Kupokololwa mu Ijipita Kufika ne mu Kimye kya Mfumu Mutanshi wa Bena Isalela

Mosesa watangijile bena Isalela kufuma mu buzha mu Ijipita ne kuya ku Mutumba wa Sinai, Lesa ko ebapelejile mizhilo yanji. Palutwe kacheche, Mosesa watumine banabalume 12 na kwendela kyalo kya Kenana. Bino bantu jikumi babwelele na sawakya watama. Balengejile bantu kukeba kubwela ku Ijipita. Na mambo a kubula lwitabilo, Lesa wakambwile bena Isalela kupichila mu kwibalengela kutendeka kusubakana mu kiselebwa pa myaka 40.

Kyapeleleko, Yoshua wasajilwe kutangijila bena Isalela kuya mu kyalo kya Kenana. Pa kuba’mba Yehoba ebakwashe kutambula kyokya kyalo, waubile bya kukumya. Walengejile mema a mu Mukola wa Yodano kwijinga, bibumbu bya muzhi wa Yeliko konaunwa, ne juba kwimana pamo juba jonse. Pa kupitapo myaka itanu na umo, baangachile ntanda ku bena Kenana.

Kutendekela pe Yoshua, bena Isalela bebalaminenga ku bamitonyi pa myaka 356. Bamitonyi bavula twibayuka, kubikakotu ne Balaka, Gidiona, Yefita, Samisonyi ne Samwela. Kabiji tutanga ne pa banabakazhi nabiji Lehaba, Debola, Yaela, Luta, Naomi, ne Delila. Kipungu kya BUSATU kyonse kyaamba pa bintu byaubiwe kala pa myaka 396.