Bya Kutaana Luketekelo mu Mwaka wa 2024—Baibolo Waambapo’mba Ka?

Bantu bavula babena kulanguluka’mba kechi bakayuka mwakubila na makatazho akamweka mu uno mwaka wa 2024 ne. Nangwa byonkabyo, twakonsha kwikala na luketekelo lwa kuba’mba bintu bikawama kulutwe. Kwepi ko twakonsha kutaana luno luketekelo?

Baibolo witupa luketekelo

Baibolo waamba’mba Lesa ukapwisha makatazho o tupitamo mu bwikalo bwetu etupezha maana. Katatakatu Lesa ‘akashimune mipolo yonse ku meso [etu], ne lufu, mabingo, kujila ne misongo kechi bikekalako jibiji ne.’—Lumwekesho 21:4.

• Pa kuba’mba mufunjilepo byavula pa milaye iji mu Baibolo yaamba pa bintu bikamweka kulutwe, tangai kibaaba kya mu Kizungu kya kuba’mba “A Real Hope for a Better Tomorrow.”

Baibolo byo akonsha kwimukwasha pa kino kimye

Luketekelo luji mu Baibolo lwa kuba’mba bintu bikawama kulutwe lwakonsha kwimukwasha kuleka kulanguluka’mba makatazho kechi akapwa ne, ne kwimulengela kwikala na mmweno yawama ya bintu biji kulutwe. (Loma 15:13) Kabiji mafunde aji mu Baibolo akonsha kwimukwasha kuyuka mwakubila na makatazho o mubena kupitamo nabiji buyanji, nshiji ne kukolwa.

• Yukai Baibolo byo yakwashishe mwanamulume umo kwikala mu mutende ne na lusekelo nangwa kya kuba wakomejile mu buyanji. Tambai vidyo wa mu Kizungu wa kuba’mba Juan Pablo Zermeño: Jehovah Gave Me a Meaningful Life.

• Yukai Baibolo byo akonsha kwimukwasha kubula kukizhamo kwizhachisha, kulefulwa, kwikala na bijikila ne bya kuba inge muntu ye mwatemwa wafwa. Tangai kibaaba kya mu Kizungu kya kuba’mba “Can I Find Words of Comfort in the Bible?”

• Monai mwanamukazhi wajinga mushilikale walangulukanga’mba “watamine muchima kabiji kechi watele bantu muchima ne,” byo ataine luketekelo mu kufunda Baibolo. Tambai vidyo wa mu Kizungu wa kuba’mba I Put Down My Rifle.

Lengai mwaka wa 2024 kwikala wa lusekelo kwi anweba ne kisemi kyenu. Funjilaipo byavula pa Baibolo byo akonsha kwimukwasha. Tubena kwimutundaika kufunda Baibolo kyatutu kwingijisha mutanchi wetu. Yukai Lesa byo akonsha kwimupa “mutende” pa kino kimye ne “kwimulengela kwikala na luketekelo ne bwikalo bwawama bwa kulutwe.”—Yelemiya 29:11.