Baibolo Upimpula Bwikalo bwa Bantu
“Najinga shenyenye ku maalwa.”—LUKA ŠUC
MWAKA YE BASEMEKELWE: 1975
KYALO SLOVENIA
MWAPITA BWIKALO BWABO: NAJINGA KITOMI MWINE
BWIKALO BWA KALA: Nasemekejilwe mu muzhi wa Ljubljana muzhi mukatampe wa Slovenia. Najinga mwana wawama bingi kufikatu ne byo nafikizhe myaka ina. Kabiji batata bekujikile. Batata byo bafwile, bamama baingijilenga bingi na ngovu kuba’mba bamone mwa kwitulamina amiwa ne kolojami wamulume.
Byo nafikizhe myaka 15, nayile na kwikala na bankambo babakazhi. Natemenwe bingi kwikala na bankambo mambo balunda nami bavula baikalanga kwipi na mpunzha kwaikalanga bankambo. Kabiji naikele na luusa lwa kwiubila byonse byo nakebanga kukila ku nzubo ku bamama. Kabiji byo nafikizhe myaka 16, natendekele kupwanañana na bakwetu batomanga bingi maalwa pa kibelushi ne pa mulungu. Nalekele kutenda nsuki, navwalanga bivwala bansatuki kabiji mu kuya kwa moba natendekele kupeepa fwanka.
Nalekele kupeepa fwanka yense po apela. Pakuba kyankatezhe bingi kuleka kutoma maalwa, mambo nalangulukanga’mba maalwa o ankwashangako kusangalala. Patanshitu kechi natomanga avula ne. Mu kuya kwa kimye natendekele kutoma maalwa avula. Kabiji nayukile bingi kwibepekezha’mba kechi napendwa ne. Javula nangwatu natomatu maalwa acheche na mambo a bwema bwafumanga mu kanwa kami kyamwekanga’mba natoma maalwa. Nangwa byonkabyo, kafwako bayukanga’mba natoma maalwa apusana pusana kabiji napendwa ne.
Amiwa ne bakwetu inge twapendwa, bimye byavula yami nebakwatanga ku maboko inge tubena kufuma bufuku mu kishimikwa mo bajizhizha nyimbo ne kuzha. Amiwa nakosele bingi ku maalwa. Juba jimo, naumvwine mukwetu saka amba’mba amiwa ne shenyenye ku maalwa. Ino ke ñambilo ya mukeyu mu mulaka wa Slovenia yo bengijisha ku muntu utoma maalwa avula kukila bakwabo. Ino ñambilo yankozhezhe bingi ku muchima.
Natendekele kulanguluka pa byo naubilenga mu bwikalo bwami. Nezhachishenga bingi ne kwimona’mba kechi nanema ne. Kyamwesheshetu patoka kuba’mba bintu byo naubilenga mu bwikalo bwami kechi byawamine nangwa pachechetu ne.
BAIBOLO BYO APIMPWILE BWIKALO BWAMI: Namwene mukwetu umo mo twafunjilanga sukulu wapimpula byubilo byanji. Kabiji wawamine bingi muchima ne kwikala na lusa. Byo nakebeshe kuyuka kintu kyamukwashishe kupimpula byubilo byanji, namwichile mu kishimikwa mwa kujiila. Byo twisambilenga, wambuujile’mba watendekele kufunda Baibolo na Bakamonyi ba kwa Yehoba. Wambuujileko bintu bimo byo afunjilenga. Bintu byonse byo ambuujile kechi nebiyukilepo ne, mambo amiwa kechi pajingapo wankwashishe kufumatu ku bwanyike bwami kufunda pe Lesa ne. Natendekele kutaanwa ku kupwila kwa Bakamonyi kabiji bafunjishenga Baibolo.
Kufunda Baibolo kwankwashishe bingi kuyuka bukine. Nafunjile kuba’mba tubena kwikala mu kimye Baibolo kyo atongola’mba “moba a kupelako.” (2 Timoti 3:1-5) Kabiji nafunjile ne kuba’mba katatakatu Lesa akonaune bantu batama pano pa ntanda ne kulengela bantu bawama kwikala na bumi bwa myaka ne myaka mu paladisa. (Salamo 37:29) Bintu byo nafunjile byandengejile kwibikako bingi kuleka byubilo byami byonse byatama pa kuba’mba nkekale pa bantu bawama.
Natendekele kubuulako bakwetu bukine bo nafunjilenga mu Baibolo. Bavula bansekanga pa bintu byo nebabuujilenga. Pano bino, kunseka kwankwashishe mu mashinda avula bingi. Byo bakainenga kwibasapwila, kwankwashishe kwibayuka’mba kechi balunda ba kine ne. Po po nayukile kuba’mba kutoma maalwa ko kwandengejile kwikala na balunda batama. Mambo abo bapembelelangatu’mba juba ja pa kibelushi ne pa mulungu jifike bakaye na kutoma maalwa.
Nalekele kupwanañana na balunda nami kabiji natendekele kupwanañana na Bakamonyi ba kwa Yehoba. Bakamonyi ba kwa Yehoba bantundaikile bingi. Abano bantu kine batemwa Lesa na muchima yense kabiji balondela mizhilo ya Lesa mu bwikalo bwabo bonsetu. Mu kuya kwa moba, nalekele kutoma maalwa avula.
BINTU BYO NAMWENAMO: Namusanchila bingi Yehoba pa kunkwasha kuleka kutoma maalwa pa kuba’mba ngikale na lusekelo mu bwikalo bwami. Kwambatu kine, kechi nayuka kyafwainwe kummwekela inge natwajijile na byubilo byami bya kala ne. Kwambatu kishinka, bwikalo bwami luno po po bwawama bingi.
Pa myaka 7 yapitapo, naingijila pa ofweshi wa musampi wa Bakamonyi ba kwa Yehoba mu Slovenia. Kashika kuyuka Yehoba ne kumwingijila na muchima yense kwankwasha bingi kwikala bwikalo bwawama.