Kwabuka Mukola Wa Yodano

MONA bena Isalela babena kwabuka Mukola wa Yodano. Pano nga mema aji pi? Na mambo a kuba mvula wanokanga bingi pa kyokya kimye, mukola wayujile bingi kimyetu kicheche kyafumineko. Bino mema onse aumine. Kabiji bena Isalela baabukile mukola saka auma byonkatu byo baabukile pa Kalunga Kachila! Nga mema onse ayile pi? Twaya tumone.

Kimye byo kyafikile kuba’mba bena Isalela babuke Mukola wa Yodano, Yehoba waambijile Yoshua kubula bantu amba: ‘Bañanga bashikule jikwachi ja lulayañano ne kutangilako kulutwe yetu. Byo bakabika maulu abo mu mema a Mukola wa Yodano, aa mema akejinga.’

Ponkapo bañanga batembekele jikwachi ja lulayañano saka batangilapo kala kulutwe ya bantu. Byo bafikile ku Yodano, bañanga banyanchile mu mema. Pa mema pajinga bingi mukuku ne kuzhika. Bino aku banyantatu mu mema, mema afikenejiletu kwijinga! Kyajinga kya kukumya! Mema ajinga kunundu Yehoba wiemikile. Ne mukola wafikenejiletu kuma!

Aba bañanga batembekele jikwachi ja lulayañano baimenetu pa mushiji wauma mukachi ka mukola. Abya wibamona pa kikye kipikichala nyi? Byo baimene, bena Isalela bonse baabukile Mukola wa Yodano saka auma!

Bonse byo baabukile, Yehoba waambijile Yoshua kwambila banabalume 12 bakosa amba: ‘Katolai mabwe 12 mukachi ka mukola, ponkapo panyanta maulu a bañanga batembeka jikwachi ja lulayañano. Mwiasende ne kukeatula ponka po musakulaala lelo. Byo bakemwipuzha baana benu mu myaka ikeya mwayila ano mabwe, mukebabule’mba, mema a mu mukola achibikile ne kupita ke ne. Jikwachi ja lulayañano lwa Yehoba byo byo jaabukile Yodano. Ano mabwe akemuvululangamo kino kya kukumya!’ Yoshua waimikile ne mabwe 12 monka mukachi ka mukola mwaimene bañanga.

Kepo Yoshua abujile bañanga batembekele jikwachi ja lulayañano amba: “Tuntukaimo mu Yodano.” Kabiji byo bapwishishetu kutuntukamo, mukola watendekele kupita jibiji.