1. Nanchi Twafwainwa Kupamo Lesa Mambo Pa Makatazho O Tupitamo Nyi?
Ene Mambo o Kyanemena Kuyuka Mukumbu wa Buno Bwipuzho
Bantu bavula kechi bapopwela Lesa ne, mambo balanguluka’mba ye ulengela makatazho o bapitamo.
Bya Kulangulukapo
Bantangi ba bupopweshi bavula bafunjisha’mba Lesa ye ulengela makatazho. Bamo bamba’mba:
Bya malwa biyakotu bine ke jishinda jimo Lesa jo akambwilamo bantu.
Baana ba bacheche bafwa na mambo a kuba Lesa ukeba bamalaika bavula mwiulu.
Lesa utundaika nkondo ilengela bantu kupita mu makatazho.
Nanchi byamba bano bantangi ba bupopweshi bya kine nyi? Inge Lesa wakana mpopwelo ya bano bantangi ba bupopweshi, abya kijitu bulongo kulondela byo bamba nyi?
YUKILAIPO NE BIKWABO
Tambai vidyo wa kuba’mba Mambo ka a Kufunjila Baibolo? uji pa jw.org.
Byaamba Baibolo
Lesa kechi ye ulengela makatazho o tupitamo ne.
Inge Lesa ye ulengela makatazho o tubena kupitamo, bino byakonsha kupusenamo bingi na byubilo byanji byo batongola mu Baibolo. Nabiji:
“Mashinda anji [Lesa] onse aoloka. . . . waoloka kabiji uba byaoloka.”—MPITULUKILO YA MU MIZHILO 32:4.
“Lesa wa kine kechi uba bubi nangwa pachechetu ne, Wa Bulume Bonse kechi uba bintu byatama ne!”—YOBA 34:10.
“Wa Bulume Bonse kechi uchibila mambo mo abula kolokela ne”—YOBA 34:12.
Lesa washikwa bupopweshi bwa bubela
Mu bupopweshi bwa bubela mwavwangwa ne bupopweshi bufunjisha’mba Lesa ye ulengela makatazho o tupitamo, kutundaika nkondo ne kwipayañana.
‘Bangauzhi babena kwaula bya bubela mu jizhina jami. Amiwa kechi nebatuma nangwa kwibakambizha nangwa kwibambilapo kintu ne. Babena kwaula ne kwimubuula bimwesho bya bubela . . . ne bya bujimbijimbi bikeba michima yabo.’—YELEMIYA 14:14.
Yesu wanenene bantangi ba bupopweshi bajinga bakamfutumfutu.
“Kechi bonse bañambila’mba, ‘Nkambo, Nkambo,’ bakatwela mu Bufumu bwa mwiulu ne, kana yenka uba kyaswa muchima wa Tata wa mwiulu ye ukatwelamo. Pa joja juba, bavula bakañambila’mba: ‘Nkambo, Nkambo, nanchi kechi twaawilenga mu jizhina jenu ne kupanga bandemona kwingijisha jizhina jenu nenyi? Kabiji nanchi kechi twaubilenga mingilo ya kukumya mu jizhina jenu nenyi?’ Ponkapo nkebambila namba: ‘Kechi nemuyuka ne! Fumai papo, anweba muba byatama!’”—MATEO 7:21-23.