Mukanai Diabola ne bya Bujimuku Byanji

1, 2. Lubatizhilo luletela bañanyi lusekelo?

UMVWE mwaingijila Yehoba pa myaka yavula, ko kuba’mba mwateleka ku majashi avula bingi a lubatizhilo o bamba pa kubuñana ne pa kushonkena. Pano bino, nangwa kya kuba mwiatelekapo kimye kyabaya pa bimye bya uno mutundu, kimuzakula bingi muchima kimye kyo mumona bantu babena kuya ku lubatizhilo saka baikala ku bipona bya kulutwe na kwikumbwila abo bene patoka. Pa kikye kimye, baji mu luonde bekala na lusekelo lukatampe kabiji bapopwela kufuma panshi ya muchima. Kabiji mipolo ya lusekelo yakonsha kuyengelela mu meso pa kumona bantu bepana kwingijila Yehoba. Twikala bingi na lusekelo pa bimye bya uno mutundu!

² Byo kiji kuba’mba pa bimye byavula pa mwaka pa mwaka twakonsha kumona bantu mu mpunzha yetu na kubatizhiwa, bamalaika bebamona kukila ne byo twibamona. Akifwanyikizhaitu ‘lusekelo lukatampe lwikala mwiulu’ bamalaika byo bamona bantu bavula mwaya ntanda byo benunga ku jibumba ja Yehoba pa mulungu pa mulungu. (Luka 15:7, 10) Kwa kubula nangwa kuzhinaukatu ne, bamalaika basekela bingi pa kumona kuno kuyilako palutwe.—Hagai 2:7.

DIABOLA “UPITAÑANA NOBE BOKWE UBULUMA”

3. Mambo ka Satana o abena kupitañena “nobe bokwe ubuluma,” kabiji ukeba kuba ka?

³ Nangwa byonkabyo, kuji bilengwa bya mupashi bizhingila bingi pa kumona bantu babena kubatizhiwa. Satana ne bandemona kibakola bingi ku muchima pa kumona bantu bavula byo babena kukana bintu bya mu ino ntanda yatama. Kino kya kine, mambo Satana witotele amba kafwako muntu ukengijila Yehoba kyatutu ne, kabiji waambile ne kuba’mba kafwako ukekala wa kishinka umvwe keapite mu lweseko lukatampe ne. (Tangai Yoba 2:4, 5.) Umvwe muntu wafuukulapo kwipana kwi Yehoba ko kuba’mba ubena kushiina Satana amba wa bubela. Kino kiji nobe Satana babena kumuzhangaula mapi avula ku meso mulungu ne mulungu mu mwaka. O ene mambo o abena ‘kupitañena nobe bokwe ubuluma ubena kukeba wa kuja.’ (1 Petelo 5:8) Uno “bokwe” ubena kukeba kwituja kuba’mba tuleke kwingijila Lesa ne konauna bulunda bwetu ne Lesa.—Salamo 7:1, 2; 2 Timoti 3:12.

4, 5. (a) Ñanyi mashinda abiji Yehoba o akainyamo Satana? (b) Mwina Kilishitu wafwainwa kuketekela ka?

⁴ Nangwa kya kuba tutalañana na uno mulwanyi washinta, kechi twafwainwa kumuchina ne. Mambo ka? Mambo Yehoba wamukanya uno “bokwe ubuluma” mu mashinda anema abiji. Ñanyi mashinda onkao? Jishinda jitanshi, Yehoba walaya’mba “jibumba jikatampe” ja bena Kilishitu ba kine bakapuluka “malwa akatampe” abena kwiya. (Lumwekesho 7:9, 14) Bungauzhi bwa Lesa kechi bubula kufika ne. Onkao mambo, Satana wayukishatu bulongo kuba’mba kechi ukakonsha kongola bantu ba Lesa bonse ne.

⁵ Kumukanya kwa bubiji, twakonsha kwikumwena ku bukine bwaambile banabalume ba kishinka ba Lesa bajingako kala. Ngauzhi Azaliya waambijile Mfumu Asa amba: “Yehoba ukekala ne anweba umvwe mwatwajijila kwikala nanji.” (2 Byambo bya Moba 15:2; tangai 1 Kolinda 10:13.) Bantu bavula bo banemba mu Baibolo, bamwesha’mba kunyumakwe Satana wakankelwe kongola bakalume ba Lesa bonse batwajijile kufwenya kwipi ne Lesa. (Bahebelu 11:4-40) Ne lelo jino, mwina Kilishitu uji kwipi ne Lesa wakonsha kumukana ne kumushinda Diabola. Kwambatu kine, Mambo a Lesa etukambizha’mba: “Diabola mukanai ne aye ukemunyema.”—Yakoba 4:7.

“TUBENA KULWA . . . NA NZHITA YA BAPASHI BATAMA”

6. Satana ulukuka byepi bena Kilishitu pa muntu pa muntu?

⁶ Satana kechi wakonsha kushinda mu ino nkondo ya kifwanyikizho ne, bino wakonsha kwitushinda pa muntu pa muntu umvwe twaleka kulaba ne kukenkenta. Satana wayuka’mba wakonsha kwituja umvwe waonauna bulunda bwetu ne Yehoba. Nanchi Satana weseka byepi kuba kino? Witulukuka pa muntu pa muntu mu bujimuku bwanji. Pano twayai twisambe pa mashinda akatampe Satana o engijisha.

7. Mambo ka Satana o akizhizhamo kulukuka bantu ba Yehoba?

⁷ Kukizhamo kulukuka bantu. Mutumwa Yoano wanembele’mba: “Pano pa ntanda ponse paji mu bulume bwa kwa aye mubi.” (1 Yoano 5:19) Bino byambo bibena kujimunako bena Kilishitu ba kine bonse. Byo kiji kuba’mba Satana waja kala bantu bonse batama mu ino ntanda, wazanza meso anji pa kukeba kulukuka boba bamukana nangwa’mba, bantu ba Yehoba. (Mika 4:1; Yoano 15:19; Lumwekesho 12:12, 17) Uji na bukaji bukatampe bingi mambo wayuka’mba kimye kyanji ke kicheche. Onkao mambo, wavwajila bantu katabuka. Lelo jino, ubena kwitulukuka kukeba konauna bulunda bwetu ne Lesa.

8. Mutumwa Paulo watazhizhe mu ka byo aambile’mba “tubena kulwa” na bapashi batama?

⁸ Nkondo yetu atweba bene. Mutumwa Paulo wajimwineko bakwabo bena Kilishitu kuba’mba: “Tubena kulwa . . . na nzhita ya bapashi batama baji mu mapunzha a mwiulu.” (Efisesa 6:12) Mambo ka Paulo o aingijishe kyambo kya “kulwa”? Mambo kyalumbulula ñambilo ya kwifina tukono. Onkao mambo, Paulo byo aingijishe kino kyambo, waambilenga kuba’mba atweba bonse tuji pa nkondo ya kulwa na bapashi batama. Nangwa twikala mu kyalo bantu mo bapopwela mipashi yatama nangwa ne, kechi twafwainwa kulubako’mba byo twipaine kwi Yehoba, twatendekele kulwa ino nkondo ya bukifwanyikizho ne. Kufumatu juba mwina Kilishitu jo epana, utendeka kulwako ino nkondo. O ene mambo Paulo o ajimwijileko bena Kilishitu mu Efisesa bimye bisatu amba, “mwimane saka mwakosa.”—Efisesa 6:11, 13, 14.

9. (a) Mambo ka Satana ne bandemona banji o bengijishisha “bya bujimuku” byapusana pusana? (b) Mambo ka Satana o akebela kutamisha milanguluko yetu, kabiji twakonsha kushinda byepi meseko anji? (Monai kakitenguluzha “Jimukai na Bujimuku bwa kwa Satana”) (c) Ñanyi jishinda jikwabo ja bujimuku jo tusakwisambapo?

⁹ Bya bujimuku. Paulo wakambizhe bena Kilishitu kwimana saka bakosa “ku bya bujimuku” bya kwa Satana. (Efisesa 6:11) Akimonai Paulo byo aingijishe kyambo kya bujimuku. Bapashi batama bengijisha mashinda avula a bujimuku a kongwelamo bantu. Bena Kilishitu bamo bakosa mu lweseko lumo, bino mu kuya kwa kimye, bakankalwa kukosa pa kupita mu lweseko lukwabo. Onkao mambo, Diabola ne bandemona bamona byubilo byetu atweba bonse pa muntu pa muntu ne kumona mo twakookela kuba’mba betulukukilemo. Bengijisha jino jishinda konawinamo bulunda bwetu ne Lesa. Nangwa byonkabyo, tusanta bingi pa kuyuka bujimuku bwa kwa Diabola bwavula bo betusolwela mu Baibolo. (2 Kolinda 2:11) Ku ntendekelo ya uno buku, twisambile pa mashinda o engijisha nabiji kukebesha bintu bya ku mubiji, kupwanañana na bantu batama ne kuba bulalelale. Pano twayai twisambe jishinda jikwabo ja bujimuku bwa kwa Satana, ko kuba’mba kupopwela mipashi.

KUPOPWELA MIPASHI KE BUNSATUKI

10. (a) Nanchi kupopwela mipashi kulumbulula ka? (b) Yehoba umona byepi bantu bapopwela mipashi, nga anweba mwikumona byepi?

¹⁰ Kupopwela mipashi nangwa bandemona kulengela muntu kutendeka kumvwañana na bapashi batama. Kupongesha, bulozhi, kuta bantu bwanga ne kwisamba na bafu ke mashinda amo a kupopwelamo mipashi. Byonkatu byo twayuka, Yehoba umona kupopwela mipashi kwikala “bya bunya.” (Mpitulukilo ya mu Mizhilo 18:10-12; Lumwekesho 21:8) Byo kiji kuba’mba ne atweba twafwainwa ‘kushikwa bintu byatama’ ko kuba’mba kechi twafwainwa kwikala balunda na bapashi batama ne. (Loma 12:9) Kino kyubilo kimwesha kusatukila Shetu wa mwiulu, aye Yehoba!

11. Mambo ka Satana o akonshesha kutemwa inge witulengela kutendeka kupopwela mipashi? Lumbululai.

¹¹ Nangwa kya kuba kupopwela mipashi ke kyubilo kya bunya kwi Yehoba, Satana ubena kwikingijisha kuba’mba ne atweba twikyubenga. Umvwe Satana waongola mwina Kilishitu kulondela bandemona, utemwa bingi. Mambo ka? Akilangulukai pa kino: Umvwe mushilikale bamukanjikizha kusatukila bakwabo kabiji wasolola ne bashilikale bakwabo ne kukwatankena pamo na balwanyi, mukulumpe wa bano balwanyi wakonsha kutemwa bingi. Kabiji mukulumpe wa balwanyi wakonsha ne kumwesha uno mushilikale ku mukulumpe wanji kuba’mba etotelemo ne kumukosamika. Mu jishinda jimotu, umvwe mwina Kilishitu wivwanga mu kupopwela mipashi, wakonsha kusatukila Yehoba ne kulondela bibena kukeba Satana. Akifwanyikizhai Satana byo atemwa inge waongola muntu byonkatu bisekela mukulumpe wa balwanyi umvwe wakwata mushilikale! Ñanyi mwi atweba wakonsha kukeba amba Diabola amushinde? Kafwako nangwa umo ukeba kuba bino ne! Mambo kechi twi bansatuki ne.

WINGIJISHA MEPUZHO ALENGELA BANTU KUTENDEKA KUZHINAUKA

12. Ñanyi jishinda Satana jo engijisha kwitulengela kumonanga kupopwela mipashi nobe kujitu bulongo?

¹² Umvwe twashikwa kupopwela mipashi, Satana kechi uketongola ne. Pano bino, wayuka’mba wafwainwa kupimpula ndangulukilo yetu. Mu ñanyi jishinda? Ukebakeba mashinda a kuvulañenyamo bena Kilishitu kya kuba bamo batendeka ne kumona “byawama amba byatama, ne byatama amba byawama.” (Isaya 5:20) Satana uba bino javula pa kubwezhabwezhapo mashinda anji o aingijisha pa moba avula ne kwingijisha mepuzho alengela bantu kutendeka kuzhinauka.

13. Satana waingijishe byepi mepuzho alengela bantu kutendeka kuzhinauka?

¹³ Akimonai Satana byo aingijishe jino jishinda mu kimye kya kala. Mu Edena waipwizhe Evwa amba: “Nanchi Lesa kine wimwambijile’mba kechi mwafwainwa kuja ku bichi byonse bya mu bujimi nenyi?” Mu kimye kya kwa Yoba, kimye bamalaika kyo basambakene mwiulu, Satana waipwizhe’mba: “Nanchi Yoba wakamwa Lesa kyatutu nyi?” Kabiji Yesu byo atendekele mwingilo wanji pano pa ntanda, Satana waesekele Kilishitu byo amwambijile’mba: “Umvwe wi mwana Lesa, ambila ano mabwe aluke ke bashinkwa.” Akimonai Satana byo aubile mwenga Yehoba pa kwamba kwi Yesu, byo aingijishe byambo byaambile Yehoba saka papita kala milungu itanu na umo amba: “Uno ye Mwanami ye natemwa, mo mmwena lusekelo!”—Ntendekelo 3:1; Yoba 1:9; Mateo 3:17; 4:3.

14. (a) Satana wingijisha byepi bya bujimuku byanji kulengela bantu kuzhinauka inge kupopwela mipashi kwatama nangwa ne? (b) Ñanyi bintu byo tusakwisambapo?

¹⁴ Ne lelo jino, Diabola ubena kwingijisha jishinda jimotu kongwelamo bantu kuba’mba bazhinaukenga inge kupopwela mipashi kwatama nangwa ne. Kyatama bingi mambo bena Kilishitu bamo wibalengela kuzhinauka. Batendeka kuzhinauka pa mambo a misango imo ya kupopwela mipashi umvwe kya kine yonsetu yatama nangwa ne. (2 Kolinda 11:3) Twakonsha kukwasha byepi bantu ba uno mutundu kupimpula ndangulukilo yabo? Twakonsha kuba byepi pa kuba’mba Satana abule kwitongola na bya bujimuku byanji? Pa kuba’mba tukumbule ano mepuzho, patanshi twayai tumone bintu bibiji byo tuba mu bwikalo Satana mu bujimuku bwanji byo engijisha kongwelamo bantu kupopwela mipashi. Bino bintu ke bya kisangajimbwe ne mashinda a kubukilwamo.

WITUJIMBAIKA NA BINTU BYO TWATEMWA

15. (a) Bantu baji mu byalo byanonka bamona byepi kupopwela mipashi? (b) Bena Kilishitu bamo bebalengela byepi kulanguluka’mba kupopwela mipashi kujitu bulongo?

¹⁵ Kikatakata mu byalo byanonka, bingelekezha, bulozhi ne bintutu bikwabo bya kupopwela mipashi kechi bebimona’mba byatama ne. Mafilimu, mabuku, mitanchi ya pa televizhonyi ne makayo a pa kompyuta bibena kuyilakotu palutwe na kumwesha byubilo bya bundemona kumweka nobe bya kusekeshatu, kabiji bijitu bulongo. Kuji mafilimu ne mabuku avula bingi amwesha bingelekezha aba balenga bya kulengalenga o banengezhezha bantu batemwa bya kukayakaya. Kwambatu kine, bandemona babena kwingijisha jino jishinda ne kulengela bantu kulanguluka’mba bingelekezha kechi byatama ne. Nanchi kumwena kupopwela mipashi mu jino jishinda kwalengela ne bena Kilishitu nabo kwibongola nyi? Ee, bena Kilishitu bamo bebongola. Mu ñanyi jishinda? Mwina Kilishitu umo byo apwishishe kutamba filimu wa bingelekezha, waambile’mba: “Amiwa natambilekotu filimu, pano bino kechi nevwangilemo mu kyubilo kya kupopwela mipashi ne.” Mambo ka kulanguluka bino o kwatamina?

16. Mambo ka o kyatamina kusala bya kisangajimbwe muji bingelekezha?

¹⁶ Nangwa kya kuba paji lupusano pa kupopwela mipashi ne kwiitambatu, kino kechi kilumbulula’mba kutamba bingelekezha kafwamo byatama bifumamo ne. Mambo ka? Akilangulukai pa kino: Mambo a Lesa amwesha’mba Satana nangwa bandemona kechi baji na bulume bwa kuyuka milanguluko yetu byo iji ne.a Onkao mambo, byonka byo kyaambiwapo kala, pa kuba’mba bayuke byo tubena kulangulukapo ne kuyuka bulunda bwetu ne Lesa byo bwakooka, bapashi batama bamona byubilo byetu ne bya kisangajimbwe byo twatemwa. Umvwe byubilo bya mwina Kilishitu bimwesha’mba watemwa mafilimu nangwa mabuku aamba pa besamba na bapashi, bañanga ba lubuko, ne byubilo bya bundemona nangwa bintutu bikwabo byaamba pa bandemona, ko kuba’mba uno muntu ubena kwisamba na bandemona. Umvwe keobe bino, ko kuba’mba ubena kwibeta! Bandemona nabo bebikako kulwa na uno mwina Kilishitu kuba’mba bamupwishe tubulume to ashala nato kufikatu ne byo bamushinda. Kwambatu kine, aba batemwa kupopwela bapashi patanshi bakibongwele na bya kisangajimbwe byavwangamo bingelekezha, apa bino batendeka kupopwela mipashi.—Tangai Ngalatiya 6:7.

17. Ñanyi bujimuku Satana bo akonsha kongwelamo muntu ubena kukolwa?

¹⁷ Satana kechi witwesekelatu mu bintu bya kisangajimbwe byonka ne, bino ne mashinda o betubukilamo. Uba byepi bino? Mwina Kilishitu ukolwakolwa wakonsha kulefulwa bingi inge waeseka papelela bulume bwanji kukeba muchi, bino kikola kupwa ne. (Mako 5:25, 26) Kino kyakonsha kulengela Satana ne bandemona kumushukilwa. Bandemona bakonsha kweseka muntu ubena kukolwa kukeba muchi nangwatu mashinda akwabo a kubukilwamo ku bantu boba “bingelekezha.” (Isaya 1:13) Umvwe jino jishinda ja bujimbijimbi ja bandemona jaingila, jakonsha kulengela muntu ubena kukolwa konauna bulunda bwanji ne Lesa. Mu ñanyi jishinda?

18. Ñanyi mashinda a kubukilwamo afwainwa kukana mwina Kilishitu, kabiji mambo ka?

¹⁸ Yehoba wajimwineko bena Isalela baubilenga “bingelekezha” amba: “Umvwe mwasuntula maboko enu, amiwa mfya kilungi kyami kwi anweba. Nangwa kya kuba mulomba milombelo yavula, amiwa kechi neyumvwa ne.” (Isaya 1:15) Ibyo, atweba bonse twafwainwa kuchinuzhuka bintu byonse byakonsha kulubankanya milombelo yetu ne byakonsha kulengela Yehoba kubula kwitukwasha, kikatakata mu kimye kyo tubena kukolwa. (Salamo 41:3) Onkao mambo, mwina Kilishitu wa kine umvwe wamona kuba’mba mbukilo nangwa michi imo yavwangamo kupopwela mipashi, wafwainwa kwiikana.b (Mateo 6:13) Umvwe wauba bino, ukamona’mba Yehoba watwajijila na kumukwasha.—Monai kakitenguluzha kaamba’mba “Nanchi Kuba Bino Bintu Kine Kupopwela Mipashi Nyi?”

BYO TWAKONSHA KUBA INGE BANTU BAKIZHAMO KWAMBA PA MASHIMIKILA A BANDEMONA

19. (a) Diabola walengela bantu bavula kuyuka ñanyi bintu pa mambo a bulume bwanji? (b) Ñanyi mashimikila bena Kilishitu ba kine o bafwainwa kuchinuzhuka?

¹⁹ Bantu bavula baji mu byalo byanonka kechi batako muchima ku kizumba kiji mu kulondela mashinda a kwa Satana byonka byuba bantu bakwabo baji mu mapunzha akwabo mwaya ntanda ne. Ku mapunzha a uno mutundu Diabola waongola michima ya bantu bavula bingi pa kuba’mba bamonenga’mba kine uji na bulume bwakila. Bantu bamo boba bintu nabiji kuja, kwingila ne kulaala aku saka baji na moyo wa kuchina bapashi batama. Mashimikila aamba pa bintu byuba bandemona avula bingi. Ano mashimikila byo beamba ne kwiatentemesha; kilengela bantu kwiatemwa. Nanchi ne atweba twafwainwa kusampanya mashimikila a uno mutundu nyi? Ine, mambo bakalume ba Lesa ba kine bachinuzhuka kuba bino na mambo a bintu bibiji byanema.

20. Muntu wakonsha kusampanya byepi byambo bya bubela bya kwa Satana kwa kubula kuyuka?

²⁰ Kintu kitanshi, umvwe muntu keashimikizhe mashimikila aamba pa bandemona, ko kuba’mba ubena kutundaika bintu bya kwa Satana. Mu ñanyi jishinda? Mambo a Lesa aamba’mba Satana uji na bulume bwa kuba bya kukumya, bino etujimunako ne kuba’mba wingijisha “bimwesho bya bubela” ne “bujimbijimbi.” (2 Tesalonika 2:9, 10) Satana byo aji mujimbijimbi mukatampe, wayuka bya kutamisha milanguluko ya bantu batemwa kupopwela mipashi ne bya kwibalengela kuketekela bintu bya bubela. Bantu ba uno mutundu bakonsha kwamba’mba bamwene ne kumvwa bintu bimo kabiji bakonsha kutendeka ne kwibishimikizha uba nobe bya kine. Mu kuya kwa kimye, ano mashimikila bakwabo nabo beashimikizha ne kubikamo bya bubela. Umvwe mwina Kilishitu wasampanya byambo bya uno mutundu, ko kuba’mba ubena kuba kyaswa muchima wa Diabola, “shanja bubela.” Kabiji ukasampanyanga byambo bya bubela bya kwa Satana.—Yoano 8:44; 2 Timoti 2:16.

21. Misambo yetu yafwainwa kwimena pa ñanyi bintu?

²¹ Kya bubiji, nangwa kya kuba mwina Kilishitu watalañenepo kala na bapashi batama, kechi wafwainwa kushimikizhanga bakwabo ba mu lwitabilo mashimikila a uno mutundu ne. Mambo ka? Betukambizha kuba’mba: ‘Talainga konka kwi Ntangi Mwine kabiji Kalumbulula wa lwitabilo lwetu, aye Yesu.’ (Bahebelu 12:2) Atweba twafwainwa kutatu muchima kwi Kilishitu kechi kwi Satana ne. Yesu byo ajinga pano pa ntanda, kechi washimikizhepo baana banji ba bwanga majashi a pa bapashi batama ne, nangwa kya kuba wafwainwe kwamba byavula pa mambo a bulume bwa Satana. Bino Yesu wateletu muchima pa mambo a Bufumu. Onkao mambo, pa kuba’mba twikale byajinga Yesu ne batumwa banji, ne atweba misambo yetu yafwainwa kwimena pa “mingilo ikatampe ya Lesa.”—Byubilo 2:11; Luka 8:1; Loma 1:11, 12.

22. Twakonsha kuba byepi pa kuba’mba “mwiulu” mwikale “lusekelo”?

²² Kya kine kuba’mba Satana wingijisha mashinda a bujimuku avula bingi, kuvwangakotu ne kupopwela mipashi kuba’mba etonawine bulunda bwetu ne Yehoba. Nangwa byonkabyo, inge twashikwa byatama ne kutemwa byawama, kechi tumushila kanya Diabola ka kwitulengela kufwa mu tukose twanji twa kupopwela mipashi ne. (Tangai Efisesa 4:27.) Fwanyikizhai “lusekelo” lukatampe lwikala “mwiulu” umvwe twatwajijila ‘kwimana saka twakosa ku bya bujimuku bya kwa Diabola’ kufikatu ne byo bakamufumyapo!—Luka 15:7; Efisesa 6:11.