Yehoba Washinkula Michima ya Bavula

NABATIZHIWE kimye kyo nafunjilenga bya mizhilo pa sukulu mukatampe panyumatu ya kupitapo nobe ñondo umo kufuma po baipaijile Trujillo mu 1961. Batata bakebelenga’mba nkekale shabyambo, bino namwene buwame bwa kufunda pe Lesa. Nafuminepo pa sukulu mukatampe nangwa kya kuba batata bakebelenga kuba’mba ntwajijile. Byo papichiletu moba acheche, batongwele kwikala painiya wiikajila.

Mpunzha imo konayile na kwingijila ke ku La Vega. Ku ino mpunzha kwavula bingi Bakatolika kufumatu ne kala. Kimye kyo najinga kokwa, kafwakotu nangwa umo wafunjile bukine ne. Kimye kyo naambanga majashi avula bantu, kwatanwangatu muntu umo, mukwetu mo twaingijilanga bupainiya. Nangwa byonkabyo, Yehoba wankwashishe kutwajijila kupichila mu lufunjisho lwa pa bunke lwa Baibolo, kutanwa ku kubuñana ne milombelo ya panshi ya muchima. Nalombanga kwi Yehoba kuba’mba mu La Vega mukekalepo kipwilo. Nji bingi na lusekelo, mambo lelo jino muji bipwilo 14 ne Mazubo a Bufumu atanu na imo, kabiji muji basapwishi ba Bufumu kukila pa 800.

Nasongwele ba Ángela mu 1965, kabiji betwichile ku Betele mu 1981. Byo nabatizhiwe mu kino kyalo mwajingatu basapwishi 681. Lelo jino basapwishi bakila pa 36,000 kabiji bantu bavula bashinkwako ku kupwila kwetu kukatampe. Umvwe navuluka bintu byo byajinga kala, nkumya bingi pa kumona Yehoba byo ashinkula michima ya bantu bavula pa kuba’mba bafunde bukine bwa mu Baibolo.