Baibolo Upimpula Bwikalo Bwa Bantu

KI KA kyalengejile mwanamulume umo kubwela mu bupopweshi mo akomejile mo apondokele? Kabiji nsongwalume umo wataine byepi Shanji ye atonganga mu bwikalo bwanji bonse? Tangai mwiumvwine byo beambila abo bene.

“Nakebeshe bingi kubwela kwi Yehoba.”—ELIE KHALIL

MWAKA WA KUSEMWA: 1976

KYALO: CYPRUS

MWAPITA BWIKALO BWANJI: MWANA WALUBILE

BWIKALO BWA KALA: Nasemenwe ku Cyprus bino nakomejile ku Australia. Bansemi bami Bakamonyi ba kwa Yehoba, kabiji bebikangako kunkwasha kutemwa Yehoba ne Mambo anji, Baibolo. Byo nakomeneko pacheche, nalekele kwibomvwina. Nabombokanga pa nzubo bufuku ne kuya na bakwetu. Twaibanga myotoka ne kutanwa javula mu makatazho.

Patanshi naubanga bino bintu mu bufyamfya kuchina kufichisha bansemi bami ku muchima. Pano ko kyakayanga moyo wapwile. Nechiine kala na bakulumpe babujile kutemwa Yehoba, bobanduwikile bingi. Kyapeleleko, bansemi ne babujile kuba’mba naleka kupwila. Baesekele kunkwasha na kifyele bino kechi nebomvwijile ne. Bansemi kibakolele bingi ku muchima.

Byo navilukile pa nzubo natendekele kupepa ne kupotesha bizhima kikatakata jamba. Naikele naka muchima kacheche. Umvwe bañambila nangwa banguba kyo mbula kukeba, nazhingilanga bukiji, javula napumananga ne kukajipila bantu. Naubanga bintu byonka byo nafunjile byafwainwa kubula kuba mwina Kilishitu.

BAIBOLO BYO APIMPWILE BWIKALO BWAMI: Nepapikile bingi na mulunda nami mo twapepelanga bizhima washajile mwana wakishale saka akijitu mwanyike. Twisambanga kufika ne pakachi ka bilo. Bufuku bumo watendekele kwamba pa byo atonganga bashanji. Mambo nayukile kufumatu ne bwanyike luketekelo lwa lusanguko, natendekele ku mubula’mba kulutwe na lwendo Yesu ukasangula bafwa. (Yoano 5:28, 29) Namwambijile’mba: “Fwanyikizha kuba’mba wamonañana ne bashobe. Atweba bonse twakonsha kwikala na bumi bwa myaka pano pa ntanda mu Paladisa.” Bino byambo byamufikile bingi pa muchima.

Pa bimye bimo, waambanga pa moba apelako ne pa Balesa Basatu. Natambulanga Baibolo wanji ne kumulumbulwila byaamba binembelo pe Yehoba Lesa, Yesu ne pa moba akupelako. (Yoano 14:28; 2 Timoti 3:1-5) Monka mu kwisamba javula pe Yehoba na uno mukwetu, ne amiwa natendekele kulangulukishapo pe Yehoba.

Pachepache, nkunwa ya bukine yajinga mu muchima yabyajile bansemi yatendekele kumena. Kimye kimo umvwe tuji pa kijiilo saka tubena kupepa bizhima na bakwetu, natendekanga kulanguluka pe Yehoba. Balunda nami babepekezhanga kutemwa Lesa, pano bino byubilo byabo byajingatu bingitu. Kupusanako nabo, nalangulukile byo nafwainwe kuba. Nakebelenga kubwela kwi Yehoba.

Kyapela kuyuka kyo wafwainwa kuba, pano bino kyakatazha kwikyuba. Bintu bimo byapela kwibileka, kechi kyankatezhe kuleka kupepa bizhima ne. Kabiji nalekele kukaya na balunda nami bakala ne kutendeka kufunda Baibolo na mukulumpe mu kipwilo kya bwina Kilishitu.

Nangwa byonkabyo, bimo byankatezhe kwibileka. Kyankatezhe bingi kuleka kuzhingila bukiji. Bimye bimo naesekangako kubula kuzhingila bukiji, pano bino bimye bimo nazhingilanga bukiji. Panyuma ya bino naumvwanga bingi bibi ku muchima. Ku muchima byo kwafichile, nasolomokele mukulumpe mu kipwilo wamfunjishanga Baibolo. Byo ajinga na muchima wa kifyele ne kutekanya, watundaikanga bingi. Kimye kimo twisambile pa kibaba kyajinga mu Kyamba kya Usopa kyaambilenga pa kwibikako.a Twisambile pa bya kuba inge nazhingila. Mu kuya kwa moba, na bukwasho bwa kino kibaba ne kulomba Yehoba kunkwasha, nafunjile bya kufoomona bukaji inge nazhingila. Mu April mu 2000 na batizhiwe ne kwikala Kamonyi wa kwa Yehoba. Bansemi batemenwe bingi.

BYO NAMWENAMO: Luno naikala bulongo kabiji nji ne na jiwi ja mu muchima jawama, mambo naleka kwibipisha na bizhima ne na bwikalo bwatama. Luno kwingila, kutanwa ku kupwila nangwa byakisangajimbwe byo nasalapo bindetela bingi lusekelo. Nji bingi na lusekelo mu bwikalo bwami.

Nsanchila bingi Yehoba mambo nji na bansemi babujile kuleka kunkwasha. Kabiji ndanguluka ne pa byambo bya kwa Yesu biji mu Yoano 6:44 byaamba’mba: “Kafwako muntu wakonsha kwiya kwi amiwa ne, poso Batata bantumine bamukokela ko nji.” Kuyuka kuba’mba nabwela kwi Yehoba mambo aye mwine wankokele kuntekenesha bingi.

“Natonganga Bingi Batata.”—MARCO ANTONIO ALVAREZ SOTO

MWAKA WA KUSEMWA: 1977

KYALO: CHILE

MWAPITA BWIKALO BWANJI: WAJINGA MU KIPANYI KYA BANYIMBI

BWIKALO BWA KALA: Bamama bo bakomeshe mu muzhi wa Punta Arenas, muzhi wawama uji kubwipi na musapa wa kalunga ka kukabeta ka bulenge bwa South America. Bansemi bekaine saka njitu na myaka itanu. Natonganga bingi batata.

Bamama bafundanga Baibolo na Bakamonyi ba kwa Yehoba, bansendanga ku kupwila kwa bwina Kilishitu ku Nzubo ya Bufumu. Nashikilwe bingi kupwila kabiji nayangatu na kujila mu jishinda ne byo nkafika. Byo nafikizhe myaka 13, nalekele kuya na kupwila.

Natemenwe bingi kwimba, kabiji naimbanga bingi bulongo. Byo nafikizhe myaka 15 natendekele kwimba mu kipanyi kya banyimbi pa bijiilo, mu bishimikwa bya maalwa ne mu mapunzha akwabotu. Kwenda pamo na banyimbi baya nkuwa ko kwandengejile kutendeka bunyimbi. Natendekele kufunda bunyimbi pa sukulu wa banyimbi mu yenkawa muzhi. Byo nafikizhe myaka 20, navilukijile mu muzhi mukatampe wa Santiago nakufunjilapo bikwabo bya bunyimbi. Natwajijile kwimba mu jino jibumba.

Pa kino kimye milanguluko ya kwilengulula yankatezhe bingi. Pa kuba’mba mpwishe ino milanguluko, natomanga maalwa ne kushetwa bingi kabiji napepanga bizhima na bakwetu mo twaimbilanga, kabiji ne bamonangatu nobe balongo bami. Bunsatuki bwamwekangatu ne pangye. Navwalanga bivwalo bifita, nalekele kutenda myevu, kabiji nsuki yami yakomene kya kuba yafikanga ne mu musana.

Muchima watama wandengelanga kwendatu na kulwa ne kukaswa. Juba jimo saka nashetwa nalukukile jibumba ja bapotesha bizhima betutetekanga na bakwetu. Bampumine kya kuba ba mokola ne mubanga.

Nangwa byonkabyo, bino kyangubile bakwetu kyo kyakijilemo kunkozha ku muchima. Juba jimo, naumvwine’mba mukambwe wami waenda na mulunda nami pa myaka yavula kabiji ne bakwetu bonse bayukile, bino kechi bambujile ne. Kyankolele bingi ku muchima.

Nabwelele ku Punta Arenas ko nafunjishanga nyimbo kabiji naimbanga kidali. Natwajijile kwimba ne kunemba nyimbo. Ko ko namwene nsongwakazhi walamba bingi, Sussan ye natendekele kwikala nanji pamo. Kimye kimo Sussan wataine kuba’mba bainanji baitabila mu Balesa Basatu pa kuba amiwa kechi byobyo naitabijile ne. Waipwizhe’mba: “Nanchi bukine bo bwepi?” Namubujile kuba’mba nayuka amba lufunjisho lwa Balesa Basatu lwa bubela pano bino kechi nakonsheshe kumulumbulwila kufuma mu Baibolo ne. Bino nayukile bakonsheshe kumulumbulwila. Namubujile kuba’mba Bakamonyi ba kwa Yehoba bo bakonsha kumulumbulwila bukine bwa mu Baibolo. Popo naubile kintu kyo nabujile kuba pa myaka yavula, nalombele Lesa kunkwasha.

Mu mobatu acheche, nasambakene mwanamulume ye nayukile, namwipwizhe inge Kamonyi wa kwa Yehoba. Nangwa kya kuba mwekelo yami yamulengejile kumvwa moyo, wambujile kwaikejile Nzubo ya Bufumu ne kimye kya kupwila. Nashiinwe’mba kino kyajinga kukumbulwa kwa milombelo yami. Byo nayile ku Nzubo ya Bufumu, naikejile ku kipona kya kunyuma mambo kechi nakebelenga bantu kummona ne. Nangwa byonkabyo, bamonanga byo natanwanga ku kupwila byo najinga mwanyike bangyukile. Batambwijile bingi bulongo ne kumpakachilamo kya kuba naumvwine kukasuluka. Kyajingatu nobe nabwela pa nzubo. Byo namwene bamfunjishanga Baibolo byo nakijinga mwanyike ne bambijile kuba’mba bamfunjishenga jikwabo.

BAIBOLO BYO APIMPWILE BWIKALO BWAMI: Juba jimo natangilenga Byambo bya Mana 27:11 byaamba’mba: ‘Mwanami, wikale wa maana, usangajike muchima wami.’ Natemenwe bingi byo nayukile kuba’mba muntu wakonsha kusangajika muchima wa Mulenga walengele bintu byonse. Bino byambo byandengejile kuyuka’mba Yehoba bo Batata bo natonganga mu bwikalo bwami bonse.

Nakebeshanga kutokesha Tata wa mwiulu ku muchima ne kuba kyaswa muchima wanji, bino bizhima ne maalwa byantekele buzha pa myaka yavula. Naumvwishishe byambo bya kwa Yesu biji pa Mateo 6:24 byaamba’mba: “Kafwako muntu wakonsha kwingijila bankambo babiji.” Byo nebikilengako kupimpula bwikalo bwami, kishinka kiji pa 1 Kolinda 15:33 kyankwashishe bingi kya kuba’mba: “Kupwanañana na babi konauna byubilo byawama.” Namwene kuba’mba kechi nakonsheshe kuleka byubilo byatama inge kya kuba natwajijile kuya ku mapunzha a maalwa ne kutwajijila kupwanañana na bantu babyubilo byatama ne. Lujimuno lwa mu Baibolo lwankwashishe bingi: Nafwainwe kwibikako kusankilapo byandengejilenga kwituntula.—Mateo 5:30.

Natemenwe nyimbo, kino kyandengejile kwiileka kunkatazha. Bakwetu ba mu kipwilo bankwashishe kwiisankilapo. Nalekele kutoma maalwa ne kupepa bizhima. Natendele nsuki, ne bwevu kabiji nalekele ne kuvwala bivwalo bifita. Byo nabujile Sussan kuba’mba mbena kukeba kutenda nsuki, waumvwine bingi bulongo. Waambile’mba: “Tubena kuya bonse nkamone byubiwa ku Nzubo ya Bufumu.” Byo akamwene kokwa byamusangajikile bingi kabiji watendekele ne kufunda Baibolo. Palutwe kacheche twisongwele. Mu 2008, twabatizhiwe ne kwikala Bakamonyi ba kwa Yehoba. Natemwa bingi pa kukwatankana ne bamama kwingijila Yehoba.

BYO NAMWENAMO: Napokololwa ku lusekelo lwa bubela ne ku balunda babujimbijimbi. Nakitemwa nyimbo, pano bino nsalulula yo nafwainwa kutelekako. Ñingijisha byo napichilemo kukwasha bakilongo ne bakwabotu, kikatakata bakyanyike. Nkeba kwibakwasha kuyuka kuba’mba bintu bya mu ino ntanda byakonsha kumweka kuwama sabiji “binchatu.”—Filipai 3:8.

Luno nji balunda bakine mu kipwilo kya bwina Kilishitu muji mutende ne butemwe. Kabiji kyakilamo kuwama nafwenya kwipi ne Yehoba, kabiji natana Batata.

[Tubyambo twa mushi]

[Mabulañano pa peja 13]

“Nabwela kwi Yehoba mambo wankokele”