Bujimi Bwawama

AKIMONA ino mpunzha iji papo! Nga bintu byonse bijipo byo byawamapo! Akimona nsono, bichi, maluba ne banyama bonse. Nga banzovu ne mabokwe wibimona nyi?

Nga buno bujimi bwawama byonkabye bwaishileko byepi? Twaya tumone Lesa byo anengezhezhe ntanda kuba’mba twikalengapo.

Patanshi, Lesa wameneshe nsono pa ntanda. Kabiji walengele bichi byapusana pusana. Bino bintu bimena bilengela ntanda kumwekana bulongo. Pano bino bingila ne mingilo ikwabo. Bichi byavula bitupa kajo kaji na munyimo pa kwikaja.

Kyalondejilepo Lesa walengele masabi a mu mema ne bañonyi ba mwiulu. Walengele bakabwa, bapushi, bambili, banyama bakatampe ne bacheche. Banyama ka bo muji nabo pa muzhi? Nanchi kechi twafwainwa kusangalala kuba’mba Lesa witulengejile bino byonse nenyi?

Kyapeleleko, Lesa walengele mwanzo umo wa ntanda mu jishinda japusanako. Watelele ino mpunzha amba bujimi bwa Edena. Bwajinga bujimi bwalumbuluka bingi. Byonse byajingamo byajinga bya kitambo. Kabiji Lesa wakebelenga amba ntanda yonse ikale yawama byonka byajinga buno bujimi bwanengela bo alengele.

Pano akitala jikwabo pa kino kipikichala kya bujimi. Nanchi wayuka kintu kyamwene Lesa amba kyo kyabulamo nyi? Twaya tumone.