Bantu 22 Bafuminemo mu Chechi

BA GERMAN GOMERA bo baita mukala pa baana 11. Bashabo, kolojabo ne nkasabo, bonse babakazhi byo bafwile, bainabo abo ba Luisa bavilukijile ku taunyi pamo na kisemi kyabo. Byo bafikile kokwa, batendekele kuya mu Chechi wa Mennonite, bamwisho yabo ne bisemi byabo nabo batendekele kuya mu yenka uno chechi.

Ba German bashimikizha’mba: “Mu 1962 balume ne bakazhi bapainiya beikajila bafikile mu uno taunyi mo twaikalanga. Bantu baambilenga kuba’mba bano bapainiya babena kutwala bantu mungi na ‘mafunjisho abo atama.’ Pano bino, bano balume ne bakazhi byo bafikile pa nzubo ya ba Piña bebaswishishe kutwela mu nzubo. Kisemi kya ba Piña kyabayile bingi. Baumvwine bingi bulongo pa kumona byubilo byawama bya bano bapainiya, onkao mambo, batelekele ku mwisambo ye baendejile. Kyafuminemo, kisemi kya ba Piña ne bakolojami babakazhi basatu batendekele kufunda Baibolo.

Ba German batwajijila’mba: “Juba jimo Bakamonyi byo baishile na kufwakesha kisemi kya ba Piña, ne ba Mama bebechile kuba’mba bomvweko. Batangile binembelo bya mu Baibolo byaamba pa luketekelo lwa kwikala myaka ne myaka pano pa ntanda. Ba Mama baipwizhe’mba, ‘Pano mambo ka o bambila mu chechi mo ngya kuba’mba tukaya mwiulu?’ Mulongo byo ebakumbwile mukumbu wa mu Baibolo ne kulumbulula byaamba Binembelo pa lusanguko lwa pano pa ntanda, ba Mama baumvwine bingi bulongo kabiji batendekele kubulako bakwabo bintu byo bafunjile.

“Bapashita ba mu Chechi ya Mennonite byo bayukile kuba’mba bantu baya mu chechi wabo babena kufunda na Bakamonyi ba kwa Yehoba, baesekele kuba’mba bebalekeshe. Baubile bino kupichila mu kwibakajipila ne kwibazakamisha. Ba Maximina, bainabo ba Piña baambijile bano bakulumpe ba chechi amba, ‘Amiwa kechi ne lukeke ne, nakoma kabiji nafwainwa kwifukwila bintu amiwa mwine.’

Ba German baambile’mba: “Kyapeleleko, bantu 22 bafuminemo mu Chechi wa Mennonite ne kutendeka kutanwa ku kupwila kwaikelanga mu nzubo ya kusonkela. Ba Mama babatizhiwe mu 1965, kabiji byo papichile myaka ina ne amiwa nabatizhiwe mu 1969 saka nji na myaka ya kusemwa 13.”