Ingijishainga ‘bya Bupe Byenu bya Mupashi’

Atweba bonse tutundaikwa bingi inge tuji na balongo ne banyenga ba bwina Kilishitu. Bino kuji bintu bikwabo byo twafwainwa kuba, kechi kutanwatu nabo ne. Baibolo waamba pa byo tuba pa kukosesha lwitabilo lwa bakwetu amba twibapa “bya bupe bya mupashi.” (Loma 1:11, 12) Twakonsha kuba byepi bino?

Tundaikainga bakwenu na byo mwamba. Nabiji pa kukumbulapo pa kupwila, kechi twafwainwa kukizhamo kwamba pa byo twayuka nangwa pa bwikalo bwetu ne. Pakuba twafwainwa kwamba pa byo twafunjilako pe Yehoba, pa Baibolo ne ku bakalume banji bakishinka. Pa kwisamba na balongo ne banyenga, twafwainwa kwambanga pa bintu byakonsha kukosesha lwitabilo lwabo.

Tundaikainga bakwenu na byo mufuukula ne na byo muba. Nabiji bamo bafuukulapo kutwajijila mu mwingilo wa kimye kyonse nangwa kya kuba babena kupita mu makatazho. Bakwabo bafuukulapo kutanwa jonse ku kupwila kwa mukachi ka mulungu nangwa kya kuba bapayankana bingi na nkito nangwa bakolwa kikola kibula kupwa.

Nanchi byo muba ne byo mwamba bitundaika balongo ne banyenga nyi? Nanchi mumona byuba ne byamba balongo ne banyenga byakonsha kwimutundaika nyi?