GEORGIA
“Kwi Lesa Bintu Byonse Kechi Byakatazha Ne”
Ba Natela Grigoriadis
BASEMEKELWE MU 1960
BABATIZHIWE MU 1987
BWIKALO BWABO Ba Natela byo babatizhiwetu, batendekele kukwashako mwingilo wa kupulinta mabuku etu mu bufyamfya. Kwiyuka na bantu ne kuyuka bingi bya busulu kwibakwashishe kwingila uno mwingilo bulongo.
MU MYAKA ya mu ma 1980 byo twapwilanga, mulongo watangijilanga Lufunjisho lwa Kyamba kya Usopa ye yenkatu waikalanga na magazini ye bakopololangatu na maboko. Nesambile ne ba Genadi Gudadze bajinga bakulumpe mu kipwilo ne kwibepuzha inge kyakonsheka kuba’mba tupulintenga magazini atweba bene.
Mu oa moba, kwajingatu mabuku acheche o bakopololanga balongo na kamunkinyi kacheche ka kukopolwelako byambo katelwa’mba mimeograph. Bino pa kuba’mba bakopolole magazini avula, kwakebewenga munkinyi mukatampe wa kukopolwelako ne wa kutaipilako, mapepala avula bingi ne bantu bayuka kutaipa. Pano bino, kafulumende wabikileko muzhilo wa kuba’mba bonse baji na minkinyi ya kupulinchilako ne mapepala onsetu bafwainwa kwibinembesha, kabiji wasopanga bantu kumona byo babena kwingijisha ino minkinyi.
Mulunda ye naingilanga nanji kala wankebejileko munkinyi wa kutaipilako wa kala ye balekele kusopa ku kafulumende mambo balekele kumwingijisha. Nkasami wa mukazhi wayukile kutaipa ye witutaipilangako. Balongo balengele kamunkinyi ka mimeograph ka kukopolwelako kabiji betaaine ne kwa kupota mapepala. Twajinga na byonse bya kwingijisha pa kupulinta magazini, kabiji twatendekele kukopolola Kyamba kya Usopa mu mulaka wa bena Georgia.
Bino kwajinga lukatazho lukwabo. Juba jimo ba Genadi bambuujile’mba: “Twafwainwa kukeba kukwabo kwa kupota mapepala.” Bamwene mapepala avula mu ofweshi umo wa kafulumende, bino bakankelwe kwiapota mambo bebasopelenga ku bantangi ba mu kafulumende. Pano twafwainwe kuba byepi pa kuba’mba twiapote? Naambile pa bimye byavula’mba, “Kyakatazha.” Bino ba Genadi baambile’mba: “Kwambanga’mba ‘kyakatazha’ ne. ‘Kwi Lesa bintu byonse kechi byakatazha ne’!”—Mat. 19:26.
Nalangulukilepo bingi pa kino kya kuba juba jalondejilepo nachinchikile ne kuya ku ofweshi wa kafulumende. Twanembele nkalata ya kulomba’mba betuswishe kupota mapepala, kabiji Yehoba wantangijile ku muntu wakasulukile bingi waingilanga pa uno ofweshi, ye napele nkalata amba antwajileko ku mukulumpe pa uno ofweshi. Uno mukulumpe wa pa uno ofweshi wajinga mwatawanji. Betuswishishe kabiji twatendekele kupota mapepala ku uno ofweshi. Kufumatu kyokya kimye kechi twaikelepo na lukatazho lwa mapepala ne.