Temwainga Bakwenu

Kilengela Kubula Kutemwa Bakwetu

Misalululo kechi ifumamo bukiji mu muchima ne. Byonkatu kalongolo kaleta kikola byo kabula kufumamo bukiji mu mubiji, ne misalululo nayo pa kuba’mba ifumemo pabanda kabiji kikebewa kwibikako. Pano mwakonsha kuba byepi pa kuba’mba misalululo ifumemo mu muchima wenu?

Mafunde a mu Baibolo Akonsha Kwimukwasha

“Vwalai butemwe, mambo butemwe bukwatankanya bantu bulongo.”—KOLOSE 3:14.

Kino kinembelo kibena kulumbulula ka? Kubila bakwetu bintu byawama kukosesha bulunda. Inge ke tumweshe bakwetu butemwe, misalululo ikafumamo mu muchima wetu. Kabiji inge twatemwa bantu kechi tukebalangulukilanga byatama ne.

Byo Mwafwainwa Kuba

Monaingapo mashinda o mwakonsha kumwesheshamo butemwe bantu bo mwalengulula. Pa kumwesha butemwe kechi amba kanatu mu bintu bikatampe ne. Esakai kubapo kimo pa bino:

• Mwakonsha kushinkwilako muntu kinzhilo nangwa inge muji mu sakya mwakonsha kufuminapo muntu pa kipona.

• Kwisamba na bantu mu mulaka wabo nangwatu kwambakotu byambo bicheche mu mulaka wabo.

• Mwafwainwa kutekanya inge baubapo bintu bimo byo mwabula kuyuka.

• Mwafwainwa kumwesha lusa inge babena kwimubuula makatazho o babena kupitamo.