Mwanamulume Waitabijile’mba Lesa Ufwako Waikala ke Kalume wa Lesa

BYO NAJINGA nsongwalume, nalefwilwe bingi na mambo a bintu byatama byubiwa mu bupopweshi. Kabiji kechi nayukile ene mambo Lesa o abujila kupwisha buyanji ne nshiji nangwa ene mambo bantu bavula baji mu bupopweshi kyo babujila kulondela byaamba Baibolo ne. Onkao mambo, nalekele kwitabila kuba’mba Lesa ko aji, napwishishe kuba’mba bumulwila ntanda bo bonkatu bwakonsha kuwamisha bintu mu ntanda.

Mu 1962, natendekele kutanga magazini wa Labainga! Kepo mu 1963 naswile kufunda Baibolo na Bakamonyi ba kwa Yehoba. Bintu byo nafunjilenga byamfikile bingi pa muchima. Nafunjile kuba’mba Lesa kechi ye ulengela bumbanzhi bubena kubiwa mu bupopweshi ne, kabiji nafunjile kuba’mba Lesa ukeba kubila bantu bintu byawama. Byo nafunjile pa bañondo babiji, natendekele kubuulako bantu kuba’mba Bufumu bwa Lesa bo bonkatu bukafumyapo bintu byatama pano pa ntanda ne kuleta bintu byawama. Nabatizhiwe mu 1964 kabiji bantongwele kwikala painiya wiikajila mu 1966. Inge naji nabujile kufunda bukine, inge nafwiletu kala, mambo bakwetu bavula mo twaubilanga milukuchi, bo napwanañananga nabo bafwile lufu lwatama bingi, bakwabo bebataile pakazhima, kabiji bakwabo banyemenemo mu kyalo. Namusanchila bingi Yehoba pa kunkwasha kupimpula bwikalo bwami, mambo kala kechi naitabijile mwi Lesa ne, kabiji bwikalo bwami bwajinga bwa kubula luketekelo. Pano luno ne kalume wa Lesa yenka walaya kuleta ntanda ipya ya bololoke.