Paishijile Bamishonale Bakwabo

Pa 9 July 1964, Kipamo kya Bunchibamambo kya mu Indonesia kyaswishishe Jibumba ja Bafunda Baibolo kwikala ke kipamo kingijisha Bakamonyi ba kwa Yehoba. Balongo saka bakyangye kukasuluka mu mpopwelo yabo, bafwainwe kunembesha ku Kipamo Kitala pa bya Bupopweshi. Kino kipamo kyaipwizhe Kipamo Kimenako bena Kilishitu, mu kino kipamo mwavujile ba Polotesitanti bashikilwe bingi Bakamonyi ba kwa Yehoba.

Juba jimo, mulongo wamonañene na kiloolo umo waingijilanga pamo na Kipamo Kitala pa bya Bupopweshi. Bano banabalume byo bayukile’mba bafumine ku mpunzha imo, basangalele bingi kwisamba mu mulaka wabo. Mulongo byo abuujile uno kiloolo makatazho apichilengamo Bakamonyi ba kwa Yehoba na Kipamo Kimenako bena Kilishitu, uno kiloolo wabuujile balongo basatu amba bakasambakane na mwine mukulumpe Mozilemu wajinga na lusa. Pa 11 May 1968, uno mukulumpe waswishishe Bakamonyi ba kwa Yehoba kwikala bupopweshi bo bayuka ku kafulumende ne kutwajijila kusapwila mu Indonesia.

Uno mukulumpe waambijile Bakamonyi bafuma mu byalo bingi kutambula bitupa bya kwibaswisha kwingila mwingilo wa bumishonale kwa kubula kwipuzha Kipamo Kimenako bena Kilishitu. Na mambo a bukwasho bwa uno mukulumpe, kyalengejile bamishonale 64 kwibaswisha kutwela mu Indonesia pa myaka icheche yalondejilepo.

Byo kyafikile mu 1968, bamishonale 300 ne bapainiya beikajila ne basapwishi bavula kukila pa 1,200 basapwijilenga mambo awama mu Indonesia monse. Bamishonale bafunjishe balongo ne banyenga bya kwingila. Kino kibalengejile kuyuka byavula. Byo bafunjile bibakwashishe kuyuka mwa kubila na makatazho aishilenga.

Bantangi ba Bupopweshi Batambwile “kyo Bakebelenga”

Mu 1974, Kipamo Kimenako bena Kilishitu kyatendekele jikwabo kukanya Bakamonyi ba kwa Yehoba. Mukulumpe wa kino kipamo wanembele nkalata ku Bipamo byonse Bitala pa bya Bupopweshi ne kubepa’mba Bakamonyi ba kwa Yehoba kechi bayukanyikwa ku kafulumende ne. Uno mukulumpe watundaikile ba biloolo ba ku yoya mpunzha amba bafwainwa kumonapo mashinda a kumanyikilamo Bakamonyi. Ba biloolo bavula kechi baumvwijile byo bebabuujile ne. Pakuba bakwabo bakainye kupwila ne kusapwila ku nzubo ku nzubo.

Pa kyonkakya kimye, Kipamo Kitala pa Machechi Onse kyanengezhenga kusambakana kwa bantu bonse mu Jakarta, akino kyalengejile Bamozilemu kuzhingila bingi. Kipamo Kitala pa Machechi Onse byo kyamwene makatazho a bupopweshi, kechi kyaikele na kuno kusambakana ne. Na mambo a kuba kwalula bantu kwikala ke bena Kilishitu lwajinga lukatazho lwabaya bingi, kyalengejile bamulwila ntanda bavula kuchina. Mukulumpe wa bantangi waesekele kupamo mambo Bakamonyi ba kwa Yehoba na mambo a mwingilo wabo wa kusapwila. Akino kyalengejile ba biloolo bavula kushikwa Bakamonyi.

Mu December 1975, makatazho a bupopweshi byo atwajijile, kyalo kya Indonesia kyalukukile kyalo kya East Timor (aluno ke Timor-Leste), kyo balamanga ku kyalo kya Portugal. Byo papichile bañondo batanu na babiji, kyalo kya East Timor bekyangachile, kino kyaletele milukuchi mu kyalo kyonse. Balongo bakaine kwivwanga mu bya bumulwila ntanda ne kukana kutwela nkito ya bushilikale nangwa kupana mushingi ku mbandela, akino kyazhingijishe bingi bakulumpe ba bashilikale. (Mat. 4:10; Yoa. 18:36) Byo bakebelenga kwibepaya, ntangi wa bupopweshi waambijile kafulumende kulekesha Bakamonyi. Mu December 1976, Bantangi ba bupopweshi batambwile “kyo bakebelenga,” mambo kafulumende wabijikile’mba Bakamonyi ba kwa Yehoba bebalekesha.