Lufuunjisho 4

Diabola Ye Ñanyi?

Satana Diabola—wafuminepi? (1, 2)

Satana ujimbaika byepi bantu? (3-7)

Mambo ka omwafwainwa kumukainya Diabola? (7)

1. Kyambo kya “diabola” kyalumbulula muntu ubepela mukwabo bubela bwatama. “Satana” kilumbulula mba mulwanyi nangwa wamilengulwila. Ano omazhina obeta mulwanyi mukatampe wa Lesa. Patanshi, wajingatu malaika waoloka mwiulu ne Lesa. Pano bino, mukupita kwa kimye witotele aye mwine ne kukeba kupopwela ako kwafwainwatu Lesa bunke.—Mateo 4:8-10.

2. Uno malaika, Satana, wisambile ne Evwa kupichila mu muloolo. Pa kumubula bubela, naye walengulwile Lesa. Satana byonkabyo walukukile kitelwa mba “bumfumu” bwa Lesa, nangwa mba lubaji lwa Mwine Wakila. Satana walengeshe kuzhinauka ’mba kana Lesa ulamina bantu Banji mujishinda jawama ne jibafwainwa nyi nangwa ine. Satana kabiji walengeshe luzhinauko lwakuba’mba kana muntu yense wakonsha kwikala wakishiinka kwi Lesa nyi nangwa ine. Byoaubile bino, Satana wialwile mwine bunke bwanji ke mulwanyi ne Lesa. Kyokyo aishile kutelwa’mba Satana Diabola.—Ntendekelo 3:1-5; Yoba 1:8-11; Lumwekesho 12:9.

3. Satana wesekaeseka kujimbaika bantu kumupopwela aye. (2 Kolinda 11:3, 14) Jishiinda jimo joajimbaikilamo bantu ke bupopweshi bwa bubela. Inge bupopweshi bufuunjisha bya bubela pa lwa kwa Lesa, ko kuba mba bubena kuba bikeba Satana. (Yoano 8:44) Bantu baji mu mabupopweshi abubela balanguluka mba babena kupopwela Lesa wakiine. Pano bino babena kupopwela Satana. Aye ye ‘lesa wa panopantanda.’—2 Kolinda 4:4.

4. Kupopwela mipashi nako ke jishinda jikwabo Satana joongwelamo bantu. Bakonsha kwiita mipashi kuba mba ibazhikijile, ikozhe bakwabo, yambe bikamweka kulutwe, nangwa kuba bya kukumya. Ngovu itundaika byonsebye ye Satana. Inge tukeba kutookesha Lesa pa muchima, kechi twafwainwa kupopwela mipashi nangwatu pacheche ne.—Mpitulukilo ya mu Mizhilo 18:10-12; Byubilo 19:18, 19.

5. Kabiji Satana ujimbaika bantu kupichila mu kwitotesha kwa mukoka ne kupopwela bipanyi bya bumulwilantanda. Bamo balanguluka ’mba mukoka nangwa mutundu wabo wawama kukila wa bakwabo. Bino kechi kya kiine ne. (Byubilo 10:34, 35) Bantu bakwabo nabo baketekela bipanyi bya bumulwilantanda kuba mba byobikafumyapo lukatazho lwa bantu. Kuba bino, kimwesha kuba mba babena kukana Bufumu bwa Lesa. Abo bonka bo bukafumyapo lukatazho lwetu.—Danyela 2:44.

6. Jishinda jikwabo Satana joajimbaikilamo bantu ke ja kwibeseka na lwiso lwa bundengamambo. Yehoba witukambizha kuleka byubilo bya bundengamambo mambo wayuuka mba bitukozha. (Ngalatiya 6:7, 8) Bantu bamo bakeba kuba’mba ne aneba mwivwangemo mu bino byubilo. Pano bino, langulukai kuba mba, Satana ye ubena kukeba kuba mba mube bino bintu.—1 Kolinda 6:9, 10; 15:33.

7. Satana wakonsha kwingijisha lumanamo nangwa lupata kwimulengesha mba mu muleke Yehoba. Balunda nenu bamo bomwitemwa nabo bakonsha kwimuzhingijila mambo mubena kufuunda Baibolo. Bamo nabo bakonsha kwimwendeleka. Pano bino mwiipana kwi ñanyi? Satana ukeba kwimuchiinya kuba mba mwikileke kumuyuuka Yehoba. Kangye muleke Satana emushinde ne! (Mateo 10:34-39; 1 Petelo 5:8, 9) Byo mu mukanya Diabola, mu musekesha Yehoba ne kumwesha mba mubena kutundaika bumfumu Bwanji.—Byambo bya Mana 27:11.

[Bipikichala pa peja 9]

Bupopweshi bwa bubela, kupopwela mipashi, ne misalululo ya mikoka bijimbaika bantu

[Kipikichala pa peja 9]

Mukanyai Satana pa kutwajijila kumuyuuka Yehoba