BAIBOLO UPIMPULA BWIKALO BWA BANTU
“Pano nayuka amba kechi nakonsha kupimpula bintu mu ntanda ne”
Byashimikizha ba Jukka Sylgren
MWAKA WA KUSEMWA: 1966
KYALO: FINLAND
MWAPITA BWIKALO BWABO: MWINGILO WA KUZHIKIJILA BILENGWA
BWIKALO BWA KALA: Kufumatu ku bwanyike natemenwe bingi bilengwa. Javula kisemi kyami batemwanga kuya na kufwakasha ku mapunzha awama kwajinga mitwanshi ya bichi ne ku bizhiba byazhokolokele muzhi ye twaikalangamo wa Jyväskylä wajinga mu kyalo kya Finland. Kabiji natemwa ne banyama bingi. Kimye kyo najinga mwanyike, nakebanga kwikumbata na tumenshi ne bakabwa bo namonanga na kupita. Byo nakomene, naumvwanga kutama byo namonanga bantu byo bayanjishanga banyama. Mu kuya kwa kimye, natwelele mu kipamo kitala pa banyama ko nakataine bantu batemenwe banyama byonka byo nebatemenwe.
Twapitañanangamo kipekenyi na kufunjisha bantu pa bya kulama banyama. Twasampenyenga bipepala ne kutuma bantu bakanyishenga kwipaya banyama ne kuya mu mashitolo mwatanwanga boya bwa banyama kabiji ne mu bibamba mo bapiminanga banyama. Twalengele ne kipamo kikwabo kizhikijila banyama. Na mambo a kuba’mba twiyeekele na mukwekele wetu wa kukeba kuvimbila banyama, kino kyalengejile kafulumende kwitukatazha. Bankashile bimye byavula ne kuntwala ku kije kya mambo.
Byo naingijilenga uno mwingilo wa kuzhikijila banyama, kwajinga makatazho akwabo o napichilengamo. Mu kuya kwa kimye, najinga mu bipamo byavula bingi kubikakotu ne bya Amnesty International ne Greenpeace. Neeyekele bingi kutundaika bino bipamo. Nachibilangako lūsa bantu bayanji, babujile kajo ne bantutu bakwabo bayandanga.
Natendekele kuyuka kuba’mba kechi nakonsha kupimpula bintu mu ntanda ne. Nangwa kya kuba bino bipamo byaesekele kupwishako makatazho amo, bino makatazho aijilengakotu na kuvula. Kyajingatu nobe bubi bwakumbanatu ntanda yonse kabiji kafwako muntu wateleko maana ne. Kino kyandengejile kukokatu zubulu.
BAIBOLO BYO APIMPWILE BWIKALO BWAMI: Na mambo a bulanda ne kubula muntu wa kunkwasha, natendekele kulanguluka pe Lesa ne Baibolo. Nafundanga kala Baibolo na Bakamonyi ba kwa Yehoba. Nangwa kya kuba Bakamonyi bajinga na lusa ne kunta muchima, kechi napimpwile bwikalo bwami ne. Pa kino kimye bintu byaalukile.
Natolele Baibolo wami ne kutendeka kutanga. Wantekeneshe bingi. Namwene bibaba byavula bingi bya mu Baibolo byaambilenga pa byo twafwainwa kulama bulongo banyama. Kyakumwenako, Byambo bya Mana 12:10 pa aamba’mba “muntu waoloka utesha muchima ne ku mweo wa nyama wanji.” Kabiji namwene ne kuba’mba Lesa kechi ye ulengela makatazho aji pano pa ntanda ne. Bino nayukile kuba’mba kilengela makatazho ke na mambo a kuba’mba bantu bavula kechi balondela mashinda a Lesa ne. Kyansangajikile bingi pa kufunda pa butemwe bwa Yehoba ne kukoka muchima kwanji.—Salamo 103:8-14.
Namwene ka kupashi po bamwesha buku wa Nanchi Baibolo Kine Ufunjisha’mba Ka? nanembelepo ne kwikatuma. Kechi papichiletu ne moba avula ne, bamulume ne mukazhi Bakamonyi baishile ne kungipuzha umvwe nakonsha kutemwa kufunda Baibolo, kabiji naswile. Natendekele ne kutanwa kukupwila pa Nzubo ya Bufumu. Ko kyakayanga, natendekele kutemwa bintu byo nafunjilenga mu Baibolo.
Nasanchila bingi Baibolo, mambo yandengela kupimpula bwikalo bwami. Nalekele kupepa fwanka ne kukizhamo kutoma. Mwekelo yami ne ñambilo yawamine. Kabiji napimpwile byubilo byami pa byo namonanga kafulumende. (Loma 13:1) Nalekele ne byubilo byami byatama byankatazhanga kwibileka.
Kintu kyankatezhe bingi ke kwikala na mweno yawama pa bipamo bitala pa lūsa lwa bantu ne banyama. Kechi napimpwiletu juba jimo ne. Patanshitu, nalangulukilenga kuba’mba umvwe ndeke kutundaika bino bipamo kisakumweka nobe nafutukilamo bino bipamo. Pano bino, nayukile kuba’mba Bufumu bwa Lesa bo bukapimpula ntanda. Natendekele kutundaika bonka buno Bufumu kupichila mu kufunjisha bantu bukine.—Mateo 6:33.
BYO NAMWENAMO: Byo naingilanga mwingilo wa kukeba kupimpula bintu, naabanyanga bantu mu mabumba abiji ko kuba’mba bawama ne batama. Kabiji nakebanga kukambula bonse bo namonanga amba batama. Mbena kusanchila Baibolo mambo luno kechi nashikwa bantu ne. Bino nebikishako kukeba kwikala na byubilo bya bwina Kilishitu bya kutemwa bantu bonse. (Mateo 5:44) Jishinda jikwabo jo mmwesheshamo kuba’mba natemwa bantu, ke kwibasapwila mambo awama a Bufumu bwa Lesa. Nji bingi na lusekelo pa kumona uno mwingilo wawama ubena kutundaika bantu kwikala mutende, balusekelo ne kwibalengela kwikala na luketekelo lwa kine lwa kulutwe.
Nji na jiwi ja mu muchima jatoka pa kulekela bintu byonse mu maboko a Yehoba. Nashiinwa kuba’mba byo aji Mulenga wetu, kechi ukaleka banyama ne bantu kwibamanyika myaka ne myaka nangwa kuswisha bantu konauna ntanda yetu yawama ne. Bino Bufumu bwanji katatakatu bukawamishe bintu byonse byaonaika. (Isaya 11:1-9) Kuyuka bukine ne kukwasha bantu kuketekela mu bino bintu byawama kunsangajika bingi. Pano nayuka amba kechi nakonsha kupimpula bintu mu ntanda ne.
[Byambo biji pa Kipikichala pa peja 12]
Animalia