Kitango 3

Walengele Bintu Byonse

N AYUKAPO kintu kimo kyawama bingi. Ukeba nkubule nyi?— Tala ku kuboko kobe. Fumbata minwe yobe. Tola kintu kiji kyonse. Kuboko kobe kwakonsha kuba bintu byavula bingi, kabiji kwakonsha kwibyuba bingi bulongo. Nanchi wayuka walengele maboko etu nyi?—

Ye walengele ne kanwa, myona, ne meso. Lesa, Shanja Mufunjishi Wayukisha ye walengele bino byonse. Nanchi kechi kyawama Lesa pa kulenga meso etu nenyi?— Twakonsha kumona bintu byavula bingi na meso. Twakonsha kumona maluba. Twakonsha kumona nsono ne jiulu. Kabiji twakonsha ne kumona tuñonyi saka tuja byonka bibena kuja tutwe tuji pa kipikichala. Kyawama bingi mambo tumona bintu byavula, ke ibyo nenyi?—

Pano ñanyi walengele bino bintu? Nanchi muntu ye wibilengele nyi? Ine. Bantu bakonsha kushimika nzubo. Bino kafwako muntu wakonsha kumenesha nsono ne. Bantu kechi bakonsha kulenga kaana ka kañonyi, kumenesha jiluba, nangwa kintu kiji kyonse kyumi ne. Ke ibyo nenyi?—

Lesa ye walengele bino bintu byonse. Lesa walengele bya mwiulu ne ntanda. Kabiji walengele ne bantu. Walengele bantu batanshi, mwanamulume ne mwanamukazhi. Byo byaambile ne Yesu, Mufunjishi Wayukisha.—Mateo 19:4-6.

Yesu wayukile byepi amba Lesa walengele mwanamulume ne mwanamukazhi? Nanchi wamumwene Lesa saka ebalenga nyi?— Ee, wamumwene. Yesu wajinga na Lesa kimye kyo alengelenga mwanamulume ne mwanamukazhi. Lesa patanshi walengele Yesu. Yesu wajinga malaika, kabiji waikele mwiulu pamo ne Shanji.

Baibolo wamba’mba Lesa waambile’mba: “Tulenge bantu.” (Ntendekelo 1:26) Nanchi wayuka Lesa ye aambañenenga nanji nyi?— Waambañenenga na Mwananji Yesu, yenka waishile panopantanda.

Kino kyawama bingi, ke ibyo nenyi? Akikilangulukepotu! Umvwe ke tumvwe byamba Yesu, ko kuba’mba tubena kufunda ku yewa wajinga na Lesa kimye kyo alengelenga ntanda ne bintu byonsetu. Yesu wafunjile bintu byavula bingi byo aingijilenga ne Shanji mwiulu. Kyo kine kintu Yesu kyo aikela Mufunjishi Wayukisha!

Nanchi walanguluka’mba Lesa waumvwinenga mukose byo akijinga bunke saka akyangye kulenga Mwananji nyi?— Ine. Pano inge kechi waumvwinenga mukose ne, mambo ka o alengejile bilengwa bikwabo?— Walengele bilengwa bikwabo mambo ke Lesa wa butemwe. Wakebelenga amba bantu nabo bekalenga na bumi. Twafwainwa kumusanchilanga Lesa mambo ye witupele bumi.

Byonse byalenga Lesa bimwesha butemwe bwanji. Lesa walengele juba. Juba jitupa kyeya kabiji jitulengela kumvwa kyuya. Umvwe kechi kwajinga juba ne, bintu byonse panopantanda inge byaumine kala na mashika. Kyawama bingi mambo Lesa walengele juba, ke ibyo nenyi?—

Kabiji Lesa unokesha mvula. Kimye kimo obewa kechi wakonsha kumvwa bulongo ne umvwe mvula saka anokatu, mambo kechi wakonsha kuya na kukaya ne. Pano bino, mvula ye ulengela maluba kukoma. Umvwe twamona maluba atenkuma, ñanyi ye twafwainwa kusanchila?— Lesa. Kabiji ñanyi ye twafwainwa kusanchila umvwe twaja bipangwa ne bishu byanengela?— Twafwainwa kusanchila Lesa mambo ye ulengela bino bintu kukoma.

Umvwe bakwipuzha’mba: ‘Nanchi Lesa ye walengele bantu ne banyama nyi?’ Wakonsha kukumbula’mba ka?— Wakonsha kwambatu’mba: “Ee, Lesa ye walengele bantu ne banyama.” Pano bino ibyepi umvwe kya kuba muntu umo wakana kwitabila’mba Lesa kechi walengele bantu ne? Kabiji ibyepi umvwe keambe’mba muntu wafumine ku banyama? Baibolo kechi byo byo afunjisha ne. Ufunjisha’mba Lesa walengele bintu byonse.—Ntendekelo 1:26-31.

Pano bino muntu umo wakonsha kukwambila’mba kechi waitabila mwi Lesa ne. Wakonsha kumukumbula’mba ka?— Amba kya kumwenako kya nzubo. Mwipuzhe’mba: “Ñanyi washimikile nzubo?” Muntu yense wayuka’mba nzubo yonse kuji beishimika. Ee, nzubo kuba ishimikatu ayo ine ne!—Bahebelu 3:4.

Mutwale pano ku mashamba, umumweshe jiluba. Mwipuzhe’mba: “Ñanyi walengele jiluba?” Byonka nzubo byo yabujile kwishimika ayo ine, ne jiluba najo kechi jilengele ajo jine ne. Kuji wijilengele. Lesa ye wijilengele.

Mwambile emane ateleke ku kañonyi kabena kwimba. Mwipuzhe’mba: “Ñanyi walengele tuñonyi ne kwitufunjisha bya kwimba?” Lesa ye witulengele. Lesa ye walengele bya mwiulu ne ntanda ne bintu byonse! Ye upana bumi.

Pano bino mukwabo wakonsha kwamba’mba witabilatu mu bintu byo amona. Wakonsha kwamba’mba: ‘Umvwe ne kwikimona ne, kuba naitabila ne.’ Onkao mambo, bantu bamo bamba’mba kechi baitabila mwi Lesa ne, mambo kechi bamumona ne.

Ee, kechi twakonsha kumumona Lesa ne. Baibolo wamba’mba: ‘Kafwako muntu wakonsha kumona Lesa ne.’ Kafwako uji yense panopantanda wakonsha kumona Lesa ne. Onkao mambo, kafwako wakonsha kulenga kipashañano kya Lesa ne. Kabiji Lesa waamba’mba kechi twafwainwa kulenga kipashañano kyanji ne. Onkao mambo, umvwe twaikala na bintu bya uno mutundu mu mazubo etu, kyakonsha kumufichisha ku muchima Lesa.—Kulupuka 20:4, 5; 33:20; Yoano 1:18.

Byo tubula kumona Lesa, pano twayuka byepi amba koaji? Akilangulukapo pa kino? Nanchi wakonsha kumona mwela nyi?— Ine. Kafwako wakonsha kumona mwela ne. Bino wakonsha kumona bintu byuba mwela. Wakonsha kumonatu mabula a kichi saka asunkena mwela pa kupupa. Kino kikulengela kuyuka’mba mwela ko aji.

Wakonsha ne kumona bintu byalenga Lesa. Umvwe wamona jiluba nangwa kañonyi, ko kuba’mba ubena kumona bintu byalenga Lesa. Kino kikulengela kuyuka’mba kine Lesa koaji.

Pano bakonsha ku kwipuzha’mba, ‘Ñanyi walengele juba ne ntanda?’ Baibolo waamba’mba: “Lesa walengele bya mwiulu ne ntanda.” (Ntendekelo 1:1) Ee, Lesa ye walengele bino bintu byonse! Obewa umvwa byepi inge walangulukapo pa kino?—

Nanchi kechi kyawama kwikala bomi nenyi? Twakonsha kumvwa nyimbo ya kimenge imba tuñonyi. Twakonsha kumona maluba ne bintutu bikwabo byalenga Lesa. Kabiji twakonsha ne kuja kajo ketupa Lesa.

Twafwainwa kumusanchila Lesa pa bino bintu byonse. Kyakila pa byonse, twafwainwa kumusanchila pa kwitupa bumi. Umvwe tumusanchila Lesa, twafwainwa kubapo kimo. Ki ka kyonkakyo?— Twafwainwa kumvwa byamba Lesa, ne kuba byo etubula. Umvwe twauba bino kimwesha’mba twatemwa Mulenga walengele bintu byonse.

Twafwainwa kumusanchila Lesa pa bintu byonse byo auba. Mu ñanyi jishinda? Tanga byambo byanembwa mu Salamo 139:14; Yoano 4:23, 24; 1 Yoano 5:21; ne Lumwekesho 4:11.

[Kipikichala pa jipa 21]

Ñanyi walengele bintu byonse byumi?

[Bipikichala pa jipa 22, 23]

Nzubo byo kuji beishimika, nga ñanyi walengele maluba, bichi, ne banyama?

[Kipikichala pa jipa 25]

Wayuka byepi amba mwela ko aji?