Nanchi Mukivuluka Nyi?

Nanchi mwatanga Byamba bya Usopa bya uno mwaka nyi? Monai inge mwakonsha kukumbula ano mepuzho:

‘Kupimpula milanguluko yenu’ kulumbulula ka? (Loma 12:2)

Kino kechi kibena kulumbulula’mba twafwainwa kubatu bintu bicheche byawama ne. Bino twafwainwa kulangulukanga ne pa byubilo byo tuji nabyo ne kupimpulako pa kuba’mba tulondelenga mikambizho ya Yehoba.​—w23.01, ma. 8-9.

Ñanyi bintu byo twafwainwa kuchinuzhuka inge tubena kwamba pa bintu bibena kumweka mu ntanda?

Tutako muchima ku bintu bibena kumweka mu ntanda bibena kufikizha bungauzhi. Kechi twafwainwa kusopolelenga bintu ne, pakuba twafwainwa kuyuka byaambapo jibumba ja Yehoba. Inge mu misambo yetu saka twamba biji mu mabuku etu, tukwasha kipwilo kwikala kyakwatankana. (1 Ko. 1:10)​—w23.02, ji. 16.

Lubatizhilo lwa kwa Yesu lwapusana byepi na lwa baana banji ba bwanga?

Yesu kechi wafwainwe kwipana kwi Yehoba ne, mambo wasemekejilwe mu kisaka kya bantu bepaine kwi Lesa. Kechi wafwainwe kulapila nangwa kulomba’mba Lesa atokeshe jiwi janji ja mu muchima ne, mambo wajinga walumbuluka kabiji kechi walengelepo mambo ne.​—w23.03, ji. 5.

Ñanyi bintu byo twafwainwa kuba pa kuba’mba bonse bakumbulepo?

Twafwainwa kukumbula mu byambo bicheche pa kuba’mba bavula bakumbulepo. Nangwatu mu mukumbu wetu mwipi kechi twafwainwa kwamba pa bishinka byavula ne. Kuba bino kukalengela bakwetu nabo kukumbulapo.​—w23.04, ji. 23.

“Mukwakwa wazhila” ye baambapo pa Isaya 35:8 ulumbulula ka?

Uno mukwakwa wa kifwanyikizho patanshi ulumbulula jishinda jaingijishe Bayudea pa kufuma ku Babilona kuya ku kyalo kyabo. Nga mu ano moba wimenako ka? Myaka yavula yapichilepo mwaka wa 1919 saka akyangye kufika, banengezhezhenga mwingilo wa kutuntulula ne kupulinta ma Baibolo ne bintutu bikwabo. Bantu ba Lesa babena kwenda mu “mukwakwa wazhila” mo babena kupopwela Yehoba kabiji uno mukwakwa wibatwala ku mapesho a Bufumu.​—w23.05, ma. 15-19.

Ñanyi banabakazhi ba kifwanyikizho bo baambapo mu Byambo bya Maana kitango 9?

Kinembelo kya Byambo bya Maana kyaamba pa “mwanamukazhi wabula maana” utwala bantu ku kilende ne mwanamukazhi wimenako “maana a kine,” utwala bantu mu “jishinda ja milangwe” ne ku bumi. (Maana 9:1, 6, 13, 18)​—w23.06, ma. 22-24.

Lesa wamwesheshe byepi kwipelula ne kifyele pa kwisamba ne Lota?

Yehoba waambijile Lota kufuma mu Sodoma ne kunyemena ku mpunzha ya mitumba. Lota byo aambijile Lesa kuba’mba ukeba kunyemena mu muzhi mucheche wa Zoala, wamuswishishe.​—w23.07, ji. 21.

Ñanyi bintu byafwainwa kuba mwanamukazhi inge mwatawanji watamba bipikichala bya mulekese?

Wafwainwa kuvulukanga’mba aye kechi ye walengela ne. Wafwainwa kutwajijila kuba bintu bikosesha bulunda bwanji ne Lesa ne kulanguluka languluka pa mashimikila a mu Baibolo aamba pa banabakazhi bajinga na makatazho Lesa bo atekeneshe. Kabiji wakonsha kukwasha mwatawanji kuchinuzhukanga bintu byakonsha kumulengela kutambanga bya mulekese.​—w23.08, ma. 14-17.

Maana akonsha kwitukwasha byepi kwikala bakooka muchima inge betwipuzha pa byo twaitabilamo?

Mepuzho o betwipuzha akonsha kwitukwasha kuyuka bibena kulanguluka muntu nangwa bintu byo atapo muchima. Kino kyo kiketulengela kukumbula saka twakooka muchima.​—w23.09, ji. 17.

Ñanyi bintu byo twafwainwa kufunjilako kwi Maliya byakonsha kwitukosesha?

Maliya byo ayukile’mba ukekala inanji Mesiasa, wakosele mambo bamutundaikile ku bakwabo. Ngabaliela ne Elisabeta batundaikile Maliya kwingijisha Binembelo. Ne atweba, bena Kilishitu bakwetu bakonsha kwitukosesha.​—w23.10, ji. 15.

Yehoba wakonsha kukumbula byepi milombelo yetu?

Witulaya kukumbula milombelo yetu kabiji pa kukumbula ulanguluka pa kyaswa muchima wanji. (Yele. 29:12) Bantu bavula bakonsha kulomba pa kintutu kimo. Pano bino Lesa wakonsha kukumbwila mu mashinda apusana. Nangwa byonkabyo, uketukwashanga kimye kyonse.​—w23.11, ma. 21-22.

Loma 5:2 waamba pa “luketekelo,” pano mambo ka o aambilapo jikwabo mu kyepelo 4?

Umvwe muntu waumvwa mambo awama wakonsha kuketekela’mba ukekala na bumi bwa myaka ne myaka mu paladisa pano pa ntanda. Pano bino inge ubena kupita mu makatazho, wiachinchika kabiji wayuka’mba Lesa ubena kumubila bibusa, luketekelo lwanji lukoselako kabiji wilunemeka bingi.​—w23.12, ma. 12-13.