Ene Mambo o Kyawamina Kuyuka’mba Kuji Walengele Bintu Byonse

Mambo ka o twafwainwa kuswila’mba kuji walengele bintu byonse? Inge mwaitabila kuba’mba Lesa wa bulume bonse ko aji, monai bishinka bimwesha’mba Baibolo wanembelwe na lutangijilo lwa mupashi wazhila. Kabiji inge mwaketekela byaamba Baibolo kikemukwasha kumwenamo bintu byavula bingi.

Mukekala bulongo mu bwikalo bwenu

BAIBOLO WAAMBA’MBA: “[Lesa] waubile byawama kupichila mu kwimupa mvula ne kimye kipilamo kajo saka emupa kajo kavula ne kulengela michima yenu kusangalala.”—Byubilo 14:17.

MWATALA BINO BYAMBO: Bintu byonsetu byo mwiyowa biji pano pa ntanda ke bupe kufuma kwi Lesa witulengele. Kuyuka kuba’mba witupa bya bupe wituta bingi muchima kwitulengela kumutemwa ne kumusanchila bingi.

Yukai mafunde awama afwainwa kwimukwasha mu bwikalo bwenu

BAIBOLO WAAMBA’MBA: “Ukayuka mwatala bololoke ne bunchibamambo bwaoloka ne kubula misalululo, ne mashinda onse a bintu byawama.”—Byambo bya Maana 2:9.

MWATALA BINO BYAMBO: Byo aji Mulenga wenu, Lesa wayuka bintu byo mukeba pa kuba’mba mwikale na lusekelo. Inge ke mutange Baibolo, mukafunda bintu byavula bingi bikemukwasha mu bwikalo bwenu.

Mikumbu ya mepuzho o muji nao mwakonsha kwiitaana mu Baibolo

BAIBOLO WAAMBA’MBA: “Ukamuyuka Lesa.”—Byambo bya Maana 2:5.

MWATALA BINO BYAMBO: Kuyuka’mba walengele bintu byonse ko aji kukemukwasha kutaana mikumbu yawama ya mepuzho o muji nao nabiji a kuba’mba: Nanchi Lesa witulengejile ka? Mambo ka buyanji o bwavujila bibye? Ñanyi kintu kimweka inge muntu wafwa? Mikumbu ya ano mepuzho mwafwainwa kwiitaana mu Baibolo.

Ketekelai’mba bintu bikawama bingi kulutwe

BAIBOLO WAAMBA’MBA: “‘Amiwa nayuka bintu byo mbena kulanguluka kwimubila, mbena kulanguluka kwimuletela mutende kechi bya malwa ne, kwimulengela kwikala na luketekelo ne bwikalo bwawama bwa kulutwe,’ byo byaamba Yehoba.”—Yelemiya 29:11.

MWATALA BINO BYAMBO: Lesa witulaya’mba kulutwe ukafumyapo bubi bonse, kuyanda ne lufu. Kuketekela mu milaye ya Lesa kwakonsha kwimukwasha kuyuka mwa kubila na makatazho o mubena kupitamo kwa kubula moyo.

Bantu bamo byo bamwenamo bintu byawama mu kuketekela mwi Lesa

Ba Cyndi bekala ku U.S.A baambile’mba: “Kimye kyonse ngikala bingi na lusekelo pa kumona Lesa byo etukwasha mu bwikalo bwetu. Witukwasha kuyuka bintu byanema byo twafwainwa kutangizhako mu bwikalo bwetu, bya kwikala bulongo na bakwetu ne byo twafwainwa kwikala balunda ne Lesa.”

Ba Elise bekala ku France baambile’mba: “Kuketekela mwi Lesa kwalengela bwikalo bwami kuwama bingi. Onkao mambo, byo naitabila mwi Lesa kechi ñumvwa mukose ne. Mambo kuji bintu byavula bingi byo nafwainwa kufunda pe Lesa, pa bintu byo alenga ne pa Mambo anji Baibolo.”

Ba Peter bekala ku Netherlands baambile’mba: “Kwingijisha bintu biji mu Baibolo bitufunjisha Mulenga wetu kwandengela kwikala na lusekelo mu bwikalo bwami. Kwankwasha kuleka kuzhachisha bakwetu. Aluno nkwasha bingi bakwetu bakajilwa ne kusekela na bintu byonka byo nji nabyo. Kabiji kwankwasha kwikala nsemi wamulume wawama muchima.”

Ba Liz bekala ku Estonia baambile’mba: “Saka nkyangye kufunda pe Lesa, amiwa natemenwetu kuja, kulaala kabiji nakelwanga bingi pa kuya ku nkito. Bijikila byamvujijile bingi. Pano luno, popo nayuka’mba bumi ke bupe bwitupa Lesa kabiji bwanema bingi.”

Ba Adrien bekala ku France baambile’mba: “Amiwa nji bingi na muchima wakwakamwa. Bino kuyuka’mba bubi bonse, nshiji ne kuyanda konse bikapwa, kunkwasha bingi kuchinchika.”