24:3, 4; 2 Byambo bya Moba 34:3) Onkao mambo, juba ja Yehoba jo aletejilemo lonaiko jaishile.
w07 3/15 11 jifu. 10
Bishinka Bikatampe Kufuma mu Buku wa Yelemiya
Mwaka wajinga 607 B.C.E. Wajinga mwaka wa bu jikumi na umo wa bufumu bwa kwa Zedekiya. Mfumu Nebukaneza wazhokolokele Yelusalema na bashilikale banji mu bañondo 18. Pa juba ja butanu na bubiji ja ñondo wa butanu mu mwaka wa bu 19 wa bukalama bwa kwa Nebukaneza, Nebuzaladana mukulumpe wa bakasopa bamfumu, ‘waishile,’ nangwa’mba kufika mu Yelusalema. (2 Bamfumu 25:8) Kampe kufuma ku kampu wanji pangye ya nsakwa ya muzhi, Nebuzaladana wapesele pesele kabiji ne kunengezha bya kuba. Byo papichile moba asatu, pa juba ja bujikumi mu ñondo, ‘waishile mukachi’ nangwa’mba kutwela, mu Yelusalema ne kusoka muzhi.—Yelemiya 52:12, 13 .
Bishinka Bikwabo Byanema
w05 8/1 12 jifu. 1
Bishinka Bikatampe Kufuma mu Buku wa Bubiji wa Bamfumu
2 Bamfumu 24:3, 4. Na mambo a mashi a bantu babula mambo Manase o aichijile, Yehoba, “kechi waswile kumulekelako” bena Yuda ne. Lesa wanemeka bingi mashi a bantu babula mambo. Onkao mambo twashiinwa kuba’mba Yehoba ukakambula bonse bechila mashi a bantu babula mambo.—Salamo 37:9-11; 145:20.
JANUARY 16-22
BYA BUNEME BIJI MU MAMBO A LESA | 1 BYAMBO BYA MOBA 1-3
“Baibolo Buku Waamba pa Bintu bya Kine”
w09 9/1 14 jifu. 1
Adama ne Evwa—Nanchi Kine Bajingako Nyi?
Akilangulukai pa ndonda ya bisemi bya Bayudea yanembwa mu Baibolo mu Buku Mutanshi wa Byambo bya Moba mu kitango 1 kufika ku 9 ne mu Mambo Awama Anembele Luka mu kitango 3. Mu buku wa Byambo bya Moba banembamo ndonda ya bisemi 48, kabiji mu buku wa Luka mwatongolwa bisemi 75. Luka watongwele bisemi kufika ku kisemi mwasemenwe Yesu Kilishitu, kabiji mu buku wa byambo bya moba mwanembwa bisemi bya ku bufumu ne bisemi mwafumanga bañanga mu kisaka kya bena Isalela. Mu ino yonse ndonda ya bisemi yo banembele, mwatongolwa bantu bayukanyikwa nabiji Solomone, Davida, Yakoba, Izaka, Abalahama, Nowa, kepo ne Adama. Mazhina onse a bantu bo batongola mu ano onse mabuku abiji a bantu bajingako. Kibena kumweshatu patoka kuba’mba ne Adama naye kya kine wajingako.
w08 6/1 3 jifu. 4
Nowa ne Muyulo—Nanchi Kishimitu Nyi?
Bibaaba bibiji mu ndonda ya bisemi imwesha kuba’mba kine Nowa wajingako. (1 Byambo bya Moba 1:4; Luka 3:36) Ezela ne Luka banembele ino ndonda ya bisemi bakebele bingi bulongo bishinka. Luka wanembele ndonda ya bisemi kufuma kwi Yesu Kilishitu kufika kwi Nowa.
w09 9/1 14-15
Adama ne Evwa—Nanchi Kine Bajingako Nyi?
Akilangulukai pa lufunjisho lwatemwa bingi bantu baya ku ma chechi lwa bukuzhi. Luno lufunjisho lwamba kuba’mba Yesu Kilishitu wapaine bumi bwanji bwalumbuluka kwikala bukuzhi bwa kukuula bantu ku bundengamambo bwabo. (Mateo 20:28; Yoano 3:16) Byonka byo twayuka, bukuzhi buji mfuto ya mambo yo bapana pa kuba’mba muntu ye bakwata bamulekeko nangwa kuba’mba babwezha kintu kyo baangata. O ene mambo Baibolo o yatelela Yesu Kilishitu “bukuzhi bwaesakana.” (1 Timoti 2:6) Bwaesakana na ka? Baibolo waamba’mba: “Byonkatu bantu bonse byo bafwa na mambo a kwa Adama, byonkabyo bonse bakasangulwa na mambo a Kilishitu.” (1 Kolinda 15:22) Bumi bwalumbuluka bwapaine Yesu kukuula bantu balukokelo bwaesakana na bumi bwalumbuluka bwa kwa Adama bo aelele mu bujimi bwa Edena na mambo a mambo atanshi o alengele. (Loma 5:12) Kwambatu kine, inge Adama kechi wajingako ne, ko kuba’mba bukuzhi bwa kwa Yesu bo bwatutu.
Bishinka Bikwabo Byanema
it-1 911 mafu. 3-4
Ndonda ya Bisemi
Mazhina a Banabakazhi. Banabakazhi bebanemba mu ndonda ya bisemi inge paji kyanema kyamwekele. Pa Ntendekelo 11:29, 30, Selai (Sala) bamutongola mambo Lukunwa walayilwe wafwainwe kwishila mwi aye, kechi mu mukazhi mukwabo wa kwa Abalahama ne. Milika naye bamutongwele mu kino kibaaba kyamweka mambo ye wajinga nkambo yanji Libeka, muka Izaka. Kino kyamwesheshe kuba’mba Libeka wajinga wa mu kisemi kya kwa Abalahama, mambo Izaka kechi wafwainwe kusongola mwanamukazhi wa mu bisaka bikwabo ne. (Nt 22:20-23; 24:2-4) Pa Ntendekelo 25:1, Abalahama bamupele mukazhi mukwabo wa jizhina ka Ketula. Kino kibena kumwesha kuba’mba Sala byo afwile, Abalahama wasongwele jikwabo kabiji wakijinga na bulume bwa kusema baana, mambo papichiletu myaka 40 kufuma po bamubwezhejile bulume kwi Yehoba mu jishinda ja kukumya. (Lo 4:19; Nt 24:67; 25:20) Kabiji kino kimwesha ne bulunda bwajinga pa bena Mijanyi ne bena Alabya na bena Isalela.
Liya, Lechela ne bantombo ba kwa Yakoba, ne baana bo basemene nabo bebatongolamo mu ndonda ya kino kisemi. (Nte 35:21-26) Kino kitukwasha kuyuka Yehoba byo aubile kulutwe na bano baana. Kino kyo kishinka kilengela kutaana ne mazhina a banabakazhi bakwabo mu ndonda ya bisemi yanembwa mu Baibolo. Bo bapeele bya buswanyi nabo mazhina abo akonsha kutanwa mu ndonda ya kisemi. (Ba 26:33) Bapusanakotu ke Tamala, Lehaba ne Luta. Bano kuji bimo byo baubile bibalengejile kwikala mu ndonda ya kisemi kya bashakulu ba kwa Mesiasa, aye Yesu Kilishitu. (Nt 38; Lut 1:3-5; 4:13-15; Mat 1:1-5) Bibaaba bikwabo mo batongola banabakazhi ke mu 1 Byambo bya Moba 2:35, 48, 49; 3:1-3, 5.
JANUARY 23-29
BYA BUNEME BIJI MU MAMBO A LESA | 1 BYAMBO BYA MOBA 4-6
“Milombelo Yami Imweshapo ka pe Amiwa?”
“Anweba mumvwa milombelo”
Yabezi wajinga mwanamulume watemenwe kulomba. Watendekele lulombelo lwanji kusashijila Yehoba kumupesha. Kabiji walombele bintu bisatu bimwesha’mba wajinga bingi na lwitabilo.
Kitanshi, Yabezi walombele Lesa amba: “Mukampeshe ne kubayisha nyaunda yami.” (Kyepelo 10) Uno mwanamulume wanemekelwe bingi kechi waangatanga bantu mpunzha kya lunkanankana nangwa kukumbwa bintu bya bakwabo ne. Kyamweka luno lulombelo lo alombele lwajinga lwa kulomba kuvujilako kwa bantu, kechi mpunzha ne. Kyamweka walombelenga Lesa kubayisha nyaunda yanji mu mutende kuba’mba mukekalenga bapopweshi ba Lesa ba kine bavula.
Kya bubiji, Yabezi walombele “kuboko” kwa Lesa kwikala nanji. Mu bukifwanyikizho, kuboko kwa Lesa kulumbulula bulume bwanji bo engijisha kukwasha bapopweshi banji. (1 Byambo bya Moba 29:12) Yabezi walombele na muchima yense kabiji watengejilenga kutambula byo alombele kwi Lesa ukwasha bonse bamwitabila. Mambo kuboko kwanji kechi kwaipipa ne.—Isaya 59:1.
Kya busatu, Yabezi walombele’mba: ‘Nzhikijilai ku bya malwa, pa kuba’mba bikabule kunkozha!” Kyamweka byambo bya kuba’mba “bikabule kunkozha” kechi byalumbulwilenga’mba Yabezi walombelenga kumufya ku bya mwalwa ne, bino walombelenga kuba’mba bya malwa bikabule kumupezha kalango.
Lulombelo lwalombele Yabezi lumwesha byo atele muchima pa bupopweshi bwa kine ne lwitabilo lwanji mwi Lesa umvwa milombelo. Nanchi Lesa wakumbwile nyi? Ee mambo jino jishimikila japezhako na byambo bya kuba’mba: “Lesa wamubijile bintu byo alombele.”
Bishinka Bikwabo Byanema
w05 10/1 9 jifu. 7
Bishinka Bikatampe Kufuma mu Buku Mutanshi wa Byambo bya Moba
1 Byambo Bya Moba 5:10, 18-22. Mu moba a Mfumu Saulo, mikoka yaikelanga ku musela wa Yodano yashinjile bena Haguli nangwa bavujile kya kuba muntu umo wafwainwe kulwa na bantu babiji. Kyalengejile kushinda mambo banabalume ba mu ino mikoka baketekejile mwi Yehoba na muchima yense kwibakwasha. Ne atweba twafwainwa kuketekela mwi Yehoba na muchima yense mu nkondo yetu ya ku mupashi.—Efisesa 6:10-17.
JANUARY 30–FEBRUARY 5
BYA BUNEME BIJI MU MAMBO A LESA | 1 BYAMBO BYA MOBA 7-9
“Yehoba Ukemukwasha Kwingila Mingilo Yakatazha”
w05 10/1 9 jifu. 8
Bishinka Bikatampe Kufuma mu Buku Mutanshi wa Byambo bya Moba
1 Byambo Bya Moba 9:26, 27. Bena Levi baingijilanga pa bibelo bajinga na mwingilo wabaya bingi. Bo balamanga lufungulo wa pa kibelo kya bibamba byazhila bya mu nzubo ya Lesa. Baingilanga mu bukishinka mwingilo wa kushinkula bibelo pa juba pa juba. Ne atweba betupa mwingilo wa kusapwila ku bantu ba mu nyaunda yetu ne kwibakwasha kwiya na kupopwela Yehoba. Atweba twafwainwa kwingilanga uno mwingilo mu bukishinka byonka byaingilanga bena Levi baingijilanga ku bibelo.
Abya Mwakonsha Kuba Byaubanga Finease mu Bimye bya Makatazho Nyi?
Finease wajinga na mwingilo wanema bingi mu Isalela wa kala, bino na mambo a kuchinchika, kwikala na maana ne kuketekela mwi Lesa, washinjile makatazho. Kabiji na mambo a kulama bulongo kipwilo kya Lesa, Finease watajilwe bulongo kwi Yehoba. Byo papichile myaka nobe 1,000, mupashi watangijile Ezela kunemba’mba: “Finease mwana Eleaza wajinga mukulumpe wabo kala; Yehoba ekale nanji!” (1 Moba 9:20) Ne lelo jino, Yehoba wikala na bonse babena kutangijila bantu banji, ne bena Kilishitu bonse bamwingijila mu bukishinka.
Bishinka Bikwabo Byanema
Mwimbilai Yehoba!
6 Kya kine, kupichila mu bangauzhi banji, Yehoba wakambizhe bapopweshi banji kumutota mu nyimbo. Banyimbi ba mu mukoka wa buñanga kechi bebaswishishe kwingilako mingilo ikwabo yaingilangapo bena Levi bakwabo ne. Kyaubiwe bino pa kuba’mba bano banyimbi bekalengako na kimye kya kunemba nyimbo kabiji ne kwiifunda.—1 Moba 9:33.
TAIKO MUCHIMA KU MWINGILO WA KUSAPWILA
“Kwashai Muntu ye Mufunjisha Baibolo Kwingijisha byo Abena Kufunda?”
Kwashainga bo Mufunjisha Baibolo Kufikilamo Kubatizhiwa
3 Muntu ubena kufunda Baibolo saka akyangye kubatizhiwa, wafwainwa kwingijishanga byo afunda mu Baibolo. (Tangai Mateo 28:19, 20.) Umvwe ubena kufunda Baibolo ke engijisha byo afunda, wikala nobe “muntu wa maana” waambilepo Yesu mu kishimpi wapoyile kitendekesho kyazhika ne kushimika nzubo yanji pa jibwe. (Mat. 7:24, 25; Luka 6:47, 48) Twakonsha kukwasha byepi ye tufunjisha pa kuba’mba engijishenga byo afunda? Twayai twisambe pa bintu bisatu byo twakonsha kuba.
4 Kwashai ye mufunjisha kwibikila bikonkwanyi. Mambo ka o mwafwainwa kubila bino? Langulukai pa kino kimwesho: Umvwe mubena kuya kwalepa panshi nangwa na nkinga, inge mwafika pa mpunzha ibena kumweka bulongo mwakonsha kufuukulapo kwimana. Kechi mukalangulukapo ne byalepa museke washalako pa kuba’mba mufike ko mubena kuya ne. Kyo kimotu ne muntu ubena kufunda Baibolo, inge wibikila binkokwanyi byo akonsha kufikizha mu kimye kicheche, ukamona kuba’mba wakonsha kufikizha ne kikonkwanyi kya kubatizhiwa. Ingijishainga kipungu kya kuba’mba “Ubai bino” mu buku wa kuba’mba Mukekala Myaka ne Myaka! pa kuba’mba mukwashe ye mufunjisha kwibikila bikonkwanyi. Inge mwapwisha lufunjisho, isambai pa kyokyo kikonkwanyi byo kyakwatankana na bintu byo afunda. Inge mubena kukeba ye mufunjisha kufikizha kikonkwanyi kikwabo, mwakonsha kwikinemba pa mpunzha po banemba’mba “Bikwabo.” Kimye kyonse ingijishainga kino kipungu kwisamba na ye mufunjisha Baibolo bikonkwanyi byo afwainwa kwibikila bya kufikizha mu kimye kicheche ne bikebewa kimye kyabaya pa kuba’mba ebifikizhe.
5 Kwashai ye mufunjisha Baibolo kupimpula byubilo byanji. (Tangai Mako 10:17-22.) Yesu wayukile’mba kikakatazha bingi munonshi kupotesha bunonshi bwanji bonse. (Mako 10:23) Pano bino, Yesu wabuujile mwanamulume umo kuba kino. Mambo ka? Mambo Yesu watemenwe uno muntu. Bimye bimo, twakonsha kuchinuzhuka kutundaika ye tufunjisha kwingijisha byo abena kufunda na mambo a kulanguluka’mba kechi winengezha kupimpula byobyo bintu ne. Pakonsha kupita kimye pa kuba’mba bantu basankilepo miteeto yabo ya kala ne kuvwala bumuntu bupya. (Kolo. 3:9, 10) Bino umvwe mwisambapo bukiji kwa kubula kupita mu mbaji, ye mufunjisha kechi ukabanda kutendeka kupimpula byubilo byanji ne. Umvwe ke mwisambe pa bino bintu, mukamwesha’mba mwamuta muchima.—Sala. 141:5; Maana 27:17.
6 Kyanema bingi kwipuzha ye mufunjisha Baibolo byo alanguluka pa mutwe ye mubena kumufunjishapo. Kuba bino kukemukwasha kuyuka milanguluko yanji ne bintu byo aitabilamo. Umvwe ke mube bino kimye kyonse, kikemupeelela kwisamba pa bintu byo akonsha kubula kuswa bukiji. Mu buku wa kuba’mba Mukekala Myaka ne Myaka! muji mepuzho avula bingi alengela muntu kwamba milanguluko yanji. Nabiji mu lufunjisho 04 muji bwipuzho bwa kuba’mba: “Mwalanguluka’mba Yehoba umvwa byepi ku muchima inge mwaingijisha jizhina janji?” Mu lufunjisho 09 muji bwipuzho wa kuba’mba: “Ñanyi bintu bimo byo mukebesha kulombapo kwi Lesa?” Patanshi, muntu ye mufunjisha kyakonsha kumukatazha kukumbula ano mepuzho. Mwakonsha kumukwasha kupichila mu kumufunjisha kulanguluka pa binembelo ne bipikichala bijimo.
7 Umvwe ye mufunjisha wayuka kintu kyo afwainwa kuba, ambai pa bimweka mu bwikalo byakonsha kumutundaika kuba kyo kyo kintu. Inge kya kuba’mba ye mufunjisha kechi utaanwa ku kupwila kimye kyonse ne, mwakonsha kumutambisha vidyo wa kuba’mba Yehoba Wantele Bingi Muchima, uji pa kipungu kya kuba’mba “Kebai Bishinka Bikwabo” kiji mu lufunjisho 14. Mu mafunjisho avula aji mu buku wa kuba’mba Mukekala Myaka ne Myaka!, mukataana mashimikila a byamwekele mu kipungu kya kuba’mba “Funjilaipo Bikwabo,” nangwa pa kipungu kya kuba’mba “Kebai Bishinka Bikwabo.”* Bino kechi mwafwainwa kwesakanyanga muntu ye mufunjisha ku muntu mukwabo kupichila mu kwamba’mba, “Inge kananga wakonsheshe, ko kuba’mba ne obewa wakonsha,” ine. Mwine wafwainwa kwifuukwilapo. Mwafwainwa kwamba pa bishinka byakwashishe muntu ye bamwesha mu vidyo kwingijisha mafunjisho a mu Baibolo. Kampe mwakonsha kwamba pa kinembelo kyamukwashishe nangwa kishinka kikwabo kyo aubile. Kabiji mwafwainwa kwamba pe Yehoba byo akwashishe uno muntu.
8 Kwashai ye mufunjisha kutemwa Yehoba. Mwakonsha kuba byepi bino? Monaingapo bimye bya kwamba pa byubilo bya Yehoba. Kwashai ye mufunjisha kuyuka kuba’mba Yehoba ke Lesa wa lusekelo kabiji ukwasha bantu bamutemwa. (1 Timo. 1:11; Hebe. 11:6) Mweshai ye mufunjisha kuba’mba ukamwenamo byawama inge ke engijishe byo abena kufunda. Kabiji mulumbulwilai kuba’mba bintu byawama byo akamwenamo ke biyukilo bimwesha’mba Yehoba wamutemwa. (Isa. 48:17, 18) Umvwe ye mufunjisha watemwa Yehoba, kikamupelela kupimpula bwikalo bwanji.—1 Yoa. 5:3.
FEBRUARY 6-12
BYA BUNEME BIJI MU MAMBO A LESA | 1 BYAMBO BYA MOBA 10-12
“Twajijilai Kwibikako Kuba Kyaswa Muchima wa Lesa”
“Mumfunjishe Kuba Kyaswa Muchima Wenu”
12 Kuji kintu kikwabo kyo twakonsha kufunjilako kwi Davida. Davida wanemekele bingi mafunde ajinga mu Mizhilo ya Lesa kabiji wakebeshanga bingi kwialondela mu bwikalo bwanji. Akimonai kyamwekele kimye kyo akebelenga wa kumupapo “tumema twa ku mushima wa ku Betelema.” Banabalume basatu ba kwa Davida bakatwelele mukachi ka nzhita ya bena Filishitiya ne kukatapula mema ne kumuletelao. Bino “Davida kechi waswile kwiatoma ne, wietulwijile panshi ke a Yehoba.” Mambo ka? Davida walumbulwile amba: “Lesa wami ankanye amiwa kuba kino kintu. Lelo ntome mashi a bano bantunyi? Mambo bajikwitwala ku lufu byo bakealeta.”—1 Moba 11:15-19.
13 Davida wafunjile mu Mizhilo kuba’mba mashi afwainwa kwitululwa panshi kwi Yehoba kechi kwiaja ne. Kabiji wayukile ne ene mambo o kyaikejile bino. Davida wayukile kuba’mba “bumi bwa mubiji buji mu mashi.” Nangwa byonkabyo, ano mema kechi ajinga mashi ne. Pano mambo ka Davida o akaine kwiatoma? Mambo wanemekele jifunde ja mu mizhilo jaamba pa mashi. Kwi aye, ano mema anemenetu nobe mashi a boba banabalume basatu. Onkao mambo, kechi kyaijilemo kuba’mba atome ano mema ne. Mu kifulo kya kwiatoma, walangulukilepo amba wafwainwa kwiechila panshi.—Levi 17:11; Mpitu. 12:23, 24.
Funjishainga Jiwi Jenu ja mu Muchima na Mizhilo ne Mafunde a Lesa
5 Pa kuba’mba tumwenemo mu mizhilo ya Lesa, kechi twafwainwa kupelelatu pa kwiitanga nangwa kwiilabijila ne. Twafwainwa kwiitemwa ne kwiinemeka. Mambo a Lesa aamba’mba: “Shikwai byatama, temwaiko byawama.” (Amo. 5:15) Pano twakonsha kuba byepi? Twafwainwa kufunda kumonanga bintu byonka Yehoba byo ebimona. Fwanyikizhai’mba muji na lukatazho lwa kubula kulaala. Dokotala wimubuula mutanchi wakonsha kwimukwasha. Wimubuula ne kajo ko mwafwainwa kuja, makayo a kukosesha mubiji ne kupimpulako bintu bimo. Na mambo a kulondela uno mutanchi, lukatazho lwa kubula kulaala lwapwa. Mwafwainwa kusanchila uno dokotala pa kwimukwasha kupimpulako bwikalo bwenu.
6 Mulenga wetu naye witupa mizhilo yakonsha kwituzhikijila ku bintu byatama bifuma mu bundengamambo kabiji itukwasha kwikala bwikalo bwawama. Baibolo witufunjisha’mba kechi twafwainwa kwikala na bubela, bujimbijimbi, bwivi, kuba bulalelale, bumbanzhi ne bingelekezha ne. (Tangai Byambo bya Maana 6:16-19; Lum. 21:8) Inge twimwena mapesho afumamo mu kulondela mashinda a Yehoba, kitulengela kutemwa Yehoba na muchima yense, ne kutemwa mizhilo yanji .
Bishinka Bikwabo Byanema
it-1 1058 mafu. 5-6
Muchima
Kwingijila Yehoba “na Muchima Yense.” Pa kuba’mba muchima wetu ye twayukila jimo engilenga bulongo wafwainwa kwikala mutuntulu, pa kuba muchima wakifwanyikizho wakonsha kwabenamo. Davida walombele’mba: “Nkwashai ngikale na muchima umo kuba’mba ngakamwenga jizhina jenu.” Kino kibena kulumbulula’mba muchima wa muntu wakonsha kwabenamo mu bintu byo akeba ne byo akamwa. (Sl 86:11) Muntu wa uno mutundu kechi ‘uba bintu na muchima yense ne’—ko kuba’mba upopwela Lesa na kyambazhi. (Sl 119:113; Lum 3:16) Kabiji muchima wa muntu wakonsha kwabenamo (ko kuba’mba kwikala na michima ibiji), saka abena kwingijila bankambo babiji nangwa kwamba byambo byapusana na byo abena kulanguluka. (1Mo 12:33; Sl 12:2, tubyambo twa munshi) Yesu wakainye kwikala na muchima wa uno mutundu.—Mat 15:7, 8.
Muntu ubena kukeba kutookesha Lesa ku muchima wafwainwa kubanga bintu na muchima yense kabiji wafwainwa kuchinuzhuka kwikala na michima ibiji. Wafwainwa kwingijilanga Lesa na muchima yense. (1Mo 28:9) Wafwainwa kutwajijila kwipesapesa pa kuba’mba obe bino mambo muchima uji na bujimbijimbi kabiji mwayula bubi. (Ye 17:9, 10; Nt 8:21) Bintu byakonsha kwitukwasha kwingijila Yehoba na muchima yense ke kulomba kufuma panshi ya muchima (Sl 119:145; Jil 3:41), kufunda Mambo a Lesa pa juba pa juba (Eze 7:10; Man 15:28), kwingila mwingilo wa kusapwila na mukoyo (esekanyaiko Ye 20:9), ne kupwanañana na boba bengijila Yehoba na muchima yense.—Esekanyaiko 2Mf 10:15, 16.
FEBRUARY 13-19
BYA BUNEME BIJI MU MAMBO A LESA | 1 BYAMBO BYA MOBA 13-16
“Mu Kulondela Lutangijilo lwa Lesa Mufuma Byawama”
w03 5/1 10-11
Nanchi Mushikisha’mba, “Yehoba . . . Uji Kwepi” Nyi?
12 Jikwachi ja lulayañano byo bejibwezhezhe ku bena Isalela ne kwijisunga myaka yavula mu Kiliata-yealimu, Mfumu Davida wasakile amba pano bejitwale ku Yelusalema. Waumvwañene na bakulumpe ne kwibambila’mba babwezhe Jikwachi ‘umvwe balanguluka’mba kyo kintu kyawama, kabiji kyo kyaswa muchima wa Yehoba.’ Bino wasujile kupesapesa bulongo kuba’mba ayuke Yehoba byoakeba Jikwachi kusendewa. Umvwe waubile bino, Jikwachi inge kechi bejisendejile pa ñola ne. Bena Kohati ba mu bena Levi bo bafwainwe kwijisenda pa bipuzhi byabo, byonka byakambizhe Lesa. Nangwa kyakuba javula Davida waipuzhanga Yehoba, bino pakikye wakankelwe kumwipuzha mu jishinda jafwainwa. Mu kino mwafumine malwa akatampe. Panyuma ya byobyo, Davida waitabizhe’mba: “Yehoba Lesa wetu witupulumukijile mambo kechi twamukebejile monka mo etutongwejile ne.”—1 Byambo bya Moba 13:1-3; 15:11-13; Kubala 4:4-6, 15; 7:1-9 .
w03 5/1 11 jifu. 13
Nanchi Mushikisha’mba, “Yehoba . . . Uji Kwepi” Nyi?
13 Pano jikwachi byo jasendelwe na bena Levi kwijifumya mu nzubo ya kwa Obeda-edomu ne kwijitwala ku Yelusalema, kwaji kwimba lwimbo wa Davida. Mu uno lwimbo mwajinga ne byambo bya kuvululwako bifika pa muchima byakuba’mba: “Kebai Yehoba ne bulume bwanji pamo; mukebe ne kilungi kyanji moba onse. Vulukai mingilo yanji yakatazha yo aubile, ne byanji bya kukumya, ne kuchibamambo kwafumine mu kanwa kanji.”—1 Byambo bya Moba 16:11, 12.
Bishinka Bikwabo Byanema
Popwelainga Yehoba, Mfumu wa Myaka
14 Davida watwajile jikwachi ja lulayañano mu Yelusalema. Pa jino juba ja lusekelo, bena Levi baimbile lwimbo wa kutota Lesa mwajinga byambo byanema bingi byanembwa pa 1 Byambo bya Moba 16:31 bya kuba’mba: “Bambe mu mikoka ya bantu amba: ‘Yehoba [waikala ke] mfumu!’” Mwakonsha kukumya’mba: ‘Byo kiji kuba’mba Yehoba ye Mfumu wa myaka, pano waikele byepi ke mfumu pa kyokya kimye?’ Yehoba wikala Mfumu inge waingijisha bukalama nangwa jibumba kumwimenako pa kimye kimo nangwa mu bintu bimo. Kumvwisha mwatala byambo bya kuba’mba Yehoba waikala Mfumu kwanema bingi. Davida saka akyangye kufwa, Yehoba wamubujile kuba’mba bufumu bwanji bukatwajijila kikupu. Waambile’mba: “Amiwa nkaswanyikapo mwanobe, ye ukasema obe mwine, ne amiwa nkekajika bufumu bwanji.” (2 Sam. 7:12, 13) Uno mulaye wafikile kimye uno ‘mwana’ Davida kyo asemekelwe saka papita ne myaka kukila pa 1,000. Uno mwana wajinga ñanyi, kabiji ñanyi kimye kyo aikele Mfumu?
TAIKO MUCHIMA KU MWINGILO WA KUSAPWILA
“Butemwe bwa Kilishitu bo Bwitulengela Kwingila”
w16.01 13-14 mafu. 7-10
Lekai ‘Kya Bupe kya Lesa kya Kukankalwa ne mwa Kwikilumbulwila’ Kimulengelenga Kwingila
7 Patanshi, buno butemwe bwafwainwa kwitutundaika kwingijisha bumi bwetu kunemekelamo Yesu. Mutumwa Paulo waambile’mba: “Butemwe bwa Kilishitu bo bwitulengela kwingila.” (Tangai 2 Kolinda 5:14, 15.) Paulo wayukile’mba inge twatambwila butemwe bukatampe bwa Yesu, buketulengela kwingila, nangwa kwitutundaika kutemwa ne kunemeka Yesu. Kine, inge twayuka bulongo bintu bitubila Yehoba, butemwe bo twamutemwa buketulengela kwikala bwikalo bumwesha’mba twanemeka Yesu. Twakonsha kuba byepi bino?
8 Kutemwa Yehoba kuketulengela kulondela Yesu, kulondela bulongo mu ngayo yanji. (1 Petelo 2:21; 1 Yoano 2: 6) Inge twakookela Lesa ne Kilishitu, tumwesha’mba twibatemwa. Yesu waambile’mba: “Yense umvwa mikambizho yami ne kwiilama, ye wantemwa. Kabiji yense wantemwa bakamutemwa kwi Batata, ne amiwa nkamutemwa kabiji nkesolola amiwa mwine patoka kwi aye.”— Yoano 14:21; 1 Yoano 5: 3.
9 Mu kino kimye kya Kivuluko, kyawama kulanguluka pa byo tubena kwingijisha bumi bwetu. Ishikishai’mba: ‘Mu ñanyi mashinda mo mbena kulondela Yesu? Kabiji mu ñanyi mashinda mo nakonsha kuwamishako?’ Kyanema bingi kwishikisha ano mepuzho mambo bantu ba mu ino ntanda bakeba’mba twikalenga byonka byo bekala. (Loma 12:2) Mambo inge twabula kujimuka bakonsha kwitukanjikizha kutendeka kulondela bafunjishi ba mu ino ntanda, bantu batumbalala ne baya nkuwa mu bisela bya lubekyo. (Kolose 2:8; 1 Yoano 2:15-17) Pano twakonsha kuchinuzhuka byepi bintu byo betukanjikizha kuba?
10 Mu kimye kya Kivuluko, kyawama kulangulukapo bulongo pa bivwalo byetu byo biji, mafilimu, nyimbo, ne mutundu wa bintu biji pa foni ne pa kompyuta wetu. Ishikishai’mba: ‘Inge kya kuba Yesu wamona byo navwala, nanchi nakonsha kumvwa bumvu nyi?’ (Tangai 1 Timoti 2:9, 10.) ‘Nanchi bivwalo byami bimwesha’mba ne mwana wa bwanga wa kwa Kilishitu nyi? Nanchi Yesu wakonsha kutemwa kutamba mafilimu o ntamba nyi? Nanchi wakonsha kuteleka ku nyimbo yami nyi? Inge kya kuba Yesu watambwileko foni wami nangwa ka kompyuta kami ka ku maboko, nanchi wakonsha kuba bulanda na byo akonsha kutaanamo nyi? Nanchi kyakonsha kunkatazha kulumbulwila Yesu ene mambo o natemenwa makayo a pa vidyo ajimo nyi?’ Butemwe bo twatemwa Yehoba bwafwainwa kwitulengela kutaya byonse byabula kufwainwa mwina Kilishitu nangwa biwamepotu byepi. (Byubilo 19:19, 20) Kimye kyo twapaine bumi bwetu kwi Yehoba, twamulayile kwingijisha bumi bwetu mu kunemeka Kilishitu. Onkao mambo, kechi twafwainwa kulamapo kiji kyonse kyakonsha kwitulengela kukankalwa kulondela Yesu ne.— Mateo 5:29, 30; Filipai 4: 8.
FEBRUARY 20-26
BYA BUNEME BIJI MU MAMBO A LESA | 1 BYAMBO BYA MOBA 17-19
“Twajijilai Kwingijila Yehoba na Lusekelo Nangwa Mwalefuulwa”
w06 7/15 19 jifu. 1
Tai Muchima Pa Buwame Bwa Jibumba Ja Yehoba
Davida ke muntu umo waambiwapo bingi mu Binembelo bya Kihebelu. Uno kafunga, nyimbi, ngauzhi, kabiji mfumu waketekejile bingi mwi Yehoba Lesa na muchima wanji yense. Bulunda bwanji na Yehoba bo bwamulengejile kuba’mba atendeke mulanguluko wa kushimika nzubo ya Lesa. Ino nzubo ya Lesa yo yafwanyijilwe kwikala mpunzha pa kupopwela Lesa wa kine mu Isalela. Davida wayukishetu amba nzubo ya Lesa ne mwingilo yensetu wafwainwe kulengela bantu ba Lesa kusekela kabiji ne kubilwa bibusa. Onkao mambo, Davida waimbile amba: “Ye mwine wa lusekelo ye mwasalulula, ne kumufikizha ko muji, Ekalenga mu bipango byenu: Tukatondwa na byawama bya ku nzubo yenu, Nzubo yenu yazhila.”—Masalamo 65:4.
Mwenainga Lusekelo mu Mingilo yo Muji Nayo
11 Ne atweba twakonsha kwikala na lusekelo inge ke twingile na ngovu mwingilo yense ye betupa mu jibumba ja Yehoba. Mwafwainwa “kuteshako bingi muchima” ku mwingilo wa kusapwila ne kwingila na muchima yense mingilo ya pa kipwilo. (Byu. 18:5; Hebe. 10:24, 25) Nengezhainga kupwila pa kuba’mba mukumbulengapo mikumbu itundaikañana. Monainga majashi o bemupa mu kupwila kwa mukachi ka mulungu amba mwingilo wanema bingi. Inge bemupapo mwingilo umo mu kipwilo, mwafwainwa kumona kuba’mba mubena kufika bukiji ne kutako muchima pa kuba’mba bemuketekele. Kange mumonenga mwingilo ye bemupa nobe mwingilo wabula kunema ye mwafwainwa kubula kutayilapo kimye ne. Ibikaiko kuwamishako ñingijilo yenu. (Maana 22:29) Umvwe ke mwingile na ngovu mingilo ya Yehoba, mukakosesha bulunda bwenu ne aye, kabiji mukekala na lusekelo lukatampe. (Nga. 6:4) Kabiji kino kikemukwasha kusangalala inge bakwenu bebapa mwingilo ye mwakebelenga.—Loma 12:15; Nga. 5:26.
Bishinka Bikwabo Byanema
w20.02 12, kakitenguluzha
Twamutemwa Bingi Shetu aye Yehoba
Nanchi Yehoba Wanta Muchima Nyi?
Nanchi mwakiipuzhapo kala amba, ‘Pano pa ntanda paji biumbi ne biumbi bya bantu, pano mambo ka Yehoba o antela muchima?’ Inge byo byo kiji, kechi muji bunke ne. Mfumu Davida wanembele’mba: “Anweba Yehoba, nanchi muntu ye ñanyi kya kuba’mba mumuvulukenga, ne mwana muntu ufwa kya kuba’mba mumute muchima?” (Sala. 144:3) Davida waketekejile kuba’mba Yehoba wamuyukile bulongo. (1 Moba 17:16-18) Kabiji kupichila mu Mambo anji ne mu jibumba janji, Yehoba wimukwasha kuyuka’mba umona butemwe bo mwamutemwa. Langulukai pa byambo bimo biji mu Mambo a Lesa byakonsha kwimukwasha kushiinwa’mba wimuta muchima:
• Yehoba wimutele muchima saka mukyangye ne kusemwa.—Sala. 139:16.
• Yehoba wayuka biji mu muchima wenu, kabiji wayuka milanguluko yenu.—1 Moba 28:9.
• Yehoba umvwa milombelo yenu yonse.—Sala. 65:2.
• Byubilo byenu byakonsha kusangajika nangwa kufichisha Yehoba ku muchima.—Maana 27:1.
• Yehoba wimukokela ko aji.—Yoa. 6:44.
• Yehoba wimuyuka bingi bulongo kya kuba nangwatu inge mwafwa, ukemusangula. Ukemupa mubiji ne milanguluko yonka yo muji nayo luno, ne byubilo byenu ne kuvuluka bintu byo mwayuka.—Yoa. 11:21-26, 39-44; Byu. 24:15.
FEBRUARY 27–MARCH 5
BYA BUNEME BIJI MU MAMBO A LESA | 1 BYAMBO BYA MOBA 20-22
“Kwashainga Bakyanyike Kwingijila Yehoba Bulongo”
‘Bino Bintu Wibipane ku Bantu ba Kishinka’
8 Tangai 1 Byambo bya Moba 22:5. Davida wakonsheshe kulanguluka’mba Solomone kechi wafikilamo kutangijila uno mwingilo mukatampe ne. Mambo nzubo ya Lesa ‘yabayile bingi’ kabiji Solomone wajinga ‘mwanyike kabiji kechi wayukile bintu byavula ne.’ Bino Davida wayukile’mba Yehoba ukamukwasha kwingila mwingilo ye amupele. Onkao mambo, Davida watele muchima pa kunengezha bya kwingijisha.
‘Bino Bintu Wibipane ku Bantu ba Kishinka’
7 Nangwa kya kuba Davida wayukile’mba kechi ye bakatela’mba ye washimikile nzubo ya Lesa ne, kechi wakaine kutundaika uno mwingilo ne. Byo bapwishishe kushimika ino nzubo, beitelele’mba nzubo ya kwa Solomone, kechi amba ya kwa Davida ne. Davida watundaikile uno mwingilo wa kushimika nangwa kya kuba kechi ye wamwingijile ne. Wakebele bamingilo, kapotwe, mukuba, siliva, Ngolode ne bichi bya sida. Kabiji watundaikile Solomone amba: “Pano mwanami, Yehoba ekale nobe, kabiji umonenga byawama ne kushimika nzubo ya Yehoba Lesa wobe, byonkatu byo aambile na mambo a obewa.”—1 Moba 22:11, 14-16.
Anweba Bansemi, Nanchi Mubena Kukwasha Baana Benu Kufikilamo Kubatizhiwa Nyi?
14 Byo baji bakafunga, bakulumpe mu kipwilo bakonsha kukwasha bansemi kupichila mu kwamba byawama bifuma mu kwibikila bikonkwanyi mu mwingilo wa Lesa. Nyenga umo waingijile bupainiya myaka kukila pa 70 uvuluka kimye kimo kyo esambile na Mulongo Charles T. Russell, uno nyenga saka akijitu na myaka itanu na umo. Washimikizhe’mba: “Mulongo Russell wisambile ne amiwa pa maminiti 15 ne kuntundaika kwibikila bikonkwanyi bya ku mupashi.” Kine, byambo bya lutundaiko byakonsha kulengela muntu kwingila myaka yavula. (Maana 25:11) Bakulumpe mu kipwilo bakonsha kwitako bansemi ne baana babo ku mingilo ya pa Nzubo ya Bufumu, ne kupapo baana mingilo kwesakana na jifumbi jabo.
15 Balongo ne banyenga mu kipwilo nabo bakonsha kuta muchima banyike. Bafwainwa kuta muchima ku biyukilo bimwesha’mba banyike babena kwibikako kwingijila Lesa. Nanchi pajipo mwanyike wakumbwile mukumbu wawama, watangile bulongo nangwa kwamba bulongo jashi pa kupwila mukachi ka mulungu nyi? Nanchi mwayukapo mwanyike umo washinjile lweseko ku sukulu ne kusapwila bakwabo mo bafunjila nyi? Batundaikai bano banyike. Mwakonsha ne kwipa mutembo wa kwisambapo na mwanyike umo inge kupwila kwapwa nangwa kupwila saka kukyangye kutenda. Inge mwamwesha banyike amba mwibata muchima mu ano mashinda ne akwabotu, kyakonsha kwibalengela kuyuka’mba ne abo baji na mwingilo mu “kipwilo kikatampe.”—Sala. 35:18.
Bishinka Bikwabo Byanema
w05 10/1 11 jifu. 6
Bishinka Bikatampe Kufuma mu Buku Mutanshi wa Byambo bya Moba
1 Byambo bya Moba 21:13-15. Yehoba wakambizhe malaika waletele lonaiko kuleka kuleta bya malwa mambo kechi ukeba kumona bantu banji kutwajijila na kuyanda ne. Kinetu, “lusa lwanji lo lukatampe.”
TAIKO MUCHIMA KU MWINGILO WA KUSAPWILA
“Anweba Banyike Inengezhai Kufikilamo Kubatizhiwa”
Anweba Banyike Mwakonsha Kwinengezha Byepi pa Kuba’mba Mubatizhiwe?
10 Baibolo waamba’mba: “Lwitabilo lwabula mingilo, nalo lwafwa.” (Yakoba 2:17) Inge kya kuba mwashiinwa amba byo mwaitabilamo bya kine, kino kikamwekela mu byubilo byenu. Mukekala na byubilo byatongolwa mu Baibolo amba “byubilo byazhila ne kwingila mingilo ya kunemeka Lesa.”—Tangai 2 Petelo 3:11.
11 “Byubilo byazhila” byo byepi? Inge kya kuba byubilo byenu byazhila, ko kuba’mba muji na byubilo byawama. Kya kumwenako, langulukai pa bañondo batanu na umo bapitapo. Kimye kyo mwaesekelwe kuba bintu byatama, nanchi mwalangulukilepo bulongo kuyuka kyawama ne kyatama nyi? (Bahebelu 5:14) Nanchi muvuluka bimye byo mwashinjile meseko nangwa kukana kulondela bakwenu nyi? Inge muji ku sukulu, nanchi bakwenu bemuyuka’mba muji na byubilo byawama nyi? Nanchi mutwajijila kwikala ba kishinka kwi Yehoba nyi, inyi mulondela byuba bakwenu bo mufunda nabo pa kuba’mba babulenga kwimwendeleka? (1 Petelo 4:3, 4) Ibyo kuba’mba kafwako muntu walumbuluka ne. Bimye bimo, nangwatu boba baingijila Yehoba pa myaka yavula bakonsha kumvwa bumvu, kabiji kyakonsha kwibakatazha kusapwila ku bakwabo. Bino muntu wipana kwi Lesa kechi umvwa bumvu kwikala Kamonyi wa kwa Yehoba ne, kabiji umwesha bino kupichila mu byubilo byanji byawama.
12 “Mingilo ya kunemeka Lesa” yo yepi? Yavwangamo mingilo yo mwingila mu kipwilo, nabiji kuya na kupwila ne kusapwila. Kabiji mwavwangwa ne bintu bikwabo bibula kumona bantu, nabiji milombelo ya pa bunke yo mulomba kwi Yehoba ne lufunjisho lwa pa bunke. Muntu wipana kwi Yehoba kechi ulanguluka’mba bino bintu byakatazha kuba ne. Umvwa byonka byaumvwine Mfumu Davida waambile’mba: “Nsekela bingi kuba kyaswa muchima wenu, anweba Lesa wami, ne mizhilo yenu iji mwine mukachi kami.”—Salamo 40:8.
13 Pa kwimukwashako kwibikila bikonkwanyi, kuji mapepala a kwingijisha mu buku wa Kibemba wa Ifipusho Abacaice Bepusha ne Fyasuko Ifingabafwa, Ibuuku 2, pa mapa 308 ne 309. Pa ano mapepala mwakonsha kunembapo mikumbu ya mepuzho nabiji a kuba’mba: “Nanchi mushinkamika pa kulomba nyi, kabiji milombelo yenu imweshapo ka pa byo mwatemwa Yehoba?” “Ñanyi bintu byo mulombapo mu milombelo yenu ya pa bunke?” “Nanchi muya na kusapwila nangwa kya kuba bansemi benu kechi babena kuya nenyi?” Pa ano mapepala paji ne mapunzha pa kunemba bikonkwanyi byenu kutazha ku milombelo, lufunjisho lwa pa bunke, ne kusapwila.
14 Banyike bavula balanguluka pa kubatizhiwa bataana kuba’mba ano mapepala ebakwasha bingi. Nyenga umo mwanyike aye Tilda waambile’mba: “Naingijishe ano mapepala pa kwibikila bikonkwanyi. Naubilengakotu kimo kimo, kabiji byo papichile mwaka umo nafikijilemo kubatizhiwa.” Mulongo mwanyike aye Patrick, naye waubile byonka bye. Waambile’mba, “Nayukile bintu byo nafwainwe kuba, bino kwibinemba kwankwashishe kwingila na ngovu kwibifikizha.”
15 Bwipuzho bumo buji pa ano mapepala ke bwa kuba’mba: “Nanchi mwakonsha kutwajijila kwingijila Yehoba nangwatu inge bansemi benu ne balunda nenu baleka kumwingijila nyi?” Inge mwipana kwi Yehoba ne kubatizhiwa, mukekala balunda nanji. Onkao mambo, bintu byo mubila Yehoba kechi byafwainwa kwimena pa bansemi benu nangwa pa muntu mukwabo ne. Byubilo byenu byazhila ne mingilo ya kunemeka Lesa bimwesha amba mwashiinwa’mba mwataana bukine kabiji mukeba kulondela mizhilo ya Lesa. Inge mwauba bino, mukafikilamo kubatizhiwa.