Kitentashi Kyaubiwe mu Kyalo kya Haiti

Mwingilo Wanungulukile mu Mulaka wa Kichainizi

Mu 2005, musampi watongwele ba Tin Wa Ng baamba Kichainizi baingijilanga pa Betele kwikala bapainiya beikajila bakusapwila bantu bamba mulaka wa Kichainizi bavula bekala mu kino kyalo. Basemekejilwe ne kukomena mu kyalo kya Dominican Republic. Bansemi babo bafumine ku China ne kuya ku Santo Domingo.

Pa 1 January, mu 2008, mu Santo Domingo mwalengelwe kipwilo kya Mandarin Chinese, kabiji mu 2011, kwalengelwe jibumba mu Santiago. Basapwishi 70, kubikapo ne bapainiya ba kimye kyonse 36 ne bapainiya bakukwasha bavula, baingijile bingi na ngovu ne kufunjisha mafunjisho a Baibolo 76 pa ñondo pa ñondo.

Kukeba Baana ba Bwanga Bamba Mulaka wa Kizungu

Mu 2007, kwajinga basapwishi 27,466 baingijilenga mwingilo mu bipwilo 376, kabiji bafunjishanga mafunjisho a Baibolo 49,795. Nangwa kya kuba kwajinga bantu bamo baambanga mulaka wa Kizungu, bino kechi kwajingapo kipwilo mu kizungu ne. Onkao mambo, mu April mu 2008, musampi watumine bamishonale ba Donald Elwell ne ba Jayne kuya na kulenga jibumba ja Kizungu mu Santo Domingo. Kano ka jibumba kacheche ka basapwishi bajinga bingi na kizaku bakebelekebele ne kuyuka kwikala bantu bamba mulaka wa Kizungu. Kepo banengezhe nyaunda pa kuba’mba bengijilengamo bulongo.

Mu kwibikako kwabo mwafumine byawama bingi, balengele jibumba ja Kizungu mu Santo Domingo kabiji jatwajijile na kukoma, kabiji mu July mu 2009, kwalengelwe kipwilo mwajinga basapwishi 39. Abino byo byo baubile ne mu mapunzha akwabo mu kino kyalo. Mu November mu 2011, kwajinga bipwilo bitanu na bibiji bya Kizungu kabiji kwajinga ne jibumba jimo mu kino kyalo.

Mwanamukazhi Mpofu Washinka Matwi Watendeka Kwingijila Yehoba

Ba Lorys baana bakishale baji na kikola kishinkisha matwi, kileta bukamama, ne bumpofu. Basemekelwetu saka bashinka matwi kabiji batendekele kuleka kumona pachepache byo bafikizhe myaka ya kusemwa 16. Mute bamonangako pacheche, bino bufuku kechi bamonanga nangwa pachechetu ne. Jishinda jimo jo besambilangamo umvwe juba jazhika ke kwibakwata ku maboko pa kwibalumbulwila bintu.

Balume ne bakazhi bapainiya beikajila bamonañene ne ba Lorys byo bajinga na myaka 23. Pa kikye kimye basongwelwe ku mwanamulume washinka matwi kabiji bajinga ne na mwana wa mukazhi wajinga na mwaka umo. Ba Lorys baswile byo bebechile ku kupwila kabiji baumvwine bingi bulongo pa byo bafunjile.

Ba Lorys ponkapotu batendekele kupimpula bwikalo bwabo. Byo bafunjile kuba’mba kechi kyawama kwikala na uno mwanamulume kwa kubula kwisongola ne. Besambile na uno mwanamulume pa buneme bwa kunembesha masongola abo kabiji ne kumulumbulwila kuba’mba kechi basa kubula kulondela byaamba Baibolo ne. Na mambo a byambo byo baambile, uno mwanamulume waswile kwibasongola.

Byo besongwele, ba Lorys baikele basapwishi kabiji papichiletu moba acheche babatizhiwe. Mu kuya kwa moba, byo bafunjilenga na Bakamonyi, bafunjile Mulaka wa Kwamba na Maboko wa bena America (ASL). Kufumatu pa kyo kya kimye babena kukwasha mwanabo wa mukazhi kufunda uno mulaka wa kwamba na maboko kabiji babena kumufunjisha ne bukine.

Kitentanshi Kikatampe Kyapichile mu Haiti

Juba ja pa Kibiji pa 12 January mu 2010, ba mu kyalo kya Dominican Republic ne kya Haiti kechi bakejilubamo ne. Jino jo juba jo kwapichile kitentanshi kikatampe mu Haiti. Jibumba Jitangijila ja Bakamonyi ba kwa Yehoba jaswishishe musampi wa mu Dominican Republic kutuma mali ku musampi wa ku Haiti a bukwasho. Batumine mali avula anemene makilogalamu 127 ne kupa dokotala wa pa Betele Evan Batista kuba’mba ebatwajile.

Mulanguluko wa kutuma Mulongo Batista wawamine bingi, mambo byo afikile ku mupaka wa kino kyalo, bamubujile kuba’mba kwakebewenga dokotala wafikilamo wa kukwasha bantu. Bavula bekozhezhe bingi na mambo a kino kitentanshi bebatwajile ku Nzubo ya Kubuñenamo yajinga kwipi na musampi wa Haiti na kwibabuka. Balongo ba ku Haiti byo bayukile kuba’mba uno mulongo wajinga dokotala wa ku musampi, batumine foni ku musampi wa ku Dominican Republic ne kwipuzha inge Mulongo Batista wakonsha kutwajijila kwikala mu Haiti. Ne kya kine, bamuswishishe, kino kyalengejile kukwasha bingi balongo ba ku mupashi ba mu Haiti mu maola acheche panyuma ya kitentanshi.

Dipatimenti itala pa bya kupotapota pa musampi wa ku Dominican Republic ponkapotu batendekele kutuma kajo. Pa Kina pa 14 January, batumine makilogalamu 6,800 a mupunga ne nkunde ne kajo kakwabotu ku Haiti ku makya na kimye kya 02:30. Akano ko kajinga kajo katanshi kufuma mu kyalo kingi kufika ku mupaka wa kyo kya kyalo. Pa jonka jino juba, ba dokotala bakwabo basatu kufuma ku Dominican Republic baendele maola atanu na abiji kuya ku musampi wa Haiti. Bafikilenga mabanga ene, mu kifulo kya kuya ko bebanengezhejile kufikila, abo bayile kwajinga bantu bekozhezhe ne kwingila kufika pakachi ka bufuku. Juba jalondejilepo, ba dokotala bakwabo bana ne bamanase bafikile kufuma ku Dominican Republic. Kechi kyapelele kutumbula bantu mu tubishimikwa to balengeletu bukiji bukiji pa Nzubo ya Kubuñenamo ne. Bano ba mingilo 12 bakwashishe bantu bekozhezhe kukila pa 300 mu mulungu walondejilepo.

Pa juba pa juba batumanga bantu bekozhezhe bingi ku Dominican Republic na kwibabuka. Kimye kimo myotoka yatwalanga bya bukwasho mu Haiti, yo yatwalanga ne bantu bekozhezhe ku bipatela bya mu Dominican Republic. Musampi wanengezhe Mabumba a Bapempula Bakolwa mu Bipatela a kuya na kutundaika bekozhezhe ne kumona kuba’mba babena kutambula muchi ne bintutu bikwabo. Balongo ne banyenga ba mu bipwilo batambwilanga baletanga ba mu bisemi byabo bekozhezhe.

Bantu ba Yehoba bepaine baingijilenga bingi na ngovu panyuma ya kinkunkwila bafikizhe byambo byo tutanga mu Byambo bya Maana 17:17 bya kuba’mba: “Mulunda wa kine umwesha butemwe kimye kyonse, Kabiji ye mulongo ye wakonsha kuketekela mu kimye kya bya malwa.” Byamwekele bimwesha kuba’mba Yehoba waingijishe mupashi wanji ne bwanabwankazhi bwa bwina Kilishitu pa kukwasha bantu banji bakishinka nangwatu batalañene na lufu. Mwingilo wa kukwasha bajinga mu bya malwa watwajijile pa bañondo bavula balondejilepo. Bakamonyi ba kwa Yehoba bapaine bipe byavula byapotelwe na mali avula bingi, kubikapo ne bya kuja byo bajilepo bimye 400,000. Balongo ne banyenga 78 bashayuka ba bya michi baishile kufuma mwaya ntanda yonse ne kwipana kwingijisha kimye kyabo ne busendwe bwabo pamo na balongo ne banyenga bakwabo bepaine.a