BUTALA BWA MABUKU BWA PA INTANETI
Kyamba kya Usopa
BUTALA BWA PA INTANETI
Kikaonde
Pa kukebela
  • Bisopelo
  • BAIBOLO
  • MABUKU
  • KUPWILA
  • brwp110801
  • Baibolo Upimpula Bwikalo bwa Bantu

Vidyo ufwamo.

Yakana kushinkuka.

  • Baibolo Upimpula Bwikalo bwa Bantu
  • Kyamba kya Usopa: Baibolo Upimpula Bwikalo bwa Bantu
  • Byambo Bipashako
  • Baibolo Upimpula Bwikalo Bwa Bantu
    Kyamba kya Usopa—2012
  • Baibolo Upimpula Bwikalo bwa Bantu
    Kyamba kya Usopa: Baibolo Upimpula Bwikalo bwa Bantu
  • Baibolo Upimpula Bwikalo bwa Bantu
    Kyamba kya Usopa—2009
  • Baibolo Upimpula Bwikalo bwa Bantu
    Kyamba kya Usopa: Baibolo Upimpula Bwikalo bwa Bantu
Monai Bikwabo
Kyamba kya Usopa: Baibolo Upimpula Bwikalo bwa Bantu
brwp110801

Baibolo Upimpula Bwikalo bwa Bantu

“Pano luno nakasuluka naleka byonse byatama.”

—BYASHIMIKIZHA BA VICTORIA TONG

MWAKA YE BASEMEKELWE 1957

KYALO: AUSTRALIA

MWAPITA BWIKALO BWABO: NKOMENO YAMI YATAMINE BINGI

BWIKALO BWA KALA:Nakomejile mu Newcastle, New South Wales. Tuji baana 7 amiwa yami mubeji. Batata bakanamine bingi kabiji bajinga bakitomi. Bamama nabo bashinchile bingi. Bamama bampumanga bingi ne kunnena. Kimye kyonse bañambilanga’mba natama bingi kabiji bakansoka mu mujilo wa helo. Ino ñambilo yanchinyanga bingi.

Na mambo a kumpuma bingi ku bamama kyandengejile javula kubula kuyanga ku sukulu. Byo nafikizhe myaka 11, kafulumende wamfumishe ku bamama ne kutendeka kundama kabiji bantwajile mu kishimikwa kya bakatolika mo balamina balanda. Byo nafikizhe myaka 14, nanyemenemo mu kino kishimikwa. Kechi nakebelenga nangwa pachechetu kubwela ku nzubo kwa bamama ne. Amiwa natendekele kwikala mu mukwakwa utelwa’mba Kings Cross mu kyalo kya Sydney.

Byo naikalanga mu mukwakwa, natendekele kupeepa jamba, kutoma maalwa, kutamba bya mulekese ne kuba bulalelale. Kuji kintu kimo kyatama kyamwekele kyanchinyishe bingi. Naikalanga mu kibamba kya mu kishimikwa mutomena bantu maalwa. Juba jimo mabanga, banabalume babiji baishile na kumona mwina kino kishimikwa. Mwina kino kishimikwa wañambijile kuya mu kibamba mo nalaalanga, bino naumvwinenga byo besambilenga. Mwina kino kishimikwa wisambilenga na bano banabalume kuba’mba ampoteshe kwi abo. Bafuukwilepo’mba bakamfya mu bwato busenda bintu ne kuntwala ku Japana kuba’mba nkengijilenga mu kishimikwa mo bapotesha maalwa. Kino kintu kyampezhezhe bingi maana. Byo naumvwine bino, nalupukijile pa windo ne kunyema.

Nataaine mwanamulume wafwakashijile kyalo kya Sydney kabiji namulumbulwijile bintu byo napichilengamo. Amiwa nalangulukilenga’mba kampe uno mwanamulume usakumpapo mali. Pakuba aye wangichile kuya ku nzubo ko aikalanga pa kuba’mba ngoweko ne kujapo kajo. Ku ino nzubo kechi nafumineko ne. Byo papichiletu mwaka umo, twisongwele na uno mwanamulume.

BAIBOLO BYO APIMPWILE BWIKALO BWAMI: Byo natendekele kufunda Baibolo na Bakamonyi ba kwa Yehoba, natendekele kulanguluka pa bintu byavula bingi. Nazhingijile bingi byo nafunjile’mba Satana ye waleta bubi. Kufumatu ku bwanyike bwami bamfunjishe’mba Lesa ye witulengela’mba tuyandenga. Natemenwe bingi byo nafunjile’mba Lesa kechi umanyika bantu mu mujilo wa helo ne. Kyankolanga bingi ku muchima na luno lufunjisho lwa kuba’mba Lesa umanyika bantu mu mujilo wa helo.

Natemenwe bingi kumona Bakamonyi ba kwa Yehoba byo bengijisha mafunde a mu Baibolo mu bwikalo bwabo pa kufuukula bintu. Bakamonyi kechi bambatu pa kanwa’mba baji na lwitabilo ne, bino bengijisha bintu byo bafunda mu bwikalo bwabo. Amiwa nakatezhe bingi, bino nangwa naamba bintu biji byepi nangwa natamisha byepi, Bakamonyi bo bantemenwe bingi ne kunnemeka.

Lukatazho lwambayijile bingi, nemwenenga’mba kechi nanema ne. Neshikilwe bingi kabiji luno lukatazho lwangikele ku muchima pa myaka yavula bingi nangwatu byo nabatizhiwe kwikala Kamonyi wa kwa Yehoba. Nayukile’mba Yehoba namutemwa. Bino nashiinwe’mba Yehoba kuba watemwa muntu uji byo nji amiwa ne.

Bintu byaalukile mu bwikalo bwami byo papichile myaka 15 kufuma po nabatizhiwe. Mulongo umo byo aambilenga jashi mu Nzubo ya Bufumu ya Bakamonyi ba kwa Yehoba, waambile pa kinembelo kya Yakoba 1:23, 24. Abino byepelo byaesakanya Mambo a Lesa ku katajilo mo twakonsha kwimwena byonkatu Yehoba byo etumona. Natendekele kulangulukapo inge byo nemmona byapusana na bimmona Yehoba. Patanshitu nelengulwile bingi. Natwajijile kulanguluka’mba amiwa kechi nafikilemo kuba’mba Yehoba antemwe ne.

Byo papichiletu moba acheche, natangile kinembelo kyapimpwile byubilo byami byonsetu. Akino kyepelo kyajinga Isaya 1:18. Pa kino kinembelo, Yehoba mwine ubena kwamba’mba: “Anweba bantu, iyai twisambe kabiji nsakwimukwasha kwikala na bulunda bwawama ne amiwa. Nangwa kya kuba mambo enu achilatu ngee nobe mashi, akatokatu too nobe mabebe.” Byo napwishishe kutanga kino kinembelo, namwene’mba Yehoba ubena kwambila amiwa amba: “Iya twisambe Victoria, kabiji nsakukukwasha kwikala na bulunda bwawama ne amiwa. Amiwa nakuyuka, nayuka ne mambo o walenga kabiji nayuka muchima wobe kabiji na kutemwa bingi.”

Juba jo natangile kino kinembelo, bufuku nakankelwe kulaala. Nangwa byonkabyo, nazhinaukilenga’mba Yehoba wantemwa. Bino natendekele kulanguluka pa kitapisho kya kwa Yesu. Nobe mu kukopa kwa jiso, nashiinwe’mba Yehoba wantekenya bingi pa myaka yavula. Kabiji ubena kummwesha’mba wantemwa bingi. Kutendeka kuzhinauka kyajingatu nobe mbena kumwambila Yehoba amba: “Nakankalwa kuyuka ene mambo o mwantemenwa. Kitapisho kya Mwanenu nakyo kyakankalwa kunkwasha.” Kyajingatu nobe mbena kubwezhezha Yehoba kitapisho. Onkao mambo, byo natendekele kulanguluka languluka pa kino kitapisho kya kwa Yesu, namwene’mba Yehoba wantemwa bingi.

BINTU BYO NAMWENAMO: Pano luno nakasuluka naleka kuba bintu byonsetu byatama. Masongola ami awama bingi kabiji natemwa bingi kuba’mba nafwainwa kwingijisha bintu byo napichilemo kukwashishamo bakwetu. Kine, natwajijila kufwenya kwipi ne Yehoba.

    Mabuku a mu Kikaonde (1992-2025)
    Shinkai
    Shinkulai
    • Kikaonde
    • Tuminaiko Bakwenu
    • Byo Mukeba
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Shinkulai
    Tuminaiko Bakwenu