LUFUNJISHO 02

Baibolo Witubuula Bintu Byawama Biji Kulutwe

Buku ye Bapulinta

Bantu bavula lelo jino babena kupita mu makatazho avula bingi. Ano makatazho abena kwibalengela kwikala bingi na bulanda, bijikila ne kukolwa. Nanchi ne anweba mubena kupita mu bintu bya uno mutundu nyi? Kimye kimo kampe muji na bijikila na mambo a kuba mulongo wenu ubena kukolwa nangwa na mambo a kufwisha mulongo wenu nangwa mulunda nenu. Mwafwainwa kwiipuzha’mba, ‘Nanchi ano makatazho kine akapwa nyi?’ Baibolo wakumbula ano mepuzho.

1. Ñanyi bintu byaamba Baibolo bitukwasha kwikala na luketekelo?

Baibolo walumbulula ene mambo makatazho kyo avujila pano pa ntanda. Kabiji witubuula ne kuba’mba katatakatu Lesa akafumyepo makatazho onse aji pano pa ntanda. Milaye iji mu Baibolo yafwainwa “kwimulengela kwikala na luketekelo ne bwikalo bwawama bwa kulutwe” (Tangai Yelemiya 29:11, 12.) Kuketekala mu ino milaye kwitukwasha kuchinchika ne kwitulengela kwikala na lusekelo. Kabiji ino yonka milaye itulengela kushiinwa kuba’mba tukatwajijila kwikala na lusekelo myaka ne myaka.

2. Baibolo witubuula’mba bwikalo bukekala byepi kulutwe?

Baibolo walumbulula bwikalo bwa kulutwe byo bukekala amba, “lufu, mabingo, kujila ne misongo kechi bikekalako jibiji ne.” (Tangai Lumwekesho 21:4.) Makatazho onse nabiji buyanji, nshiji, kukolwa ne lufu kechi akekalako jibiji ne. Baibolo waamba’mba bantu bakekalanga bingi bulongo myaka ne myaka mu paladisa pano ntanda.

3. Mwafwainwa kuba byepi pa kuba’mba mushiinwe’mba byonse byaamba Baibolo bikafika?

Bantu bavula bebalaya kwibobila bintu byawama ku bakwabo, pano bino bintu byo bebalaya kechi bebifikizha ne. Pakuba byonse byaamba Baibolo bifika. Twafwainwa kuketekela byonse byaamba Baibolo kupichila mu “kubalaula bulongo Binembelo.” (Byubilo 17:11) Onko mambo, inge mubena kutanga Baibolo, anweba bene yenu mwafwainwa kuketekela byo aamba pa bikamweka kulutwe nangwa ne.

FUNJILAIPO BIKWABO

Tangai milaye imo iji mu Baibolo pa bintu byawama bikamweka kulutwe. Monai kuketekela mu milaye iji mu Baibolo byo kubena kukwasha bantu lelo jino.

Bipikichala: Bipikichala bibena kumwesha bintu bibena kupitamo bantu lelo jino ne bintu byawama bya kulutwe byaambapo Baibolo. Bipikichala bintutu bimo bebibwezhapo panshipo.

4. Baibolo witulaya’mba tukekala na bumi bwa myaka ne myaka

Monai milaye imo iji mu Baibolo. Ñanyi mulaye umo ye mukebesha kuba’mba afike? Mambo ka o mukebela kuba’mba afike bukiji?

Tangai binembelo biji pa ino milaye ne kukumbula ano mepuzho:

Nanchi mwalanguluka’mba bino binembelo byafwainwa kwimukwasha kwikala na luketekelo nyi? Abya byafwainwa kukwasha kisemi kyenu ne balunda nenu nyi?

Fwanyikizhai kwikala mu ntanda

MWABULA . . .	ATWEBA BONSE . . .
misongo, kukota nangwa lufu.—Isaya 25:8.	mo tukatambwila balongo ne balunda netu bafwa bo bakasangula pano pa ntanda.—Yoano 5:28, 29.
bikola nangwa bulema.—Isaya 33:24; 35:5, 6.	mo tukekalanga kwa kubula kukolwa ne kwikala na mibiji ya bwanyike.—Yoba 33:25.
nshiji.—Isaya 32:16, 17.	mo tukekalanga na kajo kavula, kwikala na mazubo awama ne kwingila mingilo yawama.—Salamo 72:16; Isaya 65:21, 22.
nkondo.—Salamo 46:9.	mo tukekalanga mu mutende.—Salamo 37:11.
bijikila ne makatazhotu akwabo.—Isaya 65:17.	mo tukekalanga bwikalo bwawama myaka ne myaka.—Salamo 37:29.

Mwana wakolelwe wakosa kabiji wakumbachilamo bainanji.

Mwanamulume wajinga mukote wabwela ku bwanyike kabiji wasenda ne bishu mungolofwana.

5. Byaamba Baibolo bikwasha bingi

Bantu bavula ano moba baji bingi na bijikila, bamo kibakola bingi ku muchima na mambo a makatazho aji mu ino ntanda. Bakwabo bakebesha bingi kuba’mba bapwishe ano makatazho. Monai mulaye wa mu Baibolo wa kuba’mba bintu bikawama kulutwe byo abena kukwasha bantu bavula lelo jino. Tambai VIDYO, ne kwisamba ano mepuzho.

VIDYO: Nakebelenga Kupwisha Nshiji (4:07)

Bipikichala biji mu vidyo wa kuba’mba ‘Nakebelenga Kupwisha Nshiji.’ 1. Ba Rafika saka bakiji banyike babena kwapa kotonyi na bantu bamba mulaka wabo. 2. Ba Rafika batemenwe bingi kumona bantu ba mu bisho byapusa pusana saka bakwatankana kimye kitanshi kyo batainwe ku kushonkena kwa Bakamonyi ba kwa Yehoba.

Mu vidyo ye mwatamba, ñanyi nshiji yapichilemo ba Rafika?
Nangwa kya kuba nshiji yo bapichilemo kechi yapwile ne, Baibolo wibakwashishe byepi?

Inge twashiinwa’mba byaamba Baibolo pa bintu bya kulutwe bikafika, kechi tukalefulwa ne. Nangwa kya kuba tukapite mu makatazho avula byepi tukatwajijila kuchinchika. Tangai Byambo bya Maana 17:22 ne Loma 12:12, ne kwisamba ano mepuzho:

Nanchi kuketekela mu bintu bya kulutwe byaambapo Baibolo kwafwainwa kwimukwasha mu bwikalo bwenu ano moba nyi? Mambo ka o mwakumbwila’mba kwafwainwa kwimukwasha?

BANTU BAMO BAMBA’MBA: “Byaamba Baibolo pa bwikalo bwa kulutwe kechi bikafika ne.”

Mambo ka o kyawamina kwikebela bishinka anweba bene bimwesha’mba byaamba Baibolo bikafika?

ÑANYI BISHINKA BYO MWAFUNDA?

Mu Baibolo muji milaye yavula bingi yaamba pa bwikalo bwa kulutwe. Byaamba Baibolo bitukwasha kuyuka mwa kubila na makatazho ne kwitulengela kwikala na lusekelo.

Mepuzho a kupitulukamo

Mambo ka bantu o bafwainwa kuyukila bintu bitulaya Lesa?
Baibolo waambapo’mba ka pa bwikalo bwa kulutwe?
Kuketekela mu milaye iji kulutwe kwafwainwa kwimukwasha byepi lelo jino?

Mwapwisha kufunda pa:

Ubai bino

Pa juba pa juba tangainga binembelo biji mu uno mutwe pa kuba’mba muyuke milaye ya mu Baibolo.

Bikwabo:

Your other goal

KEBAI BISHINKA BIKWABO

Akimonai kuketekela mu milaye ya kulutwe byo kwafwainwa kukwasha babena kukolwa bikola bibula kupwa.

“Nanchi Baibolo Wakonsha Kwimukwasha Kuyuka mwa Kubila na Kikola Kibula Kupwa Nyi?” (Kibaaba kiji pa jw.org)

Inge mubena kutamba uno vidyo wa nyimbo, fwanyikizhai muji mu paladisa pamo na balongo benu.

Fwanyikizhai Ntanda Ipya (3:37)

Tangai jishimikila ja uno muntu watalanga pa bwikalo bwa bantu byo apimpwile byubilo byanji na mambo a kufunda byaamba Baibolo pa bwikalo bwa kulutwe.

“Pano Nayuka Amba Kechi Nakonsha Kupimpula Bintu mu Ntanda Ne” (Kyamba kya Usopa, July 1, 2013)