Pembelelainga Yehoba Na Luketekelo Ne Kwikala Bakosa

“Pembelelai Yehoba: Kosai, ne muchima wenu achinchike; Ee kine, pembelelai Yehoba.”—SALAMO 27:14.

1. Luketekelo lwanemena ka, kabiji kino kyambo kyaingijishiwa byepi mu Binembelo?

LUKETEKELO lwa kine luji nobe kyeya kyasamisha. Lwitukwasha kubula kuta muchima ku meseko a ano moba, kana kutatu muchima kulutwe saka twakosa ne kwikala balusekelo. Yehoba ye yenkatu wakonsha kwitupa luketekelo lwa kine, kabiji luno luketekelo luji mu Mambo anji anembeshiwa na mupashi. (2 Timoti 3:16) Byambo bya kuba’mba “luketekelo,” “kuketekela” ne “ketekelainga” bitanwa bimye byavula bingi mu Baibolo, kabiji bilumbulula kuketekela kintu kyawama ne kufikizhiwa kwakyo.a Luno luketekelo kechi ke mulangulukotu ne, mambo mulanguluko kimo kimye kechi wikala ne na po aimena ne, kabiji kechi ufikizhiwa ne.

2. Lwitabilo lwamulengejile Yesu kwikala bwikalo bwa mutundu ka?

² Yesu byo apichilenga mu meseko ne makatazho, kechi watele muchima pa bwikalo bwa kyokya kimye ne, waketekejiletu mwi Yehoba. “Wakosejilemo mu kumanama [pa kichi kya lumanamo, NW] mambo a lusekelo lwamutujilwe kulutwe, ne kutako muchima ku bumvu ne, kabiji pano waikala konka ku kilujo kya jitanda ja Lesa.” (Bahebelu 12:2) Yesu byo atele muchima pa kutumbijika bumfumu bwa Yehoba ne kuzhijika jizhina ja Lesa, watwajijile kukokela Lesa, nangwa kya kuba wapichilenga mu makatazho a byepi ne byepi.

3. Lwitabilo lwingila ñanyi mwingilo mu bwikalo bwa bakalume ba Lesa?

³ Mfumu Davida watongola luketekelo ne kukosa byo bingijila pamo, amba: “Pembelelai Yehoba: Kosai, ne muchima wenu achinchike. Ee kine, pembelelai Yehoba.” (Masalamo 27:14) Umvwe tukeba’mba muchima wetu achinchike, kechi twafwainwa kuleka lwitabilo lwetu amba lukoke ne, bino kimye kyonse twafwainwa kuvulukanga ne kunemeka luno luketekelo. Umvwe ke tube bino, kiketukwasha kulonda Yesu ne kwikala na mukoyo mu mwingilo ye apele baana banji ba bwanga. (Mateo 24:14; 28:19, 20) Ee, luketekelo lwanembwa mu Baibolo pamo na lwitabilo ne butemwe, ke kyubilo kyawama kiji na bakalume ba Lesa.—1 Kolinda 13:13.

Nanchi Muji na “Luketekelo Lwavula” Nyi?

4. Bena Kilishitu bashingwa ne ‘mikooko ikwabo’ babena kupembelela ka?

⁴ Bantu ba Lesa babena kutengela kimye kyawama bingi kulutwe na lwendo. Bena Kilishitu bashingwa babena kupembelela kulama pamo ne Kilishitu mwiulu, kabiji ‘mikooko ikwabo’ iji na luketekelo lwa ‘kupokololwa ku buzha bwa bubole, ikekale na bwana bwa bene bwa lukumo bwa baana ba Lesa [panopantanda].’ (Yoano 10:16; Loma 8:19-21; Filipai 3:20) Abwa “bwana bwa bene” bwavwangamo kupokololwa ku bundengamambo ne bintu byatama bifumamo. Ee, Yehoba Mpanyi wa “byonse byawama ne bya bupe byonse byalumbuluka” bikapanwatu ku bantu banji bakishinka kwapwa.—Yakoba 1:17; Isaya 25:8.

5. Twikala byepi na “luketekelo lwavula”?

⁵ Luketekelo lwa bwina Kilishitu lwingila ñanyi mwingilo mu bwikalo bwetu? Pa Loma 15:13, tutangapo’mba: ‘Aye Lesa wa luketekelo emuyuzhe na lusekelo lonse ne mutende pa kwitabila, amba mwikale na luketekelo lwavula, monka mu bulume bwa Mupashi Wazhila.’ Ee, luketekelo kechi lwakonsha kupashañanyishiwa ku kandulu kaji mu mfishi ne, kana ku mintetenga ya juba kimye kya lukelo, mambo itusangajika. “Twikala na luketekelo lwavula” inge twaketekela Mambo a Lesa anembwa ne kutambwila mupashi wanji wazhila. Loma 15:4 waamba’mba: “Byonse byanembelwe kala byanembejilwe kufunda kwetu, amba, monka mu butekanye ne mu bukwasho bwa binembelo twikale na luketekelo.” Onkao mambo, iipuzhai anweba bene amba: ‘Nanchi luketekelo lwami lwakosa kupichila mu kufunda Baibolo, ne kumutanga pa juba pa juba nyi? Nanchi ndomba jonse mupashi wa Lesa nyi?’—Luka 11:13.

6. Pa kuba’mba luketekelo lwetu lukose, twafwainwa kuchinuzhuka ka?

⁶ Yesu ye twafwainwa kumwenako, wakosele mambo wafundanga Mambo a Lesa. Umvwe twafunda pe aye, kyakonsha kwitulengela kubula ‘kukoka ne kupungila mu michima yetu.’ (Bahebelu 12:3) Umvwe twaleka kulanguluka pa luketekelo lwitupa Lesa nangwa twata muchima ku bintu bya ku mubiji nangwa mingilotu ikwabo ya ku mubiji, bumupashi bwetu bwakonsha kukoka, kino kyakonsha kwitulengela kubula kwikala na bulume bwa kwikala bakosa ne kuleka kulondela mafunde awama. Kabiji kino kyakonsha ‘kulobesha lwitabilo lwetu nobe bwato.’ (1 Timoti 1:19) Pano umvwe twaikala na luketekelo lwa kine, lwitabilo lwetu lukosa.

Luketekelo Lukosesha Lwitabilo

7. Luketekelo lukosesha byepi lwitabilo?

⁷ Baibolo waamba’mba: “Lwitabilo lo luketekelo lwa kine lwa kukamona byaketekelwa, ko kuyuka mu muchima’mba, abya bibula kumweka ko biji.” (Bahebelu 11:1) Onkao mambo, luketekelo kechi kintutu kikwabo kyanungwa ku lwitabilo ne; ke kintu kikosesha lwitabilo. Akimonai byajinga Abalahama. Mu kisemwatu, Abalahama ne mukazhanji Sala bapitayijile pa jifumbi ja kusemenapo baana kimye Yehoba kyo ebalayile amba bakasema nswanyi. (Ntendekelo 17:15-17) Nga Abalahama waubilepo byepi? ‘Ye waitabile mu luketekelo mwabujilwe kufwainwa kuketekela, amba nkekale ke shabo mikoka yavula.’ (Loma 4:18) Ee, luketekelo lwajinga na Abalahama lwamupele Lesa lwamulengejile kuyuka’mba baana kyo kitendekesho kyakosa. Kyafuminemo, lwitabilo lwanji lwamulengejile kwikala na luketekelo lwakosa. Kino kibalengejile ba Abalahama ne Sala kusha muzhi wabo ne balongo babo ne kuya na kwikala mu matente a mu ntanda ingi!

8. Kuchinchika saka tuji na lwitabilo kukosesha byepi luketekelo?

⁸ Abalahama wakoseshe luketekelo lwanji kupichila mu kukokela Yehoba, nangwa kya kuba kino kyakatezhe. (Ntendekelo 22:2, 12) Po pamotu, ne atweba umvwe saka tukokela ne kuchinchika mu mwingilo wa Yehoba, twakonsha kuketekela’mba tukapewa mfweto. Paulo wanembele’mba: ‘Butekanye buleta bulumbuluke,” buno nabo buleta luketekelo, “ne luketekelo kechi luleta bumvu ne.” (Loma 5:4, 5) O ene mambo Paulo o anembejile’mba: “Twasaka namba, anweba bonse pa muntu, pa muntu, mumweshe lonkalwa lupata lumo, mulumbulule luketekelo lwenu kufika ne ku mpelo.” (Bahebelu 6:11) Umvwe twaikala na muchima wawama, saka twakosesha bulunda bwetu na Yehoba, kyakonsha kwitulengela kwikala bakosa kabiji balusekelo nangwa kya kuba tubena kupita mu meseko.

“Sekelai mu Luketekelo”

9. Twafwainwa kubanga ka kimye kyonse pa kuba’mba ‘tusekele mu luketekelo’?

⁹ Luketekelo lwetu lwitupa Lesa lwabaya bingi kukila kintu kiji kyonse kya ino ntanda. Salamo 37:34 waamba’mba: “Umupembelele Yehoba, ne kulama jishinda janji, Ne aye ukakutumbijika’mba, ukaswane ntanda. Babi byo bakachibiwako ku bumi, ukekimona.” Ee, tuji na bishinka byakonsha kwitulengela ‘kusekela mu luketekelo.’ (Loma 12:12) Pano bino pa kuba’mba tube kino, twafwainwa kimye kyonse kulangulukanga pa luketekelo. Nanchi kimye kyonse mulanguluka pa luketekelo lwenu lwimupa Lesa nyi? Abya mwifwanyikizha saka muji mu Paladisa, na butuntulu bwa mubiji bwawama, saka mwabula bijikila, muji na bantu bo mwatemwa, kabiji mubena kwingila mwingilo wanengela bulongo nyi? Abya mulanguluka pa Paladisa byonka byo amweshiwa pa bipikichala biji mu mabuku etu nyi? Umvwe saka mulanguluka bino kiji nobe muntu ubena kuwamisha kimbonyi kuba’mba amone bulongo. Umvwe twabula kuwamisha bulongo kimbonyi, kuba ketumone bulongo ne, mambo pakonsha kwikala biko. Twakonsha kulabikwa na bintu bikwabo. Mwane twayai tumone’mba kino kechi kyaubiwa ne.

10. Kwikala na luketekelo lwa kutambula mfweto kukosesha byepi bulunda bwetu na Yehoba?

¹⁰ Kine kintu kitulengela kwingijila Yehoba ke butemwe bo twamutemwa. (Mako 12:30) Pano bino twafwainwa ne kuta muchima ku mfweto. Yehoba byo byo akeba’mba tube! Bahebelu 11:6 baamba’mba: “Pabula lwitabilo kechi kyakonsheka kumutokesha pa muchima ne; mambo awa wiya kwi Lesa kyafwainwa aye etabe’mba, ko aji, kabiji amba, ye ufweta boba bamukebesha.” Mambo ka Yehoba o akebela’mba tumuyuke’mba ye Ufwetañana? Mambo umvwe twayuka bino, tumwesha’mba twamuyuka bulongo Shetu wa mwiulu. Ye mpanyi kabiji watemwa baana banji. Akilangulukai byo twakonsha kubula kwikala balusekelo ne kulefulwa bukiji umvwe kechi twajinga na “luketekelo ne bwikalo bwawama bwa kulutwe” ne.—Yelemiya 29:11.

11. Luketekelo lwamupele Lesa lwamulengejile byepi Mosesa kufuukula bulongo bintu?

¹¹ Kya kumwenako kyawama kya muntu watele muchima pa luketekelo lwamupele Lesa wajinga Mosesa. Byo aikele “bumwana ku mwana Felo,” Mosesa wajinga na bulume ne kutumbalala, kabiji bunonshi bwa Ijipita bwajingatu sabwalala kuba’mba ebwingijishenga. Abya wafwainwe kuta muchima pa bino bintu nyi, inyi kuta muchima pa kwingijila Yehoba? Mosesa wachinchikile ne kusalapo kwingijila Yehoba. Mambo ka? Mambo “watajile ku mfweto yo akafwetwa.” (Bahebelu 11:24-26) Ee, Mosesa watele muchima pa luketekelo lwamupele Yehoba.

12. Mambo ka luketekelo lwa bwina Kilishitu kyo lwaikela nobe kyela kya pa mutwe?

¹² Mutumwa Paulo waesakenye luketekelo ku kyela kya pa mutwe. Kyela kya kifwanyikizho kya pa mutwe kizhikijila bulume bwetu, ne kwitulengela kufuukulanga bulongo bintu, kwikala na bikonkwanyi byawama, ne kwikala balumbuluka. (1 Tesalonika 5:8) Nanchi kimye kyonse muvwala kyela kyakifwanyikizho kya pa mutwe nyi? Umvwe muvwala, ko kuba’mba byonka byajinga Mosesa ne Paulo, ne anweba kechi ‘mukaketekela bunonshi bwa kubulwa ne mwa kwibuketekejila ne, kana mwi Lesa, ye witupa byavujisha bya mu bintu byonse, amba basekele monka.’ Ee, kikebewa kwibikako bingi pa kubatu’mba mukane kwitumpa mu bintu bya ino ntanda, pano bino kiwama bingi umvwe mwibikana! Nga mambo ka a kutemenwa bintu byatutu, mu kifulo kya kutemwa “bumi, bonkabwa bwa kine kine,” bubena kupembelela boba baji na luketekelo kabiji bamutemwa Yehoba?—1 Timoti 6:17, 19.

“Kechi Nkakushe Nangwa Kachechetu Ne”

13. Yehoba walaya bakalume banji bakishinka amba ka?

¹³ Aba bantu bata muchima pa bintu bya buno bwikalo bafwainwa kulanguluka pa bintu byatama bibamwekela ino ntanda byo ibena kumanama na “bisanso.” (Mateo 24:8) Bino aba baketekela mwi Yehoba kechi baji na uno moyo ne. Bakatwajijila ‘kwikala bulongo, bakekalanga kwatalalatu kwabula moyo wa kuchina byakatazha.’ (Byambo bya Mana 1:33) Luketekelo lwabo byo lwabula lwa buno bwikalo, balondela lujimuno lwa kwa Paulo lwa kuba’mba: “Mwikale ba kubula kutemwa mali; sekelai mu byonka byo muji nabyo: mambo aye mwine waambile’mba, Kechi nkakushe nangwa kachechetu ne, ne kukulekelela nangwa kachechetu ne.”—Bahebelu 13:5.

14. Mambo ka bena Kilishitu kyo bafwainwa kubula kwikesha na bijikila pa mambo a bintu bya ku mubiji?

¹⁴ Kino kinembelo kimweshatu patoka’mba Lesa witulama. Kabiji Yesu naye witulayile amba Lesa uketuta muchima. Waambile’mba: “Nanchi sambilai kukebesha bufumu bwanji, ne bololoke bwanji; ne bino bintu byonse [bya ku mubiji bikebewa mu bwikalo] bikemubikilwapo. Byonkabyo kechi mubambishe michima yenu na ja kesha ne: mambo ja kesha jine jikebambisha na byajo.” (Mateo 6:33, 34) Yehoba wayuka’mba kitushupa bingi kuba’mba twingile mwingilo wa Bufumu na mukoyo, aku saka tukeba bintu bya ku mubiji bitufwainwa. Onkao mambo twayai tuketekele mu bulume bwanji ne byo akeba’mba uketulama.—Mateo 6:25-32; 11:28-30.

15. Bena Kilishitu bekala byepi na ‘jiso jijitu’?

¹⁵ Tumwesha’mba twaketekela mwi Yehoba umvwe twaikala na ‘jiso jijitu.’ (Mateo 6:22, 23) Jiso jijitu jikala ja kishinka, jawama mu byubilo, kabiji jabula lunkumbwa ne muchima watama. Kwikala na jiso jijitu kechi kilumbulula’mba pano tuyandengatu nangwa kuleka kukeba bintu bya ku mubiji byafwainwa ne. Kwikala na jiso jijitu kulumbulula “kwilama” ne kusambila kukebesha mwingilo wa Yehoba.—2 Timoti 1:7.

16. Mambo ka lwitabilo ne kukosa kyo bikebewa pa kuba’mba twikale na jiso jijitu?

¹⁶ Pa kuba’mba twikale na jiso jijitu kikebewa kwikala na lwitabilo ne kukosa. Kya kumwenako, umvwe mukulumpe wa nkito wakosako na kwimubula’mba mwingilenga nkito kimye kikelamo kupwila kwa bwina Kilishitu, nanchi mukakonsha kulondela mutanchi wenu wa kupwila nyi? Umvwe muntu ke azhinauke amba Yehoba kechi wakonsha kufikizha mulaye wanji wa kulama bakalume banji ne, kyakonsha kulengela Satana kuleta lukatazho pa yewo muntu kya kuba waleka ne kutanwa ku kipwilo. Ee, umvwe twabula lwitabilo, mu kifulo kya kuba’mba Yehoba etutangijilenga, twakonsha kuleka Satana ke etutangijile mu bwikalo bwetu. Kino kyakonsha kuleta bingi malwa ko tuji!—2 Kolinda 13:5.

‘Pembelelainga Yehoba’

17. Aba baketekela mwi Yehoba bapeshiwa byepi luno lonka?

¹⁷ Binembelo monka byaambila’mba aba baketekela ne kukinka manungo mwi Yehoba bekala bulongo. (Byambo bya Mana 3:5, 6; Yelemiya 17:7) Ee, kimo kimye bekalatu na bintu bya ku mubiji bicheche, pano bino kino kechi kyo kine kintu ne, mambo bayuka’mba mfweto iji kulutwe yo yavula. Mu kuba bino, bamwesha’mba ‘bamupembelela Yehoba’ kabiji baketekela’mba ukapa bantu banji bakishinka bintu byonse byawama bisaka michima yabo. (Masalamo 37:4, 34) Kino kibalengela kusekela nangwatu luno lonka. “Luketekelo lwa baoloka lukapelela mu lusekelo; pakuba byo baketekelamo babi bikazhimañana.”—Byambo bya Mana 10:28.

18, 19. (a) Ñanyi mulaye wa butemwe Yehoba ye etulaya? (b) Tumubika byepi Yehoba ku ‘kuboko kwetu kwa kilujo’?

¹⁸ Umvwe mwana mucheche ubena kwenda na bashanji saka bamukwata ku kuboko, uyuka’mba wazhikijilwa. Ne atweba byo byo tumvwa inge ke twende na Shetu wa mwiulu. Yehoba wabujile bena Isalela amba: “Kuba moyo ne, mambo amiwa nji nobe. . . . Kine, nkakukwasha. . . . Mambo amiwa, Yehoba Lesa wobe, nkakukwata pa kuboko kwa kilujo; ye amiwa nakwambila namba: Kuba moyo ne; amiwa nkakukwasha.”—Isaya 41:10, 13.

¹⁹ Buno ke butemwe bo amwesha Yehoba byo etukwata pa kuboko! Davida wanembele’mba: “Namubika Yehoba ku meso ami moba onse: Kabiji byo aikala ku kilujo kyami, kechi nkatenkene ne.” (Masalamo 16:8) Tumubika byepi Yehoba ku ‘kuboko kwetu kwa kilujo’? Tuba bino mu mashinda abiji. Jishinda jitanshi, tuleka Mambo anji saka etutangijila mu bwikalo bwetu bonse; kabiji jishinda ja bubiji, tuta muchima ku mfweto ya kulutwe Yehoba yo etubikila. Nyimbi wa masalamo aye Asafwa waimbile’mba: ‘Nji nenu moba onse: Mwankwachilenga ku kuboko kwami kwa kilujo. Mukantangijilanga na maana enu, Kabiji ne kulutwe mukantambula mu lukumo.’ (Masalamo 73:23, 24) Uno mulaye witulengela kupembelela kimye kya kulutwe na luketekelo.

“Bukuzhi Bwenu ke Buji Pepi”

20, 21. Aba bamupembelela Yehoba kimye kyabo kya kulutwe kikekala byepi?

²⁰ Kikebewa bingi pa juba ne juba kumubikanga Yehoba ku kuboko kwetu kwa kilujo. Katatakatu luzhachisho lukafikile bupopweshi bwa bubela ne malwa akatampe akuba kala kechi kwajingapo akwabo a byonkabyo ne, akamwekela ino ntanda ya kwa Satana. (Mateo 24:21) Bantu babula lwitabilo bakekankilangatu na moyo. Bino mu kyokyo kimye kya malwa, bakalume bakosa ba Yehoba bakasangalala mambo a luketekelo lwabo! Yesu waambile’mba: “Bino bintu pa kutatula kwiya, inukai, ne kwinuna mitwe yenu; mambo bukuzhi bwenu ke buji pepi.”—Luka 21:28.

²¹ Onkao mambo, twayai tusekele mu luketekelo lwetu lwitupa Lesa, kabiji kechi twafwainwa kujimbaikwa nangwa kwesekwa kwi Satana ne. Kabiji twayai twingilenga na ngovu kuba’mba twikalenga na lwitabilo, butemwe, ne moyo wa kwakamwa Lesa. Umvwe saka tuba bino, tukekala bakosa ne kukokela Yehoba mu mbaji yonse ya bwikalo bwetu ne kumukana Diabola. (Yakoba 4:7, 8) Ee, “Kosai, michima yenu ichinchike, Anweba bonse mwamutengela Yehoba.”—Masalamo 31:24.

[Tubyambo twa mushi]

Musakukumbula’mba Ka?

• Luketekelo lwa kwa Yesu lwamulengejile byepi kwikala wakosa?

• Lwitabilo ne luketekelo byendela byepi pamo?

• Luketekelo ne lwitabilo byakonsha kulengela byepi mwina Kilishitu kwikala wakosa mu kufukula bikonkwanyi byawama mu bwikalo?

• Mambo ka aba ‘bamupembelela Yehoba’ kyo baketekela kimye kya kulutwe?

[Kipikichala pa peja 26]

Kikale mwi banyike nangwa bakulumpe, nanchi mwimona anweba bene saka muji mu Paladisa nyi?