Twakonsha Kukosesha Byepi Lwitabilo Lwetu mu Mulaye wa Yehoba wa Kuleta Ntanda Ipya?

1-2. Ñanyi bintu byo twafwainwa kuba byo tubena kutengela ntanda ipya?

TWANEMEKA mulaye wa Yehoba wa kuba’mba ukalula ino ntanda ke ipya mukekala bololoke. (2 Pe. 3:13) Nangwa kya kuba kechi twayuka kimye ino ntanda kyo ikaluka ke ipya ne, bino bintu bibena kumweka mu ano moba bibena kumwesha’mba ntanda ipya ijitu pepi.—Mat. 24:32-34, 36; Byu. 1:7.

² Nangwa kya kuba twaingijila Lesa myaka yavula, atweba bonse twafwainwa kukoseshanga lwitabilo lwetu mu uno mulaye. Mambo ka? Mambo inge twabula kuba bino, lwitabilo lwetu kechi lukakosa ne. Kabiji mutumwa Paulo watelele kubula lwitabilo amba “bundengamambo bupelawizha kwitukobankanya.” (Hebe. 12:1) Onkao mambo, pa kuba’mba twikale na lwitabilo lwakosa, twafwainwa kulangulukanga pa bintu byakonsha kwitulengela kushiinwa’mba ntanda ipya ijitu pepi kufika.—Hebe. 11:1.

3. Ñanyi bintu byo tusakwisambapo mu uno mutwe?

³ Mu uno mutwe tusakwisamba pa mashinda asatu akonsha kukosesha lwitabilo lwetu mu mulaye witulaya Yehoba wa kwalula ino ntanda ke ipya: (1) kulanguluka languluka pa bukuzhi (2) kulanguluka languluka pa bulume bwa Yehoba ne (3) kubanga bintu byakonsha kwitulengela kufwenya kwipi ne Yehoba. Kepo tusakwisamba pa byambo Yehoba byo abuujile Habakuka byo byafwainwa kukosesha lwitabilo lwetu mu ano moba. Patanshi, twayai twisambe pa bintu bimo byo twakonsha kupitamo mu ano moba mo twafwainwa kumwesha’mba tuji na lwitabilo lwakosa mu mulaye wa ntanda ipya iji pepi.

BINTU BIMO MO TWAFWAINWA KUMWESHA’MBA TUJI NA LWITABILO LWAKOSA

4. Twakonsha kumwesha’mba tuji na lwitabilo lwakosa mu ñanyi bintu?

⁴ Pa juba pa juba twafwainwa kumweshanga’mba tuji na lwitabilo lwakosa mu bintu byo tufuukulapo kuba nabiji kusala balunda, bya kisangajimbwe, sukulu, masongola, kwikala na baana ne nkito. Twafwainwa kwishikisha’mba: ‘Nanchi bintu byo mfuukulapo kuba bimwesha’mba nji na luketekelo lwa kuba’mba mpelo ya buno bwikalo ijitu pepi kabiji katatakatu Lesa akalule ino ntanda ke ipya nyi? Inyi nguba bintu byubapo bantu bimwesha’mba kechi baji na luketekelo lwa kwikala myaka ne myaka nenyi?’ (Mat. 6:19, 20; Luka 12:16-21) Umvwe twakosesha lwitabilo lwetu mu mulaye wa kuba’mba ntanda ipya ijitu pepi, tukafuukulanga bintu bulongo.

5-6. Mambo ka o twafwainwa kwikela na lwitabilo lwakosa inge tubena kupita mu bya malwa? Lumbululai.

⁵ Inge twaikala na lwitabilo lwakosa twakonsha kuchinchika makatazho nabiji kumanyikwa, kukolwa kikola kikatampe nangwa bintutu bikwabo byakonsha kwitulengela kulefulwa. Patanshi twakonsha kuchinchika ano makatazho. Pano bino makatazho a uno mutundu akonsha kutwajijila pa kimye kyabaya. Onkao mambo, twafwainwa kwikala na lwitabilo lwakosa pa kuba’mba tuchinchike ne kutwajijila kwingijila Yehoba na lusekelo.—Loma 12:12; 1 Pe. 1:6, 7.

⁶ Umvwe tubena kupita mu lweseko twakonsha kulanguluka’mba Yehoba kechi ukafikizha mulaye wanji wa kwalula ino ntanda ke ipya ne. Nanchi kino kyakonsha kulumbulula’mba kechi tuji na lwitabilo nenyi? Ine. Akilangulukai pa kino, inge mashika akilamo twakonsha kulanguluka’mba kechi kukatwapo kyuya ne. Pano bino mashika apwa. Kyo kimotu, umvwe twalefulwa twakonsha kutendeka kulanguluka’mba ntanda ipya kechi ikafika ne. Umvwe lwitabilo lwetu lwakosa, twayuka’mba Lesa ukafikizha milaye yanji. (Sala. 94:3, 14, 15; Hebe. 6:17-19) Luno luketekelo luketulengela kutangizhangako kupopwela Yehoba mu bwikalo bwetu bonse.

7. Ñanyi ndangulukilo yo twakonsha kuchinuzhuka?

⁷ Twafwainwa kwikala na lwitabilo lwakosa pa kuba’mba twingile mwingilo wa kusapwila. Bantu bavula bo tusapwila balanguluka kuba’mba “mambo awama” aamba pa ntanda ipya itulaya Lesa kechi a kine ne. (Mat. 24:14; Ezi. 33:32) Twafwainwa kujimuka kuchiina’mba twakatatula kuzhinauka byonka byo bazhinauka ne abo pa bintu bitufunjisha Yehoba. Twafwainwa kukosesha lwitabilo lwetu mambo luketulengela kubula kulanguluka byonka byo balanguluka. Pano twayai twisambe pa mashinda asatu mo twakonsha kubila bino.

LANGULUKA LANGULUKAINGA PA BUKUZHI

8-9. Kulanguluka languluka pa bukuzhi kwakonsha kukosesha byepi lwitabilo lwetu?

⁸ Jishinda jimo jo twakonsha kukoseshamo lwitabilo lwetu ke kulanguluka languluka pa bukuzhi. Bukuzhi bwitulengela kushiinwa kuba’mba Lesa ukafikizha milaye yanji. Umvwe saka tulanguluka pa ene mambo Lesa o apaine bukuzhi ne kyamulengejile kuba bino, tukosesha lwitabilo kuba’mba Lesa ukafikizha mulaye wa kuba’mba tukekala myaka ne myaka mu ntanda yawama. Mambo ka o twakonsha kwambila byobyo?

⁹ Ñanyi bintu byavwangiwe mu bukuzhi? Yehoba watumine Mwananji mubeji, mulunda nanji wa pa muchima wafumine mwiulu ne kwiya na kusemwa pano pa ntanda. Yesu byo ajinga pano pa ntanda wachinchikile meseko apusana pusana. Kepo amanamine ne kufwa lufu lwatama. Kino ke kintu kyanema kyapaine Yehoba. Lesa wetu witutemwa bingi. Kechi wakonsheshe kuswisha Mwananji kumanama ne kufwa pa kuba’mba etulengele kwikala na bumi bwawama bwa pa ka kimyetu kacheche ne. (Yoa. 3:16; 1 Pe. 1:18, 19) Na mambo a kuba Yehoba wapaine Mwananji ye atemwa bingi pa kuba’mba etukwashe, ukamona’mba atweba bonse twaikala na bumi bwa myaka ne myaka mu ntanda ipya.

LANGULUKA LANGULUKAINGA PA BULUME BWA YEHOBA

10. Kwesakana na Efisesa 3:20, ñanyi bintu Yehoba byo akeba kwitubila?

¹⁰ Jishinda ja bubiji jikosesha lwitabilo lwetu ke kulanguluka languluka pa bulume bwa Yehoba. Uji na bulume bwa kufikizha kyonse kyo alaya. Bantu bavula ano moba balanguluka’mba Lesa kechi ukafikizha mulaye wanji wa kuba’mba bantu bakekala myaka ne myaka pano pa ntanda ne. Kabiji Yehoba ufikizha milaye yanji, kechi bantu ne. Wakonsha kuba bino mambo ye wa Bulume Bonse. (Yoba 42:2; Mako 10:27) Onkao mambo, twafwainwa kuketekela’mba ukafikizha milaye yanji yonse yo etulaya.—Tangai Efisesa 3:20.

11. Ambaipo mulaye umo walayile Lesa wamwekelenga nobe kechi ukafika ne. (Monai kakitenguluzha ka kuba’mba “Milaye imo Yamwekelenga Nobe Kechi Ikafika Ne.”)

¹¹ Akilangulukai pa bintu Yehoba byo alayile bantu banji kala, byamwekele nobe kechi bikamweka ne. Walayile Abalahama ne Sala kuba’mba bakasema mwana nangwa kya kuba bakotele. (Nte. 17:15-17) Kabiji wabuujile Abalahama amba baana banji ukebapa kyalo kya Kenana. Bena Isalela baana ba kwa Abalahama byo bajinga mu buzha myaka yavula mu Ijipita, bamwene nobe uno mulaye kechi ukafika ne. Bino wafikile. Kabiji Yehoba wabuujile Elisabeta kuba’mba ukekala na mwana nangwa kya kuba wajinga mukote. Kabiji wabuujile kisungu aye Maliya kuba’mba ye ukasema Mwananji. Kino kyafikizhe mulaye Yehoba ye aambijile jimo kala kene mu bujimi bwa Edena.—Nte. 3:15.

12. Byambo biji pa Yoshua 23:14 ne Isaya 55:10, 11 bitukwasha byepi kuyuka’mba Yehoba uji bingi na bulume?

¹² Umvwe saka tulanguluka pa milaye yonse yalayile Yehoba ne byo eifikizhe tuyuka’mba uji bingi na bulume. Kabiji lwitabilo lwetu mu mulaye wa kuba’mba Lesa ukalula ino ntanda ke ipya lukakosa. (Tangai Yoshua 23:14; Isaya 55:10, 11.) Kino kitulengela kwinengezha kukwasha bakwetu kuyuka’mba mulaye witulaya Lesa wa kuba’mba ino ntanda ikekala ke ipya ukafika kechi mañambilatu ne. Yehoba mwine waambilepo pa meulu apya ne ntanda ipya amba: “Bino byambo bya kishinka kabiji bya kine.”—Lum. 21:1, 5.

UBAINGA BINTU BYAKONSHA KWIMULENGELA KUFWENYA KWIPI NE YEHOBA

13. Kupwila kwakonsha kukosesha byepi lwitabilo lwenu? Lumbululai.

¹³ Jishinda ja busatu jakonsha kukosesha lwitabilo lwetu ke kubanga bintu byakonsha kwitulengela kufwenya kwipi ne Yehoba. Akilangulukai pa bintu byo twakonsha kumwenamo inge saka tutaanwa ku kupwila. Ba Annab, baingila myaka yavula mingilo ya pusana pusana mu mwingilo wa kimye kyonse baambile’mba: “Kupwila kunkwasha kukosesha lwitabilo lwami. Umvwe ñambi kechi wayuka bulongo kufunjisha ne, nangwa kechi waambapo bya katataka ne, byo amba binkwasha kumvwisha bulongo biji mu Baibolo. Kabiji bino bikosesha lwitabilo lwami.” Onkao mambo, lwitabilo lwetu lwakonsha kukosa umvwe saka tuteleka ku mikumbu ikumbula balongo ne banyenga kimye kya kupwila.—Loma 1:11, 12; 10:17.

14. Kusapwila kukosesha byepi lwitabilo lwetu?

¹⁴ Kabiji twakonsha kukosesha lwitabilo lwetu inge saka tusapwila kimye kyonse. (Hebe. 10:23) Ba Barbara baingijila Yehoba myaka kukila 70 baambile’mba: “Lwitabilo lwami lwakoselako na mambo a kusapwila kimye kyonse. Inge mbena kwisamba na bantu javula pa milaye ya Yehoba yawama lwitabilo lwami lukoselako bingi.”

15. Lufunjisho lwetu lwa pa bunke lukosesha byepi lwitabilo lwetu? (Monai kipikichala.)

¹⁵ Kintu kikwabo kyakonsha kukosesha lwitabilo lwetu ke lufunjisho lwa pa bunke. Ba Susan kibakwasha bingi inge batanchikila jimo bya kuba pa lufunjisho lwabo lwa pa bunke. Baambile’mba: “Pa Mulungu, nengezhezha jimo Lufunjisho lwa Kyamba kya Usopa lo tukafunda mulungu walondelapo. Pa Kimo ne pa Kibiji, nnengezha kupwila kwa mukachi ka mulungu. Moba akwabo, pa lufunjisho lwami lwa pa bunke nguba bintu bikwabo byakonsha kundengela kufwenya kwipi ne Yehoba.” Kulondela mutanchi kukwasha ba Susan kukosesha lwitabilo lwabo. Ba Irene baingijila pa ofweshi wa ntanda yonse myaka yavula bataana kuba’mba kutanga bungauzhi bwa mu Baibolo kwakosesha bingi lwitabilo lwabo. Baambile’mba: “Nkumya bingi kuba’mba Yehoba ufikizha bungauzhi bwanji byonkatu byo ebwambile.”c

“KWA KUBULA NANGWA KUZHINAUKA NE, KIKAFIKA”

16. Ñanyi byambo Yehoba byo aambijile Habakuka byakonsha kwitukwasha ne mu ano moba? (Bahebelu 10:36, 37)

¹⁶ Bantu ba Yehoba bamo bapembelela mpelo ya buno bwikalo myaka yavula bingi. Bantu bamo balanguluka kuba’mba mpelo ya buno bwikalo yabanda bingi. Yehoba wayuka bilanguluka bantu banji. O ene mambo o ambijile ngauzhi Habakuka amba: “Kino kimwesho kibena kupembelela kimye kyakyo kyatongolwa, kabiji kibena kupelawizha kwiya amba kifike ku mpelo yakyo, kabiji kechi kikabula kufika ne. Nangwa kya kuba kyabanda, wikitengelenga! Mambo kwa kubula nangwa kuzhinauka ne, kikafika. Kechi kikakelwa ne!” (Ha. 2:3) Nanchi byambo byaambile Lesa byafwainwe kukwashatu Habakuka nyi? Nanchi bino byambo byakonsha kwitukwasha ne atweba nyi? Yehoba waambijile mutumwa Paulo kubuula bena Kilishitu bino byambo batengejilenga ntanda ipya. (Tangai Bahebelu 10:36, 37.) Onkao mambo, inge tubena kulanguluka’mba mulaye wa Yehoba wa kwitupokolola wabanda kufika, twafwainwa kushiinwa’mba “kwa kubula nangwa kuzhinauka ne, kikafika. Kechi kikakelwa ne!”

17. Nyenga umo walondejile byepi lujimo Yehoba lo ajimwineko Habakuka?

¹⁷ Bantu ba Yehoba bavula batwajijila kulondela luno lujimuno lwa kuba’mba “wikitengelenga.” Bamo bauba bino myaka yavula bingi. Ba Louise batatwile kwingijila Yehoba mu 1939, baambile’mba: “Pa kyokya kimye nalangulukanga’mba Amagedonyi ikeya saka nkyangye kupwisha sukulu. Bino kino kechi kyamwekele ne. Kintu kyankwasha kutengela mulaye wa Yehoba myaka yavula yapitapo ke kutanga mashimikila a mu Baibolo aamba pa bantu ba Yehoba batengejilenga kufika kwa milaye yanji nabiji Nowa, Abalahama, Yosefwa ne bakwabotu batengejilenga milaye ya Yehoba myaka yavula bingi. Kuketekela mu milaye ya Yehoba kuba’mba ikafika kwankwasha amiwa ne bakwetu kushiinwa’mba ntanda ipya ijitu pepi kufika.” Bakwabo baingijila Yehoba myaka yavula baswa kino kishinka.

18. Kulanguluka pa bilengwa kwakonsha kukosesha byepi lwitabilo lwetu mu ntanda ipya?

¹⁸ Kya kine kuba’mba ntanda ipya ikyangye kufika. Nangwa byonkabyo, langulukai pa bintu bimo bijiko nabiji tubangabanga, bichi, banyama ne bakwenutu bantu. Bonse bakonsha kuswa’mba bino bintu kine ko biji nangwa kya kuba pa kimye kimo kechi byajingako ne. Bino bintu biji konka mambo Yehoba wibilengele. (Ntendekelo 1:1, 26, 27) Kabiji Lesa wetu witulaya’mba nkalula ino ntanda kwikala ke ipya. Ukafikizha mulaye wanji. Mu ntanda ipya bantu bakekala na butuntulu bwa mubiji bwawama myaka ne myaka. Twafwainwa kushiinwa’mba ntanda ipya ikafika pa kimye Lesa mwine kyo atongola.—Isa. 65:17; Lum. 21:3, 4.

19. Ñanyi bintu byo mwafwainwa kuba pa kuba’mba mukoseshe lwitabilo lwenu?

¹⁹ Ano moba mwafwainwa kubanga bintu byakonsha kukosesha lwitabilo lwenu. Sanchilainga Yehoba pa bukuzhi. Langulukainga pa bulume bwa Yehoba. Ubainga bintu byakonsha kwimulengela kufwenya kwipi ne Yehoba. Inge mwauba bino, mukekala pa “boba baswana bintu byo alayile Lesa na mambo a lwitabilo ne na butekanye bwabo.”—Hebe. 6:11, 12; Loma 5:5.