BYAMBAPO BAIBOLO
Kupopomenwa
Kupopomenwa ko kuba ka?
“Nafwa misongo ne kukonkomana bingi; ñenda njila juba jonse.”—Salamo 38:6.
BYAAMBAPO BASHAYUKA Bantu bonse bekala na bulanda kimye kimo, bino kupopomenwa ke kwikala na bulanda bubula kupwa kabiji bulengela muntu kukoka ne mubiji kubula kukasuluka. Twafwainwa kuyuka kuba’mba kechi bashayuka bonse baswa kuba’mba kuji “bulanda” bonkabwe ne bwa “kikola” ne. Nangwa byonkabyo, kyawama kwamba kuba’mba bantu bamo bekala na binyenge ne bulanda bukatampe, bimye bimo belengulula ne kwizhachisha abo bene.
BYAMBA BAIBOLO Baibolo waambapo pa banabalume ne banabakazhi abo bajinga na binyenge. Kya kumwenako, Hana wajinga na “binyenge.” Kyambo kya binyenge kituntululwa’mba “kulajika muchima” ne “bulanda bukatampe.” (1 Samwela 1:10) Kimye kimo, ngauzhi Elaija wajinga na bulanda bukatampe kya kuba walombele kwi Lesa kuba’mba atambule mweo wanji.—1 Bamfumu 19:4.
Bena Kilishitu batanshi bebakambizhe ‘kutekenesha bantu bapopomenwe.’ (1 Tesalonika 5:14) Kwesakana na buku umo, kyambo kyatuntululwa’mba “bapopomenwa” kyakonsha kulumbulula boba “baji na bijikila bya mu bwikalo.” Kya kine, nangwatu banabalume ne banabakazhi banembwa mu Baibolo nabo bapopomenwanga.
Nanchi muntu mwine ye wilengela kupopomenwa nyi?
“Bilengwa byonse bibena kubinza ne kumvwa misongo pamo.” —Loma 8:22.
BYAMBA BAIBOLO Baibolo ufunjisha kuba’mba bikola byaishile na mambo a bunsatuki bwa bansemi betu batanshi. Kya kumwenako, Salamo 51:5 waamba’mba: “Nasemenwe mu bubi; ne mu bubi momo bañimichijile bamama.” Kabiji Loma 5:12 walumbulula’mba, “bundengamambo bwatwelele pano pa ntanda mu muntu umo [Adama], ne lufu nalo lwaishijile mu bundengamambo, byonkabyo lufu lwakumbene ku bantu bonse mambo bonse balengele mambo.” Na mambo a kuba twaswana bumbulwa kulumbuluka kufuma kwi Adama, atweba bonse tukolwa bikola bya mu mubiji ne mu milanguluko. Na mambo a kino, Baibolo waamba’mba: “Bilengwa byonse bibena kubinza ne kumvwa misongo pamo.” (Loma 8:22) Nangwa byonkabyo, Baibolo witubuula ne pa mulaye wa Lesa wa ntanda ipya ya mutende mukabula bikola byonse, kubikapotu ne kupopomenwa, bintu byakankalwa kufumyapo badokotala.—Lumwekesho 21:4.
Mwafwainwa kuba byepi inge mupopomenwa?
“Yehoba uji kwipi na bonse balajika michima, kabiji wibapulusha bonse ba mipashi yalapila.” —Salamo 34:18.
ENE MAMBO O KYANEMENA Kechi kimye kyonse kyo mwakonsha kuwamisha bintu ne, kabiji bimye bimo bintu byatama byakonsha kwimumwekela. (Musapwishi 9:11, 12) Nangwa byonkabyo, kuji byo mwakonsha kuba pa kuba’mba mukepeshengako binyenge.
BYAMBA BAIBOLO Baibolo waamba’mba bakolwa bo bakeba shayuka wa michi. (Luka 5:31) Onkao mambo, umvwe muji na kikola kya ku bongo kimulengela kwinyengaika, kechi kyatama kukeba muchi ne. Kabiji Baibolo waamba ne pa buneme bwa lulombelo. Kya kumwenako, Salamo 55:22 waamba’mba: “Utwike Yehoba kisendwa kyobe, ne aye ukakukosesha: Kechi ukamuleka mololoke amba atenkene nangwa jimotu ne.” Lulombelo lwakonsha kwimukwasha kumvwako bulongo; kabiji jo jishinda ja kine ja kwisambilamo ne Yehoba Lesa “uji kwipi na bonse balajika michima.”—Salamo 34:18.
Kabiji kubulako mulunda nenu bintu byo muji nabyo ku muchima kwakonsha kwimukwasha bingi. (Byambo bya Mana 17:17) Kamonyi wa kwa Yehoba wa jizhina ja Danyela waambile’mba: “Mukwetu wa mu lwitabilo watundaikile kwamba pa lukatazho lwami lwa kupopomenwa. Nangwa kya kuba nachinuzhukanga kwamba pa luno lukatazho pa myaka yavula, naishile kuyuka kuba’mba byobyo nafwainwe kubanga. Byo twapwishishe kwisamba, naumvwine ne ku muchima kwa kasuluka.”
[Kipikichala pa peja 15]