Twajijilai Kwikala na Luketekelo Lwakosa

1. Ñanyi bintu Yehoba byo etulaya?

YEHOBA walaya kwitupa bumi bwa myaka ne myaka. Bamo bakekala bilengwa bya mupashi myaka ne myaka mwiulu. (1 Ko. 15:50, 53) Bantu bakwabo bavula bakela na bumi bwa myaka ne myaka pano pa ntanda kechi bakakolwanga ne kabiji bakekala bingi na lusekelo. (Lum. 21:3, 4) Inge tukekala na bumi bwa myaka ne myaka pano pa ntanda nangwa tukaya mwiulu, twafwainwa kwikala na luno luketekelo lwanema bingi.

2. Luketekelo lwetu lwaimena pa ñanyi kintu, kabiji mambo ka o twaambila byobyo?

² Kyambo kyatuntululwa mu Baibolo amba “luketekelo,” kilumbulula bintu byawama bikamweka kulutwe. Twafwainwa kuketekela’mba bintu byonse bitulaya Yehoba bikafika. (Loma 15:13) Twayuka bintu byo etulaya kabiji kechi ubula kufikizha bintu byo alaya ne. (Bala. 23:19) Twashiinwa kuba’mba Yehoba uji bingi na bulume kabiji ukebesha bingi kufikizha milaye yanji. Onkao mambo, kechi twaketekela mu bintu bikabula kumweka nangwa bintu bya kufwanyikizhatu ne. Pakuba twaketekela mu bintu bikamweka.

3. Ñanyi bintu byo tusakwisambapo mu uno mutwe? (Salamo 27:14)

³ Shetu wa mwiulu witutemwa bingi, kabiji ukeba atweba kumuketekela. (Tangai Salamo 27:14.) Inge twaikala na luketekelo lwakosa mwi Yehoba tukakonsha kuchinchika meseko onse o twakonsha kupitamo na lusekelo. Pano twayai twisambe pa luketekelo byo lwakonsha kwitukwasha. Patanshi tukisambe pa luketekelo byo belwesakanya ku kimiko ne kampompo. Kepo tusakwisamba ne pa byo twakonsha kwikala na luketekelo lwakosa.

LUKETEKELO LWETU LUJI NOBE KIMIKO

4. Mambo ka o baesakenya luketekelo lwetu ku kimiko? (Bahebelu 6:19)

⁴ Mu nkalata Paulo yo anembejile Bahebelu, waambile’mba luketekelo lwetu luji nobe kimiko. (Tangai Bahebelu 6:19.) Na mambo a kuba waendele mu bwato pa kimye kyabaya Paulo wayukile kimiko byo kilengela bwato kubuula kukumpulwa. Juba jimo, byo ajinga mu bwato kwaishile luvula lwabaya bingi. Na mambo a kuchina kuba’mba bwato bwakepaaka ku mabwe bavuwa bwato baikizhe bimiko pa mema. (Byu. 27:29, 39-41) Byonka biji kimiko luketekelo lwetu lwitulengela kufwenya kwipi ne Yehoba inge ketupite mu makatazho aji nobe luvula mukatampe. Luketekelo lwetu lwakosa lwitulengela kushikimana ne kubula kulukusha muchima kimye kyo tubena kupita mu makatazho mambo twaitabila kuba’mba bintu bikawama kulutwe. Vulukai kuba’mba Yesu witujimwineko’mba baketumanyikanga. (Yoa. 15:20) Kulanguluka languluka pa milaye ya Yehoba kwitukwasha kutwajijila kumwingijila.

5. Luketekelo lwakwashishe byepi Yesu pa juba ja lufu lwanji?

⁵ Akimonai luketekelo byo lwakwashishe Yesu kutwajijila kwikala wa kishinka nangwa kya kuba wayukile’mba ukafwa lufu lwatama. Pa juba ja Pentekosita 33 C.E., mutumwa Petelo waambile byambo biji mu buku wa Masalamo byalumbulula bintu byalengejile Yesu kubuula kulukusha muchima bya kuba’mba: “Amiwa nkekala na luketekelo; mambo amiwa kechi mukandekela mu Kilende ne, nangwa kuswisha kalume wenu wa kishinka kubola ne. . . . Mukandengela kwikala na lusekelo monka mu kyenyi kyenu.” (Byu. 2:25-28; Sala. 16:8-11) Nangwa kya kuba Yesu wayukile kuba’mba ukafwa, wajinga na luketekelo lwa kuba’mba Lesa ukamusangula. Kabiji wajinga na lusekelo mambo wayukile’mba ukabwela mwiulu ne kwikala pamo na Shanji.—Hebe. 12:2, 3.

6. Mulongo umo waambilepo’mba ka pa luketekelo?

⁶ Luketekelo lwakwasha balongo ne banyenga bavula bingi kuchinchika makatazho. Akilangulukai pa mulongo Leonard Chinn wikala mu kyalo kya England byo atwajijile kwikala wa kishinka. Mu kimye kya Nkondo Itanshi ya Ntanda Yonse, bamutayile mu kaleya na mambo a kukana kwikala mushilikale. Pa bañondo babiji waikele mu kaleya ka bunke. Kabiji bano bañondo babiji byo bapwile batendekele kumukanjikizha kwingila mingilo yakosa. Wanembele’mba: “Bintu byo napichilemo, byandengejile kuvuluka kuba’mba luketekelo lwakonsha kwitukwasha kuchinchika makatazho. Bintu byamulengejile kuchinchika ke kulanguluka pa bintu byapichilemo Yesu, batumwa, bangauzhi ne milayetu ikwabo yanema yo baambapo mu Baibolo. Abino byonse bitulengela kuketekela mu bintu bya kulutwe ne kwitulengela kuchinchika.” Luketekelo lwa kwa Leonard lwajinga nobe kimiko kabiji lwakonsha kwikala nobe kimiko ne kwi atweba.

7. Makatazho o tupitamo etulengela byepi kwikala na luketekelo lwakosa? (Loma 5:3-5; Yakoba 1:12)

⁷ Umvwe twachinchika meseko ne kumona Yehoba byo etukwasha kitulengela kushiinwa’mba twaitabilwa kwi aye. Kino kitulengela kwikala na luketekelo lwakosa. (Tangai Loma 5:3-5; Yakoba 1:12.) Onkao mambo, luketekelo lwetu lukosa bingi kukila kimye kyo twatatwile kufunda bukine. Satana ukeba’mba twikalenga na bijikila na mambo a meseko o tupitamo pa juba pa juba. Pano bino na bukwasho bwa Yehoba twakonsha kuchinchika makatazho onse.

LUKETEKELO LWETU LUJI NOBE KAMPOMPO

8. Mambo ka luketekelo lwetu o lwaikela nobe kampompo? (1 Tesalonika 5:8)

⁸ Kabiji Baibolo waesakanya luketekelo lwetu ku kampompo. (Tangai 1 Tesalonika 5:8.) Mushilikale uvwala kampompo kuchiina’mba balwanyi banji bakamukozha ku mutwe. Byo tulwa na Satana tuzhikijila milanguluko kuchiina’mba Satana wakonauna milanguluko yawama. Witweseka mu mashinda avula bingi ne kukeba konauna milanguluko yetu. Byonkatu kampompo byo kazhikijila mutwe wa mushilikale, luketekelo nabo luzhikijila milanguluko yetu pa kuba’mba tutwajijile kwikala ba kishinka kwi Yehoba.

9. Ñanyi kintu kimweka inge bantu babula kwikala na luketekelo?

⁹ Kuketekela kuba’mba tukekala na bumi bwa myaka ne myaka kulutwe kwitulengela kwikala na maana ne kufuukula bintu bulongo. Inge twabula kutwajijila kukosesha luketekelo lwetu ne kutatu muchima ku bintu bitutokesha ku muchima atweba bene kyakonsha kwitulengela kubula kwikala na bumi bwa myaka ne myaka kulutwe. Akilangulukai pa kyamwekejile bena Kilishitu bamo baikalanga mu Kolinda. Balekele kulanguluka pa bintu byanema bibalayile Lesa. Balekele kuketekela mu lusanguko. (1 Ko. 15:12) Paulo wambile’mba aba bonse babuula kuketekela mu lusanguko beubilatu bintu bibatokela ku muchima mu buno bwikalo. (1 Ko. 15:32) Lelo jino, bantu bavula babula kuketekela mu milaye ya Lesa beyeka na kukeba bintu bya mu bwikalo byo balanguluka’mba byo byakonsha kwibaletela lusekelo mu bwikalo bwabo. Nangwa byonkabyo, atweba twaketekela milaye ya kulutwe itulaya Lesa. Luketekelo lwetu luji nobe kampompo kazhikijila milanguluko yetu ne kwitukwasha kubula kulanguluka pa bintu byakonsha konauna bulunda bwetu ne Yehoba.—1 Ko. 15:33, 34.

10. Ñanyi bintu byo twafwainwa kuba pa kuba’mba tubule kwikala na milanguluko yatama?

¹⁰ Kabiji luketekelo lwetu lwakonsha kwitukwasha kubula kulanguluka’mba kechi twakonsha kuba bintu bitookesha Yehoba ku muchima ne. Kampe mwakonsha kulanguluka’mba kechi nafikilamo kwikala na bumi bwa myaka ne myaka ne. Mambo kechi nji na byubilo byawama ne. Kechi nakonsha kuba bintu bikeba Yehoba ne. Abino byo byaubile Elifwaza wibepekezhenga kwikala mulunda wa kwa Yoba. Elifwaza waambile’mba: “Muntu ufwa ye wa byepi kya kuba’mba ekale watoka?” Kabiji waambile pe Lesa’mba: “Aye kechi waketekela bazhila banji ne, kabiji nangwatu mwiulu kechi mwatoka ku meso anji ne.” (Yoba 15:14, 15) Buno bwajinga bubela bufita. Onkao mambo, mwafwainwa kuvulukanga’mba Satana ye ukeba’mba mwikale na milanguluko ya uno mutundu. Mambo wayuka’mba inge mwatwajijila kulanguluka bino, kechi mukatwajijila kwikala na luketekelo ne. Kechi mwafwainwa kwikala na ino milanguluko yatama ne, pakuba mwafwainwa kuta muchima ku milaye ya Lesa. Yukai’mba aye ukeba’mba mukekale na bumi bwa myaka ne myaka. Kabiji ukemukwasha pa kuba’mba mwikale bino.—1 Timo. 2:3, 4.

BINTU BYAKONSHA KWITULENGELA KUTWAJIJILA KWIKALA NA LUKETEKELO LWAKOSA

11. Mambo ka o twafwainwa kutekenya kimye kyo tubena kupembelela Lesa kufikizha milaye yanji?

¹¹ Kechi kyapela kutwajijila kwikala na luketekelo lwakosa ne. Twakonsha kutendeka kulanguluka’mba Lesa wabanda kufikizha milaye yanji. Bino Yehoba wa myaka ne myaka kabiji myaka yo tumona’mba yavula, kwi aye yakepa. (2 Pe. 3:8, 9) Ukafikizha bintu byo alaya mu kimye kyanji mwine. Kabiji kechi wakonsha kwibyuba na mambo a kubatu’mba tubena kwibikeba ne. Pano ñanyi kintu kyakonsha kwitukwasha kwikala na luketekelo lwakosa mu kino kimye kyo tubena kupembelela Lesa kufikizha milaye yanji?—Yako. 5:7, 8.

12. Ñanyi bintu byo mwakonsha kuba byo baambapo pa Bahebelu 11:1, 6 byakonsha kwimulengela kutwajijila kwikala na luketekelo lwakosa?

¹² Twakonsha kwikala na luketekelo lwakosa umvwe twafwenya kwipi ne Yehoba mambo aye ye ukafikizha bintu byonse byo etulaya. Pa kuba’mba twikale na luketekelo twafwainwa kwitabila’mba Yehoba ko aji kabiji amba “ye ufweta boba bamukebesha.” (Tangai Bahebelu 11:1, 6.) Umvwe kine twaketekela’mba Yehoba ko aji, tukatwajijila kuketekela’mba ukafikizha byonse byo alaya. Twayai twisambe pa bintu byakonsha kwitulengela kukosesha bulunda bwetu ne Yehoba kabiji biketulengela kutwajijila kwikala na luketekelo lwakosa.

13. Ñanyi bintu byakonsha kwitulengela kufwenya kwipi ne Lesa?

¹³ Lombainga kwi Yehoba ne kutanganga Mambo anji. Nangwa kya kuba kechi twakonsha kumumona Yehoba ne, bino twakonsha kufwenya kwipi ne aye. Twakonsha kwisamba nanji mu lulombelo, kabiji tuketekela’mba usakumvwa. (Yele. 29:11, 12) Twakonsha kuteleka ku bibena kwamba Lesa umvwe ketutange Mambo anji ne kulanguluka langulukapo. Inge twatanga pe Yehoba byo alamine bakalume banji ba kishinka bakala, luketekelo lwetu lukoselako. Byonse biji mu Mambo a Lesa “bebinembele’mba tufunjileko, kuba’mba mu kuchinchika kwetu ne mu lutekenesho lwa mu Binembelo twikale na luketekelo.”—Loma 15:4.

14. Mambo ka o twafwainwa kulangulukilanga pa bintu Yehoba byo aubila bantu bamo?

¹⁴ Langulukainga pa milaye Yehoba yo afikizha kala. Monai Lesa kyo aubijile Abalahama ne Sala. Bapitayijile pa jifumbi jo bakonsheshe kwikelapo na mwana. Nangwa byonkabyo, Lesa wibalayile kuba’mba bakekala na mwana. (Nte. 18:10) Abalahama waubilepo ka? Baibolo waamba’mba: “Wajinga na . . . lwitabilo lwa kuba’mba ukekala shabo bisaka bya bantu byavula.” (Loma 4:18) Nangwa kya kuba Abalahama kechi wayukile Lesa byo akafikizha kino kyo ebalayile ne, washiinwe kuba’mba kyo alaya kikafika. Uno mwanamulume wa kishinka kechi walefwilwepo ne. (Loma 4:19-21) Mashimikila a uno mutundu etufunjisha kuba’mba Yehoba ukafikizha milaye yanji nangwa kya kuba tubena kumona amba wabanda kwiifikizha.

15. Mambo ka o twafwainwa kulangulukilanga pa bintu bitubila Lesa?

¹⁵ Langulukainga pa bintu Yehoba byo emubila. Langulukainga pa byo mwamwenamo anweba bunke bwenu mu milaye ya Lesa imo yo afikizha kala iji mu Mambo anji. Yesu walayile’mba Shanji wa mwiulu uketupanga bintu byo tukeba mu bwikalo. (Mat. 6:32, 33) Kabiji walayile’mba Yehoba ukemupa mupashi wazhila inge mwamulomba. (Luka 11:13) Yehoba ufikizha ino milaye. Kampe mwakonsha kuvulukapo ne milaye ikwabo yo afikizha kala. Wimulaya kuba’mba ukemulekelako mambo, ukemutekenesha kabiji ukemupa bintu bikakonsha kwimukwasha kufwenya kwipi ne aye. (Mat. 6:14; 24:45; 2 Ko. 1:3) Umvwe kemulanguluke languluke pa byo emubila Lesa mukaketekela bingi bintu bikwabo byo emulaya kuba’mba ukebifikizha kulutwe.

SEKELAI MU LUKETEKELO

16. Mambo ka o twafwainwa kwambila’mba luketekelo ke bupe bwanema?

¹⁶ Luketekelo lwa kwikala myaka ne myaka ke bupe bwafuma kwi Lesa. Tubena kutengela bintu byawama kulutwe kabiji byo twaketekela’mba bikamweka. Luketekelo lwetu luji nobe kimiko, kitukwasha kuchinchika meseko nabiji kwitumanyika ne lufu. Kabiji luji nobe kampompo, ketuzhikijila ku milanguluko yatama kabiji ketulengela kuba bintu byawama. Luno luketekelo lo baambapo mu Baibolo lwitulengela kufwenya kwipi ne Yehoba kabiji lumwesha’mba Yehoba witutemwa bingi. Tumwenamo byawama bingi inge twatwajijila kwikala na luketekelo lwakosa.

17. Luketekelo lwetu lwituletela byepi lusekelo?

¹⁷ Mutumwa Paulo waambijile bena Loma mu nkalata yo ebanembejile’mba: “Sekelai mu luketekelo.” (Loma 12:12) Paulo wasangalele bingi mambo wayukile’mba inge watwajijila kwikala wa kishinka, ukekala na bumi bya myaka ne myaka mwiulu. Ne atweba twakonsha kusekela mu luketekelo mambo twashiinwa’mba Yehoba ukafikizha milaye yanji. Nyimbi wa masalamo wanembele’mba: “Ye mwine wa lusekelo awa . . . waketekela mwi Yehoba Lesa wanji, . . . yenka waikala wa kishinka myaka ne myaka.”—Sala. 146:5, 6.