Yosefwa Bamushikilwe Ku Bakolojanji

AKIMONA uno mwanyike byo auba bulanda kabiji kafwako ne wa kumukwasha ne. Uno mwanyike jizhina janji Yosefwa. Bakolojanji bafumatu na kumupotesha ku bano banabalume babena kupitatu kuya ku Ijipita. Pa kukafika ku Ijipita Yosefwa waikele ke muzha. Mambo ka bakolojanji o baubijile kino kintu kyatama? Ke na mambo a kuba Yosefwa bamubijile kichima.

Shabo aye Yakoba watemenwe bingi Yosefwa. Kabiji wamusonejile ne jilaya jawama bulongo jalepa. Bakolojanji jikumi byo bamwene Yosefwa byo bamutemenwe bingi kwi Yakoba, batendekele kumubila kichima ne kumushikwa. Bino kwajinga kintu kikwabo kyo bamushikijilwe.

Yosefwa walotele biloto bibiji. Mu bino byonse biloto, bakolojanji Yosefwa bamufukamijilenga. Yosefwa byo ebabujile bakolojanji bino biloto, bakijilemo kumupata.

Byonkabyo, juba jimo bakolojanji Yosefwa byo bajishishenga mikooko ya bashabo, Yakoba wamwambijile Yosefwa kuya na kumona byo baikajilenga. Bakolojanji byo bamumwenetu Yosefwa saka eya, bamo batendekele kwamba’mba: ‘Twayai tumwipaye!’ Bino Lubenyi wajingapo mukulumpe, waambile’mba: ‘Ine kumwipaya ne!’ Bino bamukwachile Yosefwa ne kumutaya mu mushima mwabujile mema. Panyuma ya kuba bino, babwelele baikala na kulanguluka bya kumuba.

Pa kyonka kino kimye banabalume bena Ishimela bapichilenga. Yuda wibambijile balongo banji amba: ‘Twayai tumupoteshe ku bena Ishimela.’ Kabiji byo byo baubile. Bamupoteshe Yosefwa na mutengo wa mashekele a siliva 20. Bano bantu byo babujilepo lusa!

Pano nga bashabo bakebabujile’mba ka? Baipayile mbuzhi ne kutumpika jilaya jawama ja kwa Yosefwa bimye byavula mu mashi a mbuzhi. Kepo bayile ku muzhi kwi shabo Yakoba ne kwamba’mba: ‘Twataine jino, monai kana jo jilaya ja kwa Yosefwa nyi, kana jingi.’

Yakoba wamwene’mba jo ijo. Wajijile amba: ‘Nyama mukaji wamuja Yosefwa.’ Bino byo byo bakebelenga bakolojanji Yosefwa amba bashabo balanguluke. Yakoba waumvwine bingi bulanda. Wajijile pa moba avula bingi. Bino Yosefwa kechi wafwile ne. Pano twaya twisambe pa kyamumwekejile ko bamutwajile.