Funjishainga Baana Benu Nanchi Uba Kichima Kimye Kyonse Nyi? Bakolojanji Yosefwa byo byo Bajinga

TWAYA twisambe pa byo kilumbulula kwikala na kichima. Nanchi kyakikukatazhapo kala kutemwa muntu na mambo a kuba bantu bamwambapo’mba wawama muchima, walamba kabiji uvwala bingi bulongo nyi?a— Kino kyo kyakonsha kumweka umvwe waubila muntu kichima.

Mu kisemi, mwakonsha kwikala kichima umvwe kya kuba bansemi batemwako mwana umo kukila baana bakwabo. Baibolo waambapo pa kisemi kimo kichima mo kyaletele lukatazho lukatampe. Akitwaya twisambe pa lukatazho kichima o kyaletele kabiji ne lufunjisho lo twakonsha kufunjilako ku kyamwekele.

Yosefwa wajinga wa bujikumi na umo pa baana ba kwa Yakoba, kabiji bakolojanji ba mu jivumo jingi bamubijile bingi kichima. Nanchi wayuka kyalengejile nyi?— Mambo a kuba shabo Yakoba watemenweko Yosefwa. Kya kumwenako, Yakoba wamusonejile Yosefwa jilaya jawama bingi. Yakoba kikatakata wamutemenwe bingi Yosefwa kukila baana bonse, “mambo wamusemene mu bukote bwanji” kabiji ye wajinga mubeji ku mukazhanji ye atemenwe bingi aye Lechela.

Baibolo waamba’mba, ‘bakolojanji byo bamwene’mba bashabo bamutemwisha Yosefwa, bamushikilwe.’ Juba jimo, Yosefwa wabujile ba mu kisemi amba mu kiloto kyanji, bonse bamulambijilenga panshi kubikakotu ne bashanji pamo. Baibolo witubula’mba, “bakolojanji bamubijile kichima,” kabiji bashanji nabo bamukainye pa kwibabula kino kiloto kyo alotele.—Ntendekelo 37:1-11.

Palutwe kacheche, kimye Yosefwa kyo ajinga na myaka 17, bakolojanji bayile kwalepa na kujisha mikooko ne bambuzhi ba kisemi. Byonkabyo, Yakoba wamutumine Yosefwa kuya na kumona bakolojanji. Nanchi wayuka bavula kyo bakebelenga kumuba Yosefwa pa kumumona saka eya nyi?— Bakebele kumwipaya! Bakolojanji babiji abo ba Lubenyi ne Yuda kechi baswile kino ne.

Bapoteshi bamo byo bapichilenga kuya ku Ijipita, Yuda waambile’mba: “Tumupoteshe.” Byo byo baubile. Kepo baipayile mbuzhi ne kutumpa mu mashi jilaya jalepesha ja kwa Yosefwa. Palutwe kacheche, byo bamumwesheshe shabo jilaya, wajijile bingi amba: ‘Nyama mukaji wafwainwa wamuja Yosefwa!’—Ntendekelo 37:12-36.

Mu kuya kwa kimye, Yosefwa waishile kutalwa bulongo kwi Felo, mfumu wa bena Ijipita. Na mambo a bukwasho bwa Lesa, aye walumbulwile mwatajile biloto bibiji byo alotele Felo. Kitanshi kyajinga kya bañombe batanu na babiji balamba ne kununa kepo ne batanu na babiji banyana. Kya bubiji kyajinga kya lunenge wa kajo wa mitwe itanu na ibiji yatunga ne kuwama kabiji ne lunenge wajinga na mitwe itanu na ibiji yapumba. Yosefwa waambile kuba’mba bino byonse biloto bibiji byalumbulwilenga kuba’mba kukekala myaka itanu na ibiji ya kajo, apa bino pakalondele ne myaka itanu na ibiji ya kipowe kya nzala. Felo wakambizhe kuba’mba Yosefwa pano usakwikala mukulumpe pa myaka yonse wa kunengezha kajo ka kukajanga kimye kyo kukekala kipowe kya nzala.

Kipowe kya nzala byo kyatendekele, kisemi kya kwa Yosefwa kyajinga ku mpunzha kwalepa, kyakebelenga kajo. Yakoba watumine bakolojanji Yosefwa jikumi kuya ku Ijipita na kusenda kajo. Baishile kwi Yosefwa, bino kechi bamuyukile ne. Kwa kubula kwisolola aye mwine, Yosefwa wibesekele bakolojanji, kabiji wamwene’mba kine baumvwine bingi kutama pa kintu kyatama kyo bamubile. Kepo Yosefwa esolwele. Byo basangalelepo pa kwimona jibiji!—Ntendekelo, kitango 40 kufika ku kitango 45.

Wakonsha kufunjilako ka pa mambo a kichima ku jino jishimikila ja mu Baibolo?— Kichima kyakonsha kuleta lukatazho lukatampe bingi, ne kulengelatu muntu kukeba kuba kyatama ku mulongo wanji! Twaya tutange Byubilo 5:17, 18 ne Byubilo 7:54-59 ne kumona kichima byo kyalengejile bantu kuba kyatama ku baana ba bwanga ba kwa Yesu.— Panyuma ya kutanga bino, nanchi wamona ene mambo o twafwainwa kujimukila pa mambo a kwikala na kichima nyi?

Yosefwa waikele myaka 110. Wasemene baana, baana nabo bamuletejile bankana kabiji wajinga ne na bankanununa. Twaketekela’mba Yosefwa wafwainwa wibafunjishanga kwitemwa bene na bene ne kuchinuzhuka kuba kichima.—Ntendekelo 50:22, 23, 26.

[Tubyambo twa mushi]

Mepuzho:

○ Kilumbulula ka kwikala na kichima?

○ Kichima kyalengejile bakolojanji Yosefwa kuba ka?

○ Mambo ka Yosefwa o alekejileko bakolojanji mambo?

○ Tufunjilako ka ku jino jishimikila?