Mbongolo Waambile

NANCHI wakyumvwapo kala mbongolo ke ambe nyi? Kampe wakonsha kwamba’mba ine. ‘Banyama kechi bamba ne.’ Bino Baibolo waamba kuba’mba kwajingapo mbongolo waambile. Twaya tumone kino byo kyajinga.

Bena Isalela benengezhezhe kuba’mba batwele mu ntanda ya Kenana. Balaka, mfumu wa bena Moabu wibachiine bena Isalela. Onkao mambo watumine muntu wa jizhina ja Balamu kuba’mba aye na kufinga bena Isalela. Balaka walayile kupana mali avula bingi kwi Balamu. Onkao mambo, Balamu wakanjijile pa mbongolo wanji ne kuya na kumonañana ne Balaka.

Yehoba kechi wakebele’mba Balamu afinge bantu banji ne. Onkao mambo, watumine malaika wajinga na mpoko yalepa ne kwimana waimene mu mukwakwa kuba’mba amukanye Balamu. Balamu kechi wamumwene malaika ne, bino mbongolo wanji aye wamumwene malaika. Kepo mbongolo aesekele na ngovu kumunyema malaika, bino kyapeleleko wafukamine panshi mu mukwakwa. Balamu wazhingijile bingi, ne kupuma mbongolo na kamama kanji.

Kepo Yehoba alengejile Balamu kumvwa byaambile mbongolo wanji. Mbongolo waipwizhe amba: “Kyo nemuba kyo kika byo mwampuma?”

Balamu wakumbwile’mba: ‘Mambo waji kunkosamikanga. Umvwe naji na mpoko mu kuboko kwami umvwe pano nakwipaya obewa!’

Mbongolo wamwipwizhe’mba: ‘Nanchi kimye kyonse kyo kisela kyami kuba byonkabi nyi?’

Balamu wakumbwile’mba: “Ine.”

Ponkapo Yehoba walabishishe meso a kwa Balamu, ne kumona wamwene malaika wa Yehoba waimene mu jishinda na mpoko. Malaika waambile’mba: ‘Wamupumina ka mbongolo wobe? Tala, nakulupukila mu kukwimena, mambo kechi uye na kufinga bena Isalela ne. Umvwe mbongolo wobe kechi waji kusenduka ko najinga ne, kine kabiji umvwe pano naji kukwipaya obewa ne kumuleka na bumi mbongolo obe.’

Ponkapo Balamu waambile’mba: “Nalenga mambo, mambo kechi najikuyuka namba anweba mwañimena mu jishinda ne.” Kepo malaika amulekeleko Balamu kuba’mba aye, kabiji Balamu wayile na kukamonañana ne Balaka. Napotu wakebele kufinga bena Isalela, bino Yehoba wamulengejile kuba’mba apeshe bena Isalela jisatu.