Baibolo Upimpula Bwikalo bwa Bantu — BUTALA BWA MABUKU BWA PA INTANETI

Baibolo Upimpula Bwikalo bwa Bantu

NSONGWAKAZHI umo wabujile kutemwa kufunda pe Lesa kabiji wateletu muchima pa kufunda kwa ku mubiji waikele byepi na lusekelo mu bwikalo bwanji? Ñanyi bintu byafunjile nsongwalume umo wapwilanga mu chechi wa bakatolika pa kimweka inge muntu wafwa byamulengejile kupimpula byubilo byanji? Kabiji ñanyi bintu nsongwalume mukwabo walefwilwe bingi byo afunjile pe Lesa byamutundaikile kwikala wa mwingilo wa Lesa? Itangilai anweba bene byaamba bano bantu.

“Pa myaka yavula nazhinaukilenga bingi, mambo ka o twaikelako?’”—ROSALIND JOHN

MWAKA YE BASEMEKELWE: 1963

KYALO: BRITAIN

MWAPITA BWIKALO BWABO: NAFUNJILE BINGI

BWIKALO BWA KALA: Nasemekejilwe mu Croydon mu South London. Mu kisemi kyetu twasemekelwe baana batanu na bana, amiwa yami wa butanu na bumo. Bansemi bami bafumine ku jikuji ja Caribbean ja ku St. Vincent. Bamama bayanga ku chechi wa Methodist. Amiwa kechi nakebelenga kufunda pe Lesa ne. Pano bino, najinga bingi na muchima wa kukeba kuyuka bintu. Inge twashinka sukulu, moba onse nayanga na kukayila ku kizhiba saka nasenda mabuku apusana pusana a kutanga o nalombanga ku sukulu.

Byo napwishishetu sukulu, nakebeshe bingi kukwasha bantu bakajilwa. Natendekele kukwasha bantu babula mwa kwikala, bilema ne babula kwamba. Nafuukwilepo kuya ku sukulu mukatampe na kufunda bya kulama bantu bakolwa. Byo napwishishe uno sukulu, bampeele bifulo bikatampe byavula. Akino kyandengejile kwikala na bintu byavula bya kwitobwela. Amiwa neingijilangatu amiwa mwine ne kukeba bya kukebakeba. Onkao mambo, bintu byo nakebelengatu bya kwingijisha ke kompyuta pa kuba’mba ngyenga pa intaneti. Naendanga bingi kuya ku byalo bingi, naikalanga mu hotela ye natemenwe bingi. Natemenwe byo balamanga ino mpunzha kabiji nakayilanga ne mu bibamba mwa kukoseshesha mubiji. Nalangulukilenga’mba mbena kwikalatu bulongo. Pano bino, nalubileko kuta muchima bantu bayanji.

BAIBOLO BYO APIMPWILE BWIKALO BWAMI: Pa myaka yavula, nazhinaukilenga namba: ‘Mambo ka o twaikelako kabiji Lesa witulengejile ka?’ Nangwa byonkabyo, kechi nakebele kutaana mikumbu mu Baibolo ne. Juba jimo mu 1999, nkasami wamukazhi aye Margaret wajinga Kamonyi wa kwa Yehoba, wamfwakashijile pamo na mulunda nanji Kamonyi. Uno mulunda nanji wantele bingi muchima. Naswile kutendeka kufunda Baibolo na mulunda wa nkasami wamukazhi. Pano bino, kechi nayijilengako palutwe ne, mambo mingilo yo naingilanga yampwishishanga bingi kimye.

Mu mwaka wa 2002, navilukijile ku southwest England. Byo nafikile kokwa, natendekele kufunda jikwabo kuba’mba ngikale na digili mu bya kukebakeba na mulanguluko wa kuba’mba nkatambule kitupa kya budokotala. Amiwa ne mwanami wamulume twatendekele kuya na kupwila kimye kyonse pa Nzubo ya Bufumu. Nangwa natemenwe bintu byo nafunjile pa sukulu mukatampe, kufunda Baibolo kwankwashishe kumvwisha makatazho a mu bwikalo ne kuyuka mwa kwiapwishisha. Pano po po naumvwishishe byambo biji pa Mateo 6:24 byaamba kuba’mba kechi wakonsha kwingijila bankambo babiji ne. Muntu wafwainwa kusalapo umo wa kwingijila kana Lesa nyi, inyi kana kukeba bunonshi. Abino byambo biji mu kinembelo, byankwashishe kulangulukapo pa bintu byo nanemeka mu bwikalo bwami.

Mwaka wapwa, natanwanga kimye kyonse na kajibumba ka Bakamonyi kapwijilanga lufunjisho lwa buku mu nzubo. Bafunjilenga mu buku wa kuba’mba Is There a Creator Who Cares About You?a Kutaanwa ku kuno kupwila kwankwashishe kushiinwa’mba kujitu Mulenga umo aye Yehoba kabiji ye ujitu na bulume bwa kupwisha makatazho onse abena kupitamo bantu. Pakuba ku sukulu mukatampe, bamfunjishenga’mba kwikala bulongo kechi kwaimena pa kuketekela mwi Mulenga ne. Inge navuluka bintu byo bamfunjishanga byanzhingijishe bingi. Byo papichile bañondo babiji, nalekele kuya ku sukulu mukatampe ne kusalapo kwikalanga na kimye kyabaya kya kufwenya kwipi ne Lesa.

Kinembelo kya mu Baibolo kyankwashishe kupimpula byubilo byami kyajinga Byambo bya Maana 3:5, 6 paamba’mba: “Ketekela mwi Yehoba na muchima wobe yense, kabiji kange uketekele mu milangwe yobe ne. Saka umuvuluka mu bintu byonse byo uba, Ne aye ukakolwela mashinda obe.” Kufunda pe Lesa kwankwashishe bingi kukila bintu bya ku mubiji ne kuyukanyikwa’mba dokotala. Byo natwajijile kufunda pe Yehoba pa ene mambo o alengejile ino ntanda ne mwingilo waingijile Yesu wa kwitufwila, nakebeshe bingi kwipana ku Mulenga wetu. Nabatizhiwe mu April 2003. Kufumatu po nabatizhiwe, natendekele kupeezhako bwikalo bwami.

BINTU BYO NAMWENAMO: Kafwako kintu kyo nafwainwa kwesakanyako kuwama nabiji bulunda bwami ne Yehoba ne. Nji na mutende wa mu milanguluko ne lusekelo mambo namuyuka. Kabiji ntemwa bingi kupwanañana na bapopweshi ba Lesa ba kine.

Kukebesha kuyuka bintu kwabayilako bingi na mambo a bintu byo mfunda mu Baibolo ne ku kupwila kwa bena Kilishitu. Ntemwa bingi kubuulako bakwetu bintu byo naitabilamo. Mwingilo wa kusapwila ye waikala mwingilo wami mambo mo mo nkwashisha bantu kwikala bwikalo bwawama luno ne kwikala na luketekelo lwa bwikalo bwawama bwa kulutwe mu ntanda ipya. Kufumatu mu June 2008, mbena kwingila mwingilo wa kimye kyonse kabiji nji bingi na lusekelo ne kusekela na bintu byonkatu byo nji nabyo kukila byo najinga kala. Pano nayuka ene mambo o naikela na bumi kabiji kine namusanchila bingi Yehoba

“Aluno bwikalo bwami po po bwawama.”—IAN KING

MWAKA YE BASEMEKELWE: 1963

KYALO: ENGLAND

MWAPITA BWIKALO BWABO: BALEFWILWE BINGI

BWIKALO BWA KALA: Nasemekejilwe mu England. Byo nafikizhe myaka itanu na ibiji, kisemi kyetu kyavilukijile ku Australia. Atweba twaikejile pa jikuji ja Gold Coast mu Queensland, Australia mpunzha kwaiyanga bantu bavula bafumanga ku byalo bingi na kutamba bya kutambatamba. Nangwa kya kuba kisemi kyetu kechi twanonkele ne, kechi twakajilwanga ne.

Nangwa kya kuba bankomeshe bulongo, kechi najingapo na lusekelo mu bwikalo bwami ne. Nalefwilwe bingi. Batata bajinga bakitomi bene bene. Kechi nebatemenwe nangwa pachechetu ne. Batata nebashikilwe mambo batomanga bingi maalwa ne kuyanjisha bamama. Mu kuya kwa kimye, po po nayikile bintu byo bapichilemo byo bajinga bashilikale mu Malaya. Akino kyankwashishe kuyuka ene mambo o batomenanga bingi maalwa ne kuyanjisha bamama.

Amiwa natendekele kutoma maalwa saka nkijitu ku sukulu. Byo nafikizhe myaka 16, nalekele kuya ku sukulu ne kutwela nkito ya kwenda pa mema. Natendekele kupeepa jamba kabiji napeepanga bingi fwanka. Na mambo a kukizhamo kutoma maalwa, inge nabula kutomapo kechi nakasulukanga ne. Kimye kyonse natomangatu maalwa.

Byo nafikizhe myaka 20, natendekele kwiipuzha inge kya kuba Lesa ko aji. Neshikishenga namba: ‘Inge Lesa kine ko aji, mambo ka o aswishisha bantu na kuyanda?’ Nanembele ne buku mo napeelengamo Lesa mambo pa bintu byonse byatama bibena kumweka mu ntanda.

Nalekele nkito ya kwenda pa mema byo nafikizhe myaka 23. Byo nalekele ino nkito, naingijile mingilo yapusana pusana ne kuya ku byalo bingi pa mwaka umo. Nangwa byonkabyo, kafwako kyankwashishe ne. Kechi najingapo na muchima wa kukeba kubapo bintu byanema mu bwikalo bwami ne. Kafwako nangwa kintu kimo kyo natemenwepo ne. Kwikala na nzubo ya kyami kyami, kwikala na nkito ne kwikala mukulumpe pa nkito, abino byonse byajingatu byatutu kwi amiwa. Bintu “byantekeneshangatu” ke kutoma maalwa ne kuteleka ku nyimbo kwapwa.

Mbena kuvuluka kimye kyo naikele na lusekelo mu bwikalo bwami. Najinga mu Polanda byo nayile na kufwakesha kaleya kajinga mu Auschwitz. Natangile pa bintu byatama bingi byamwekele. Bino byo nafikileko ne kwimwena kubaya kwa uno kaleya, kyankolele bingi ku muchima. Kyampezhezhe bingi maana kumona muntu byo akanama na muntu mukwabo. Mbena kuvuluka byo napitañenenga mu uno kaleya najijilengatu ne kwiipuzha’mba, ‘mambo ka bantu o bobila bintu byatama bibye?’

BAIBOLO BYO APIMPWILE BWIKALO BWAMI: Mu 1993 byo nabwelele kufuma ku byalo bingi, natendekele kufunda Baibolo kuba’mba ntaane mikumbu. Kechi papichile ne kimye kyabaya ne, Bakamonyi ba kwa Yehoba babiji baishile pa nzubo yami kabiji bangichile kutaanwa ku kushonkena kwaikejile mu kibanza kya mpila. Naswile kuya na kutaanwako.

Pa bañondo bacheche bapichilepo, nayile na kutamba mpila mu kyonka kino kibanza. Bino byo nataainwe ku kushonkena namwene bintu byapusanako bingi. Bakamonyi bajinga na mushingi kabiji bavwajile bulongo. Baana babo nabo bajinga na byubilo byawama. Kabiji nakuminye bingi bintu byo namwene pachaile. Namwene Bakamonyi bavula bingi saka babena kuja pachaile saka baikala panshi mu kibanza. Bino byo babwelele pa bipona byabo, po bajiijilenga batolawile byonsetu byo balakeshe panshi. Kwambatu kine, abe bantu bonse basekejile mu bintu byo bajinga nabyo ne kwikala mu mutende. Abino byo bintu byo nakebeshanga bingi mu bwikalo bwami. Pa joja juba kechi mbena kuvulukapo jashi jo baambile ne, bino bintu byo mbena kuvulukakotu ke byubilo byawama bya Bakamonyi byo byanzakwile bingi muchima.

Mabanga navulukile muvyala wami watangile Baibolo ne kufunda pa bupopweshi bwapusana pusana byo buji. Kunyumakwe, wambuujile’mba Yesu waambile’mba ukayukila bupopweshi bwa kine ku bipangwa byabo. (Mateo 7:15-20) Nakebeshe bingi kuba’mba ngyuke kyalengela Bakamonyi kupusana bingi na bupopweshi bukwabo. Kino kyo kyajinga kimye kitanshi kukasuluka ne kwikala na luketekelo mu bintu bya kulutwe.

Mulungu walondejilepo, Bakamonyi ba kwa Yehoba babiji bangichile kutaanwa ku kushonkena baishile jikwabo pa nzubo pami. Bambuujile’mba bamfunjishenga Baibolo ne amiwa naswile. Natendekele kupwila pamo nabo.

Saka nkyangye kutendeka kufunda Baibolo, Lesa namulangulukilanga mungi. Bino byo natendekele kufunda Baibolo, milanguluko yami yaalukile na mo namumwenanga. Nafunjile kuba’mba Lesa kechi ye ulengela bubi ne kuyanda ne. Kabiji kimukola bingi ku muchima inge bantu ke bobe bintu byatama. (Ntendekelo 6:6; Salamo 78:40, 41) Kine, nebikisheko bingi kubula kuba bintu bifichisha Yehoba ku muchima. Nakebeshe bingi kumusangajikanga ku muchima. (Byambo bya Maana 27:11) Nalekele kutoma maalwa, kupeepa fwanka ne kuba bulalelale. Mu March 1994 nabatizhiwe kwikala Kamonyi wa kwa Yehoba.

BINTU BYO NAMWENAMO: Aluno nji bingi na lusekelo ne kusekela na bintu byonkatu byo nji nabyo. Kala pa kuba’mba mpwishe makatazho natomanga bingi maalwa, aluno nekileka kutoma maalwa. Pakuba nafunda kutwika Yehoba kisendwa kyami.—Salamo 55:22.

Pa myaka 10 yapitapo, naikala mu masongola na mukazhami Kamonyi wawama bingi wa jizhina ja Karen. Kabiji twashinda ne mwana wamukazhi aye Nella. Atweba bonse busatu bwetu twingijila pamo mu mwingilo wa kusapwila kukwasha bantu kufunda bukine bwaamba pe Lesa. Pano aluno bwikalo bwami po po bwawama.

[Tubyambo twa mushi]

a Wanemba Bakamonyi ba kwa Yehoba.

[Kipikichila]