BYAMBAPO BAIBOLO

Satana

Nanchi Satana Muntu Nyi?

“Muloolo wa kala utelwa amba Diabola kabiji Satana yenka ubena kujimbaika bantu ba pano pa ntanda ponse.”—Lumwekesho 12:9.

BYAMBA BANTU Bantu bamo baitabila kuba’mba Satana Diabola kechi muntu ne, bino ke kyubilo kyatama kiji mu muntu.

BYAMBA BAIBOLO Satana ke muntu wa kine. Ke malaika wasatukile, kilengwa kya mupashi ulwisha Lesa. Baibolo utela Satana amba “mfumu wa pano pa ntanda.” (Yoano 12:31) Wingijisha “biyukilo bya bubela” ne “bujimbijimbi” pa kuba’mba obe byo akeba.—2 Tesalonika 2:9, 10.

Mu Baibolo muji mwisambo ye besambilenga Satana ne Lesa mwiulu. Inge kya kuba Satana wajinga kyubilo kyatama kiji mu muntu, pano nga Lesa waoloka kabiji wabula bubi wakonsha kwisambanga byepi na kyubilo kyatama kiji mwi aye? (Mpitulukilo ya mu mizhilo 32:4; Yoba 2:1-6 ) Nanchi Satana ke muntu wa kine, kechi kyubilo kyatama kiji mu muntutu ne.

MAMBO KA KUYUKA KINO O KYANEMENA KWI ANWEBA? Satana ukeba anweba kwitabila kuba’mba ufwako kabiji kino kiji nobe ngivi ubena kwifya mwine pa kuba’mba atwajijile kwiba kwakubula kumuyuka. Pa kuba’mba mwizhikijile kwi Satana, mwafwainwa kuyuka kuba’mba ko aji.

Satana wikala kwepi?

“Malwa enu anweba ntanda . . . mambo Diabola waikila ko muji.”—Lumwekesho 12:12.

BYAMBA BANTU Bavula baitabila kuba’mba Satana wikala mu mujilo wa helo uji pa kachi ka ntanda panshi. Bakwabo baitabila kuba’mba utanwa mu kachi ka bantu babi.

BYAMBA BAIBOLO Satana ke kilengwa kya mupashi, onkao mambo wikala ku mpunzha kubula kumweka. Pa kimye kimo, Satana bamuswishishe kwendauka kwikala Lesa ne bamalaika bakishinka. (Yoba 1:6) Bino bamupangile kwajinga Lesa pamo na bamalaika babi kabiji uji pano pa ntanda.—Lumwekesho 12:12.

Nanchi kino kilumbulula kuba’mba Satana wikala ku mpunzha imotu pano pa ntanda nyi? Kyakumwenako, kampe mwakitangapo mu Baibolo kuba’mba muzhi wa kala wa Pelegamuma bamutelanga amba “konka kwikala Satana.” (Lumwekesho 2:13) Bino byambo bimwesha kuba’mba mu ino mpunzha mwajinga bantu bapopwelanga Satana. Satana kechi wikala ku mpunzha imotu pano pa ntanda ne. Baibolo wamba’mba “bufumu bonse bwa pano pa ntanda” bwanji.—Luka 4:5, 6.

Nanchi Satana wakonsha kukozha bantu nangwa kwibatangijila nyi?

“Pano pa ntanda ponse paji mu bulume bwa kwa aye mubi.”—1 Yoano 5:19.

BYAMBA BAIBOLO Bantu bavula balondela Satana kabiji kino kibalengela kutangijilwa ne aye. (2 Kolinda 11:14) Kino kishinka kimwesha ene mambo bantu o bakankelwa kuwamisha bintu pano pa ntanda.

Baibolo uji ne na mashimikila akwabo amba pe Satana ne bamalaika basatukile byo batangijila bantu ne kwibakozha.—Mateo 12:22; 17:15-18; Mako 5:2-5.

BYO MWAKONSHA KUBA Kechi mwafwainwa kuchinanga Satana na mambo a bulume bwanji ne. Pa kuba’mba mubulenga kutangijilwa ne Satana, mwafwainwa kufunda byo ajimbaika bantu, mambo kechi ‘mwaluba bya bujimuku byanji ne.’ (2 Kolinda 2:11) Kupichila mu kutanga Baibolo mwakonsha kuyuka mashinda a bujimuku a kwa Satana ne kubula kutangijilwanga ne aye.

Tayai bintu byonse byalamata ku bandemona. (Byubilo 19:19) Bino byavwangamo mikano, byambo byo banemba, mavidyo, nyimbo ne bintutu bya pa kompyuta bitundaika kupopwela bandemona.

Baibolo waamba’mba “Diabola mukanyai ne aye ukemunyema.” (Yakoba 4:7) Kulondela luno lujimuno lwa mu Baibolo, kwakonsha kwimuzhikijila ku bya bujimuku bya kwa Diabola.—Efisesa 6:11-18.