Kusekela Mu Luketekelo Lwetu

“[Kuji] luketekelo lwa bumi bwa myaka bo alayile kala Lesa ubula kubepa.”—TITU. 1:2.

KUPITULUKAMO

․․․․․

Twayuka byepi kuba’mba mwikala lusekelo mwiulu inge mushingwa watwajijila kwikala wakishinka kufika ne ku lufu?

․․․․․

Kufika kwa luketekelo lwa mikooko ikwabo kwakwatankana byepi na kufika kwa luketekelo lwa bashingwa?

․․․․․

Pa kuba’mba luketekelo lwetu lukafike, ñanyi “byubilo byazhila” ne “mingilo ya kunemeka Lesa” yo twafwainwa kwikala nayo?

1. Luketekelo lwitupa Yehoba lwakonsha kwitulengela byepi kuchinchika?

YEHOBA ye “Lesa upana luketekelo.” Bino byo byaambile mutumwa Paulo kumwesha’mba Yehoba wakonsha ‘kwituyuzha na lusekelo ne mutende kupichila mu bulume bwa mupashi wazhila.’ (Loma 15:13) Umvwe tuji na luketekelo lwakosa, tukachinchika makatazho onse o twakonsha kupitamo mu mutende na lusekelo. Byonka byo kiji ku bena Kilishitu bashingwa, luno luketekelo lukekala “nobe kimiko kya bwikalo” ne ku bena Kilishitu bakwabo. (Hebe. 6:18, 19) Luketekelo lwetu ke kintu kyo twafwainwa kukwachisha mu kimye kya makatazho mu bwikalo, lo luketulengela kubula kuzhinauka nangwa’mba kubula lwitabilo.—Tangai Bahebelu 2:1; 6:11.

2. Ñanyi luketekelo lubiji luji na bena Kilishitu lelo jino, kabiji mambo ka “mikooko ikwabo” kyo yanemekela luketekelo luji na bashingwa?

² Bena Kilishitu ba mu ano moba apelako batengela kufika kwa luketekelo lumo pa luketekelo lubiji lujiko. Bashalapo ba mu “kajitanga kacheche” ka bena Kilishitu bashingwa baji na luketekelo lwa kutambwila bumi bwabumbulwa kufwa mwiulu ne kwikala bamfumu ne bañanga pamo ne Kilishitu mu Bufumu bwanji. (Luka 12:32; Lum. 5:9, 10) Bavula ba mu “jibumba jikatampe” ja “mikooko ikwabo,” baji na luketekelo lwa kwikala na bumi bwa myaka pano pa ntanda mu paladisa ne kwikala bangikazhi ba Bufumu bwa Bumesiasa. (Lum. 7:9, 10; Yoa. 10:16) Ba mikooko ikwabo bafwainwa kuvulukanga kuba’mba lupulukilo lwabo lwaimena pa kwibikako kukwasha “balongo” ba kwa Kilishitu bashingwa bakiji pano pa ntanda. (Mat. 25:34-40) Bashingwa bakatambula mfweto yabo kabiji ba mikooko ikwabo nabo bakatambula kyo bapembelela. (Tangai Bahebelu 11:39, 40.) Patanshi twayai twisambe pa luketekelo luji na bashingwa.

“LUKETEKELO LUMI” LUJI NA BENA KILISHITU BASHINGWA

3, 4. Bena Kilishitu bashingwa ‘basemwa byepi jibiji pa kuba’mba bekale na luketekelo lumi,’ kabiji ñanyi luketekelo lonkalo?

³ Mutumwa Petelo wanembejile bena Kilishitu bashingwa makalata abiji mo ebatelele’mba, “basalululwa.” (1 Pe. 1:1) Walumbulwile bulongo luketekelo luji na kajitanga kacheche. Mu nkalata itanshi, Petelo wanembele’mba: “Atotwe Lesa Shanja Nkambo yetu Yesu Kilishitu, witusemene jibiji monka mwayila lusa lwanji lukatampe kuba amba etupe luketekelo lumi kupichila mu kusangulwa kwa Yesu Kilishitu ku bafu, ne kwitupa buswanyi bubula kubola, bwabula kubipa kabiji bubula kwaluka. Buno buswanyi bemulaminabo mwiulu anweba bo babena kulama kwi Lesa mu bulume bwanji na mambo a lwitabilo lo muji nalo. Lesa ubena kwimulama amba mukamone lupulukilo lo banengezhezha jimo lukasoloka mu juba jikapelako. Na mambo a kino, mubena kusekela bingi.”—1 Pe. 1:3-6.

⁴ Bena Kilishitu Yehoba bo asala kwingijila pamo na Kilishitu mu Bufumu bwa mwiulu ‘basemwa jibiji’ ne kwikala baana ba Lesa ba ku mupashi. Bashingwa na mupashi wazhila ne kwikala bamfumu ne bañanga pamo ne Kilishitu. (Lum. 20:6) Petelo waamba kuba’mba ‘kusemwa jibiji’ kwibalengela kwikala na “luketekelo lumi,” lo atela’mba “buswanyi bubula kubola, bwabula kubipa kabiji bubula kwaluka” lo bebalamina “mwiulu.” Onkao mambo, kechi twakonsha kukumya kilengela bashingwa “kusekela bingi” pa luketekelo lwabo lumi ne. Nangwa byonkabyo, pa kuba’mba bakatambule byo batengela bafwainwa kwikala bakishinka.

5, 6. Mambo ka bena Kilishitu bashingwa o bafwainwa kutwajijila kwibikako pa kuba’mba lwito lwabo lwa mwiulu lwikale byonkabyo?

⁵ Mu nkalata ya bubiji, Petelo watundaikile bena Kilishitu bashingwa ‘kwibikishako kuba amba kwitwa ne kusalululwa kwabo kutwajijile kwikala byonkabyo.’ (2 Pe. 1:10) Bafwainwa kwibikako pa kuba’mba bekale na bino byubilo bya bwina Kilishitu nabiji lwitabilo, kwikala na munema wa kunemeka Lesa ne kutemwa balongo. Petelo waambile’mba: “Umvwe bino byubilo byavula mwi anweba, kechi bikemulengela kukoka nangwa kubula kupanga bipangwa” ne.—Tangai 2 Petelo 1:5-8.

⁶ Mu byambo byo anembejile bakulumpe bashingwa na mupashi ba mu kipwilo kya Filadelifya ku Asha Maina mu myaka kitota kitanshi, Kilishitu wasangulwa waambile’mba: “Na mambo a kuba walondelanga kyakumwenako kyami kya kuchinchika, ne amiwa nkakulama mu kimye kya lweseko kyonkakya kikeya pano pa ntanda ponse, kya kwibeseka aba bekala pano pa ntanda. Nkeya bukiji. Kwachisha kintu kyawama kyo uji nakyo, kuchina amba muntu nangwa umo wakakwangata munchinya wobe.” (Lum. 3:10, 11) Mwina Kilishitu washingwa inge waleka kwikala wakishinka, kechi wakonsha kutambula “munchinya wa lukumo ubula kwaluka” ye balaya boba batwajijila na bukishinka kufikatu ne ku lufu ne.—1 Pe. 5:4; Lum. 2:10.

KUTWELA MU BUFUMU

7. Ñanyi luketekelo lwawama bingi lwaambilepo Yuda mu nkalata yanji?

⁷ Mu mwaka wa 65 C.E., nkasanji Yesu aye Yuda wanembejile nkalata bena Kilishitu bakwabo bashingwa, bo atelele’mba “basalululwa.” (Yuda 1; esakanyaiko Bahebelu 3:1.) Wakebeshe kwibanembela nkalata yaambilenga pa luketekelo lwawama bingi lwa lupulukilo bena Kilishitu bonse baitwa mu Bufumu bwa Lesa bwa mwiulu “lobaji nalo.” (Yuda 3) Nangwa kya kuba wajinga na byambo bikwabo byo akebelenga kwibabula bukiji, ku mpelo ya nkalata yanji ipi waambile pa luketekelo lwawama bingi lwa bena Kilishitu bashingwa amba: “Lesa wakonsha kwimukwasha kubula kwituntula ne kwimulengela kwikala babula bulema mu lukumo lwanji na lusekelo lukatampe. Kwi aye Lesa umotu Mupulushi wetu kupichila mwi Yesu Kilishitu Nkambo yetu, kwikale lukumo, buneme, bulume ne lūsa myaka ne myaka, luno ne mu myaka yonse ikeya.”—Yuda 24, 25.

8. Kwesakana na Yuda 24, ki ka kimwesha’mba mwiulu mwikala lusekelo inge mushingwa watwajijila na bukishinka kufika ne ku lufu?

⁸ Bena Kilishitu bakishinka bashingwa bakeba Lesa kwibazhikijila ku bintu byakonsha kwibalengela kwituntula. Baji na luketekelo lwa mu Binembelo lwa kuba’mba Yesu Kilishitu ukebasangula ku bafu, kabiji bakekala balumbuluka ne kumweka ku meso a Lesa na lusekelo lukatampe. Mwina Kilishitu washingwa inge wafwa wakishinka, wikala na luketekelo lwa ‘kusangulwa mu mubiji wa bumupashi,’ “ubula kubola . . . , mu lukumo.” (1 Ko. 15:42-44) Inge kya kuba mwikala “lusekelo lukatampe mwiulu pa mambo a ndengamambo umo walapila,” akifwanyikizhai lusekelo lwikala mwiulu umvwe mulongo umo wa kwa Kilishitu washingwa na mupashi watwajijila na bukishinka kufika ne ku lufu. (Luka 15:7) Yehoba ne bilengwa bya mupashi byakishinka bakasangalela pamo na bashingwa byo bakatambula mfweto yabo “na lusekelo lukatampe.”—Tangai 1 Yoano 3:2.

9. Mu ñanyi jishinda bashingwa bakishinka mo ‘bobilwa bingi bibusa’ pa kutwela mu Bufumu, kabiji luno luketekelo lulengela bashingwa baji pano pa ntanda kuba byepi?

⁹ Petelo naye wanembele pa bena Kilishitu bashingwa amba inge lwito lwabo lwaikala byonkabyo na mambo a lwitabilo lwabo, ‘bakobilwa bingi bibusa kabiji bakatwela mu bufumu bwa myaka ne myaka bwa Nkambo yetu kabiji Mupulushi aye Yesu Kilishitu.’ (2 Pe. 1:10, 11) Bakatambula mfweto ya kuya mwiulu kabiji ‘bakobilwa bingi bibusa’ ne kwikala na lusekelo lukatampe. Byambo bya kuba’mba “mukobilwa bingi bibusa,” byakonsha ne kulumbulula kuvula kwa mapesho akekala na boba bebikako kunyema kapela ka ku bumi. Inge bavuluka bwikalo bwabo bwa bukishinka bakekalanga bingi na lusekelo ne kusangalala. Kwa kubula nangwa kuzhinaukatu ne, luno luketekelo lulengela bena Kilishitu bashingwa bakiji pano pa ntanda ‘kunengezha milanguluko yabo ku mwingilo wakosa.’—1 Pe. 1:13.

PAIMENA “LUKETEKELO” LWA MIKOOKO IKWABO

10, 11. (a) Mikooko ikwabo iji na ñanyi luketekelo? (b) Kufika kwa luketekelo lwa bakekala pano pa ntanda kwakwatankana byepi na Kilishitu ne na “kusololwa kwa baana ba Lesa”?

¹⁰ Mutumwa Paulo wanembele pa luketekelo lwawama luji na “baana ba Lesa” ba ku mupashi bakekala “banswanyi” pamo na Kilishitu. Kabiji waambile pa luketekelo lwawama Yehoba lo alaya bantu bavula ba mikooko ikwabo amba: “Bilengwa [bantu] bibena kutengela na muchima yense kusololwa kwa baana ba Lesa [bashingwa]. Bilengwa byonse bebyalwile kwikala ke byatu, kechi na kyaswa muchima wabyo bine ne, bino na kyaswa muchima wa Lesa kuba amba bikale na luketekelo, ne kuba amba bilengwa bikapokololwe ku buzha bwa bubole ne kwikala na bwana bwa bene bwa lukumo lwa baana ba Lesa.”—Loma 8:14-21.

¹¹ Yehoba wapele bantu “luketekelo” kimye kyo alaile kwibapokolola ku “muloolo wa kala,” Satana Diabola, kupichila mu “wa mu kisemi” nangwa’mba lukunwa walaiwe. (Lum. 12:9; Nte. 3:15) Uno ‘lukunwa’ wajinga Yesu Kilishitu. (Nga. 3:16) Panyuma ya lufu lwanji ne kusangulwa, Yesu waajile bantu kitendekesho kyakosa kya kwikala na luketekelo lwa kukasululwa ku bundengamambo ne lufu. Kufika kwa luno luketekelo kwakwatankana na “kusololwa kwa baana ba Lesa.” Bashingwa batumbijikwa lo lubaji lwa bubiji lwa uno ‘lukunwa.’ Bakasololwa kimye kyo bakakwatankana na Kilishitu konauna buno bwikalo bwatama bwa kwa Satana. (Lum. 2:26, 27) Kino kikaleta lupulukilo ku mikooko ikwabo ikapita mu malwa akatampe.—Lum. 7:9, 10, 14.

12. Ñanyi bintu byawama bikafuma mu kusololwa kwa bashingwa bikeyowa bantu?

¹² “Bilengwa” nangwa’mba bantu bakapokololwa mu Bukalama bwa Myaka Kiumbi bwa kwa Kilishitu. Pa kyokya kimye, “baana ba Lesa” batumbijikwa ‘bakasololwa’ jibiji byo bakatendeka kwingila mwingilo wa buñanga pamo na Kilishitu ne kuletela bantu byawama bikafuma mu kitapisho kya bukuzhi bwa kwa Yesu. Byo bakekala bangikazhi ba mu Bufumu bwa mwiulu, “bilengwa” nangwa’mba bantu bakapokololwa ku bundengamambo ne lufu. Bantu balukokelo ‘bakapokololwa ku buzha bwa bubole’ pachepache. Inge batwajijila kwikala bakishinka kwi Yehoba mu myaka Kiumbi ne mu lweseko lukapelako ku mpelo ya myaka Kiumbi kimo, mazhina abo akanembwa kikupu mu “buku wa bumi.” Bakekala na “bwana bwa bene bwa lukumo lwa baana ba Lesa.” (Lum. 20:7, 8, 11, 12) Luno ke luketekelo lwawama bingi.

KULAMA LUKETEKELO LWETU LUMI

13. Luketekelo lwetu lwaimena pa ka, kabiji kimye ka Kilishitu kyo akasololwa?

¹³ Makalata abiji anembele Petelo na lutangijilo lwa mupashi atundaika bingi bashingwa ne mikooko ikwabo kutwajijila kulama luketekelo lwabo lumi. Waambile’mba luketekelo lwabo kechi lwaimena pa mingilo yabo ne, bino ke lusatu lwa Yehoba. Wanembele’mba: “Saka mutekanya; teshai muchima ku luketekelo lwenu lwaimena pa lusa lwa Lesa lo bakemumwesha kimye kikamweka Yesu Kilishitu.” (1 Pe. 1:13) Kilishitu ukasololwa kimye kyo akeya na kufweta baana banji ba bwanga bakishinka ne kuleta luzhachisho lwa Yehoba pa bantu babula kwakamwa Lesa.—Tangai 2 Tesalonika 1:6-10.

14, 15. (a) Pa kuba’mba tulame luketekelo lwetu lumi, twafwainwa kuta muchima pa ka? (b) Petelo wapaine ñanyi lujimuno?

¹⁴ Pa kuba’mba tulame luketekelo lwetu lumi, twafwainwa kuta muchima pa kwiya kwa “juba ja Yehoba” mu bwikalo bwetu bonse. Pa jino juba “meulu” ajipo lelo jino nangwa’mba bukalama bwa bantu, ne “ntanda,” ko kuba’mba bantu babi ne “bintu bijimo” bikonaunwa. Petelo wanembele’mba: “Mwafwainwa . . . , kutengela ne kukebesha kwiya kwa juba ja Yehoba. Mu jino juba mo mu konaikila meulu na mujilo kabiji bintu bijimo ne bya pano pa ntanda mo bikasungulukila na kyuya kya malwa!”—2 Pe. 3:10-12.

¹⁵ “Meulu” ne “ntanda” bijipo lelo jino pakapingakena “meulu apya [kafulumende wa Bufumu bwa kwa Kilishitu] ne ntanda ipya [bantu baoloka bakekala pano pa ntanda].” (2 Pe. 3:13) Petelo wapaine lujimuno lwakosa bingi lwaambilenga pa “kutengela,” nangwa’mba kulama luketekelo lwetu lumi lwa mulaye wa ntanda ipya, byo aambile’mba: “Onkao mambo, anweba batemwe, byo kiji kuba amba mubena kutengela bino bintu, ibikishaingako kuba amba akemutane mu mutende kabiji babula biko ne bulema.”—2 Pe. 3:14.

KWIKELA MWAYILA LUKETEKELO LWETU

16, 17. (a) Ñanyi “byubilo byazhila” ne “mingilo ya kunemeka Lesa” yo twafwainwa kwikala nayo? (b) Luketekelo lwetu lukafika byepi?

¹⁶ Kechi twafwainwa kulamatu luketekelo lwetu ne, bino twafwainwa ne kwikela monka mwayila luketekelo lwetu. Twafwainwa kuta muchima ku bulunda bwetu ne Lesa. “Kwikala bantu baji na byubilo byazhila” kwavwangamo ‘kwikala na byubilo byawama mu bantu ba pano pa ntanda’ kupichila mu kulondela mizhilo ya Lesa. (2 Pe. 3:11; 1 Pe. 2:12) Twafwainwa kwitemwa ‘atweba bene na bene.’ Kino kyavwangamo kwibikishako kukwatankana mu bulongo bwetu bwa ntanda yonse kubikapotu ne na ba mu kipwilo mo tuji. (Yoa. 13:35) “Mingilo ya kunemeka Lesa” yo mingilo imwesha bulunda bwetu ne Yehoba. Kino kyavwangamo byo tulombapo, kutanga Baibolo pa juba pa juba, lufunjisho lwa pa bunke, kupopwela kwa kisemi ne kwingilako pakatampe mu mwingilo wa kusapwila “mambo awama a Bufumu.”—Mat. 24:14.

¹⁷ Atweba bonse tukeba kwitabilwa kwi Yehoba ne kwikala pa bo akapulusha kimye ‘kikasunguluka’ buno bwikalo bubi. Popo tukamona bikafika kyo tutengela, “luketekelo lwa bumi bwa myaka bo alayile kala Lesa ubula kubepa.”—Titu. 1:2.

[Kipikichala pa peja 22]

Bena Kilishitu bashingwa ‘basemwa jibiji ne kwikala na luketekelo lumi’

[Kipikichala pa peja 24]

Twajijilai kwikala na luketekelo lumi mu kisemi kyenu