Kutengela Byawama

Baji na Byubilo Byawama

Bakamonyi ba kwa Yehoba baikala mu kyalo kya Dominican Republic myaka kukila pa 70. Pa myaka yonse yo baikala mu kino kyalo balenga jizhina jawama bingi. Javula basapwishi inge baji mu mwingilo bebasolomoka ku bantu ne kwibalomba mabuku, kabiji bantu mu nyaunda batemwa kwamba byambo bya kuba’mba: “Abwe bupopweshi bwawama bingi,” nangwa amba, “Anweba bantu mulondela byaamba Baibolo mu bwikalo bwenu.”

Akyumvwai kyamwekele kimye kyo bashimikile Nzubo ya Bufumu pa mpunzha yapaine mulongo umo. Uno mulongo byo ayile na kunembesha yoya mpunzha, wataine kuba’mba muntu mukwabo waingijisha bujimbijimbi ne kunembesha ino mpunzha kuba’mba yanji kabiji uno muntu wapelemo mambo uno mulongo a kuba’mba ubena kukeba kumwangata mpunzha. Ano mambo beatwajile ku kochi. Ano mambo akatezhe bingi, mambo uno muntu wajinga na bipepala byamwesheshenga kuba’mba aya mpunzha yajinga yanji.

Kimye kyo baambilenga ano mambo, mutonyi waipwizhe shabyambo wa uno mulongo kuba’mba ambe ye aimenejilengako. Uno shabyambo byo alumbulwile kuba’mba ubena kwimenako kipamo kingijisha Bakamonyi ba kwa Yehoba, mutonyi wakumbwile’mba: “Inge kiji bino, ko kuba’mba kechi twakonsha kuzhinauka ano mambo ne. Nebayuka Bakamonyi ba kwa Yehoba, kabiji nayuka kuba’mba ke bantu bakishinka. Kechi bakonsha kuja bya lunkanankana ne kusenda bintu byabula byabo ne.”

Byo baletele bishiino ku kochi, kyamwekeshetu patoka kuba’mba uno muntu waingijisha bipepala bya bubela, onkao mambo, mutonyi wabingishe Bakamonyi. Shabyambo Kamonyi waambile’mba: “Kino kechi kyo kimye kitanshi po kyamweka kintu kya uno mutundu ne, mu bije byavula mu kino kyalo, Bakamonyi ba kwa Yehoba bebanemeka bingi.”

Kimye kya Kulutwe

Kechi twayuka bantu batemwa bololoke bakafunda bukine bwa mu Baibolo ne kwikala bapopweshi ba Lesa wa kine ne. Bino pa kino kimye tusakutwajijila kwibikako kusapwila bantu ba uno mutundu. Mu 2013, Bakamonyi ba kwa Yehoba mu Dominican Republic baingijile maola kukila pa 11 milyonyi mu mwingilo wa kusapwila, kabiji bantu bo bafunjishenga Baibolo bajinga 71,922. Kabiji kyawamine bingi pa kumona bantu 9,776 baingijileko mwingilo wa bupainiya. Mu August mu yenka uno mwaka, balongo ne banyenga 35,331 baingijile bingi mu mwingilo wa kusapwila. Kabiji kyamwekeshatu patoka kuba’mba bantu bakavujilako bingi mambo batainwe ku Kivuluko bajinga 127,716.

Mwingilo wa kusapwila ne kufunjisha bantu kwikala baana ba bwanga mu Dominican Republic watendekele kala. Watendekele pa Mulungu mu April mu 1945, kimye kitanshi kyafikile ba Lennart Johnson ne ba Virginia mu kino kyalo ne kutendeka kusapwila mambo awama a Bufumu. Bakamonyi ba kwa Yehoba mu Dominican Republic banemeka bingi buno buswanyi bwabo bwa ku mupashi. Kabiji banemeka bingi bapopweshi bakine batanshi pa kwipana kwabo ne kuchinchika kwabo. Bino kyakilapo kunema, banemeka bingi mwingilo ye baji nanji wa “kushimuna bulongo mambo a Bufumu bwa Lesa.” (Byubilo 28:23) Babena kutengela kimye bonse pa jino jikuji kubikapotu ne bapopweshi bakwabo mwaya ntanda yonse kyo bakakwatankena pamo ne kwimba’mba: Yehoba waikala Mfumu! Ntanda isangalale. Makuji avula asekele.”​—Salamo 97:⁠1.