Lutekenesho ku Bapopomenwa

“Bilengwa byonsetu bibenakubinza na kumvwa misongo pamotu ne buji lelo.” (Loma 8:22) Buyanji bwa bantu bwabayile bingi kimye kyanembelwenga bino byambo myaka 1,900 yapitapo. Bavula bapopomejilwe. Onkao mambo, bena Kilishitu bakambizhiwe’mba: “Koseshai ba michima yapungila” nangwa’mba bapopomenwa.—1 Tesalonika 5:14.

Ano moba, bantu babena kumanama bingi, kabiji bavula bapopomenwa kukila byo kyajinga kala. Pano nanchi kino kyakonsha kwitukumisha nyi? Ine, mambo Baibolo watongola ano moba amba ‘moba apelako’ kabiji ne kuba’mba “bimye byakatazha.” (2 Timoti 3:1-5) Yesu Kilishitu waambijile jimo’mba, mu moba akapelako, kukekala bintu “bya kulenga moyo.”—Luka 21:7-11; Mateo 24:3-14.

Umvwe bantu baikala na bijikila pa kimye kyabaya, moyo, bulanda nangwa milangulukotu ikwabo yatama, javula bapopomenwa. Bintu byakonsha kulengela bantu kupopomenwa nangwa kukizhamo bulanda ke lufu lwa mutemwe wabo, kupwa kwa masongola, kupwa kwa nkito, nangwa kikola kibula kupwa. Kabiji bantu bapopomenwa umvwe ke beumvwe’mba kechi banema ne, kabiji ne kulanguluka’mba batutu bakulengesha bakwabo bumvu. Muntu uji yense wakonsha kumvwa kutama na bintu bileta bulanda, pano bino inge wayuka’mba watutu, kabiji kafwako mwa kwikikwashisha ne, binyenge byakonsha kukilamo kubaya.

Ne bantu ba ku kala nabo byo byo beumvwanga. Yoba wabelele bingi ne kumona byakatazha. Walangulukilenga’mba Lesa wamusha, onkao mambo kyamufichile ku muchima kwikala na bumi. (Yoba 10:1; 29:2, 4, 5) Yakoba wapopomejilwe na mambo a kulanguluka’mba mwananji wafwa ne kukana wakaine kumutekenesha ke akebe naye amba inge wafwa. (Ntendekelo 37:33-35) Byo eumvwinenga kuzhatwa na mambo a mambo akatampe o alengele, Mfumu Davida, wajijile’mba: “Ñenda njila juba jonse. Nakokeshatu.”—Salamo 38:6, 8; 2 Kolinda 7:5, 6.

Ano moba, bantu bavula bapopomenwa na mambo a kukizhamo kwingila ne kukeba kuba bintu bya juba ne juba byo bakonsha kukankalwa kuba. Binyenge byoakonsha kwikala nabyo muntu kubikapo ne kwikala na milanguluko yabula kufwainwa, byakonsha kutamisha mubiji ne kulengela bongo kuvulañana, kya kuba byalengela muntu kupopomenwa.—Monai byaamba Byambo bya Mana 14:30.

Bukwasho bo Bakeba

Epafolodita, mwina Kilishitu wa mu myaka kitota kitanshi wafumine ku Filipai, waubile ‘kijikila kikatampe [balunda nanji] byo baumvwine’mba, wakolwa.’ Epafolodita byo abelele panyuma ya kuba balunda nanji bamutuma ku Loma amba atwajile mutumwa Paulo bintu byo bamupele, kampe wiumvwine’mba walengesha bakwabo bumvu kabiji basakumumonanga’mba wakankalwa. (Filipai 2:25-27; 4:18) Nga mutumwa Paulo wamukwashishe byepi?

Watumine Epafolodita kubwela kwabo na nkalata yo anembejile balunda nanji bena Filipai kuba’mba: “Mutambulai [Epafolodita] mwi Nkambo ne lusekelo lonse; ne kwibanemeka ba byonkabyo.” (Filipai 2:28-30) Paulo byo amutakaikile Epafolodita ne bena Filipai byo bamutambwijile na lusekelo ne na butemwe, kine kya mutekeneshe ne kumwamunako ku binyenge.

Kwa kubula nangwa kuzhinaukatu ne, kufundañana kwa mu Baibolo kwa kuba’mba ‘koseshai ba michima yapungila’ nangwa’mba bapopomenwa kwawama bingi. Mwanamukazhi umo wapopomejilwe waambile’mba, “kikebewa kuyuka’mba bantu ba kuta muchima. Kikebewa kumvwa muntu waamba’mba, ‘Naumvwa lukatazho lo ujimo; usa kwikalatu bulongo.’”

Javula muntu wapopomenwa wafwainwa kumonapo muntu wa lusa ye akonsha kubula lukatazho lwanji. Uno muntu wafwainwa kwikala utelekesha kabiji watekanya bingi. Wafwainwa kuchinuzhuka kuba saabonkomatu ku yewa wapopomenwa nangwa kwamba byambo bya kuba nobe kumuzhachisha, nabiji bya kuba’mba, ‘Kechi wafwainwa kwiumvwanga byobyo ne’ nangwa’mba, ‘Ayo ndangulukilo yatama.’ Ndangulukilo ya muntu wapopomenwa ipelela bingi, onkao mambo byambo bya kumunena byakonsha kumulengela kukizhamo kumvwa bibi.

Muntu wapopomenwa wakonsha kwiumvwa watutu. (Yona 4:3) Nangwa byonkabyo, muntu wafwainwa kuvuluka’mba kine kintu kyanema ke Lesa byo amumona. Bantu kechi ‘bamushingikile’ Yesu Kilishitu ne, pano bino kino kechi kyapimpwile kunema kwanji kwi Lesa ne. (Isaya 53:3) Yukai kuba’mba, byonka Lesa byo atemwa Mwananji, ne anweba byobyo emutemwa.—Yoano 3:16.

Yesu waumvwijilenga lusa bantu bamanaminenga kabiji ne kweseka kwibakwasha kwiumvwa’mba banema. (Mateo 9:36; 11:28-30; 14:14) Walumbulwile’mba Lesa wanemeka ne tubwalula tumweka kubula kunema. Waambile’mba ‘ka mujipo kamo kalubiwa ku meso a Lesa ne.’ Byo anemekapo bantu besekako kuba kyaswa muchima wanji! Pa mambo a bano Yesu waambile’mba: “Nsuki yenu yonse ya ku mutwe beibala.”—Luka 12:6, 7.

Kya kine, kyakonsha kushupa bingi muntu wapopomenwa bingi kabiji waakamwa na mambo a bilubo byanji kuswa’mba Lesa wamunemeka bingi. Wakonsha kwiumvwa’mba Lesa kechi wakonsha kumutemwa ne kumuta muchima ne. Mambo a Lesa aitabizha’mba ‘michima yetu ituzhachisha.’ Pano nanchi kino kyo kya kuyukilako nyi? Ine kechi ikyo ne. Lesa wayuka’mba bantu bambulwakoloka bakonsha kulanguluka bintu byatama kabiji ne kwizhachisha bene. Onkao mambo, Mambo anji ebatekenesha’mba: “Lesa ye wakila michima yetu, ne kuyuka wayuka byonse.”—1 Yoano 3:19, 20.

Ee kine, Shetu wa mwiulu wa butemwe kechi umonatu pa bundengamambo ne pa bilubo byetu byonka ne. Wayuka ne bine bintu bilengela kuba byobyo bintu, bwikalo bwetu bonse, ene mambo ne milanguluko yetu. Wayuka’mba twaswana bundengamambo, bikola, ne lufu, ne onkao mambo tuji na bilubo byavula. Byo kiji kuba’mba tumvwa bulanda ne kukatazhiwa, ke kiyukisho kya kuba’mba kechi tukeba kulenga mambo ne, kabiji kechi twapampukamo kyabaya ne. Baibolo waamba’mba ‘betukokesha amba twikale ke batutu’ na bibula kukeba michima yetu. Onkao mambo, Lesa umvwisha lukatazho lwetu kabiji na kifyele witulangulukilako na mambo a bilubo byetu.—Loma 5:12; 8:20.

Twabujiwa mu bukishinka’mba “Yehoba ye wa lusa ne wa bupe.” Kabiji “monka mwalepela kufuma ku musela ne kufika ku muzhika, mo monka mo aabenya mizhilulwila yetu ne atweba. Mambo aye wayuka mibiji yetu byo iji; Aye uvuluka’mba, bo ba lukungu.” (Salamo 103:8, 12, 14) Kya kine Yehoba ke “Lesa wa bukwasho bonse; ye witukwasha mu bya malwa byetu byonse.”—2 Kolinda 1:3, 4.

Bukwasho bo bakebesha bantu bapopomenwa bufuma mu kufwenya kwipi ne Lesa wabo wa lusa kabiji ne kumvwina lwito lwanji lwa ‘kumutwika kisendwa kyabo.’ Wakonsha “kusangula muchima wa yewa uji na muchima walajika.” (Salamo 55:22; Isaya 57:15) Onkao mambo, Mambo a Lesa atundaika bingi kulomba, kwamba’mba: “Kasa mutaya kijikila kyenu kyonse pe aye [Yehoba], mambo aye wimuta muchima.” (1 Petelo 5:7) Ee, kupichila mu lulombelo ne mu misashijilo, bantu bakonsha kufwenya kwipi ne Lesa ne kwikala na “mutende wa Lesa ubula kuyukanyika.”—Filipai 4:6, 7; Salamo 16:8, 9.

Kupimpulako bintu bya mu bwikalo nako kwakonsha kukwasha muntu kubula kupopomenwa. Kukayako bisela bya kukosesha mubiji, kuja kajo kawama, kupitwako mwela ne kukokolokako, kabiji ne kubula kukizhamo kutamba TV, byonse bino byanema bingi. Wamukazhi umo wakwashapo kala bantu bapopomenwa kupichila mu kwendako nabo sabapimpauka. Kimye mwanamukazhi wapopomenwa kyo ambile’mba: “Kechi mbena kukeba kuya na kwenda ne,” uno mwanamukazhi na butekanye, bino na kukosa wakumbwile’mba: “Ee, mubena kuya.” Uno wamukazhi washimwine’mba: ‘Twaendele makilomita atanu na imo . Byo twabwelele, wakokele bingi, pano bino waumvwineko bulongo. Kechi mwakonsha kuyuka bukwasho bufuma mu kukayako makayo akosesha mubiji ne, kanatu mwakiakayako.’

Nangwa byonkabyo, kimye kimo kikatazha bingi kuleka kupopomenwa, nangwa kya kuba mwaeseka mashinda onse, kuvwangakotu ne kuya ku kipatela. Mwanamukazhi umo wakikulumpe waambile’mba “Na eseka bintu byonse pano bino kupopomenwa kechi kwapwa ne.” Mu jishinda jimotu, ano moba kechi kyakonsheka kubuka bampofu, bashinka matwi, nangwa bilema ne. Bino, bantu bapopomenwa bakonsha kutana lutekenesho ne luketekelo kupichila mu kutanga kimye kyonse Mambo a Lesa, apana luketekelo lwa kikupu lwa kukabuluka ku makatazho onse o bapitamo bantu.—Loma 12:12; 15:4.

Kimye Bantu kyo Bakabulanga Kupopomenwa

Kimye Yesu kyo alondolwelenga bintu byakatazha byaishilenga panopantanda mu moba a kupelako, wanungilepo amba: “Bino bintu pa kutatula kwiya, inukai, ne kwinuna mitwe yenu; mambo bukuzhi bwenu ke buji pepi.” (Luka 21:28) Yesu watongwelenga kupokololwa ne kutwela mu ntanda ipya ya Lesa ya bololoke, amo ‘bilengwa byonse nabyo mo bikapokololwa ku buzha bwa bubole, ne kwikala na bwana bwa bene bwa lukumo lwa baana ba Lesa.’—Loma 8:21.

Byo kikawamapo bantu kwikala bakasululwa ku bijikila byakala, ne kubukanga moba onse na milanguluko yawama sabenengezha kwingila mingilo ya jojo juba! Kechi kabiji kukekalapo muntu ukapopomenwanga ne. Mulaye wakine ku bantu ke wa kuba’mba Lesa “ukashimuna mipolo yonse ku meso abo; ne lufu kechi lukekalako jibiji ne; nangwa mabingo, nangwa kujila, nangwa misongo, kechi bikekalako jibiji ne: bintu bitanshi byapichijila.”—Lumwekesho 21:3, 4.

Binembelo byo twaingijisha byafuma mu Buku wa Lesa wa Kikaonde, kana twamwesha ungi. Paji Kinembelo umvwe panembwa NW, kibena kulumbulula kuba’mba abyo byambo byatuntululwa kufuma mu Baibolo wa New World Translation of the Holy Scriptures.