Jishimikila
Yona ne Jisabi Jikatampe
AKIMONA iwe muntu uji mu mema. Awe muntu uji bingi mu lukatazho, ke ibyo nenyi? Aje jisabi jibena kukeba kumumina! Nanchi wamuyuka uno muntu nyi? Jizhina janji ke Yona. Twaya tumone byo aishile kwikala mu lukatazho.
Yona wajinga ngauzhi wa Yehoba. Papichiletu kimye kicheche panyuma ya lufu lwa ngauzhi Elisha kimye Yehoba kyo aambijile Yona amba: ‘Imana uyenga ku muzhi mukatampe wa Ninevwa. Bubi bwa bantu bajimo bwakilamo kabiji nkeba ukebambile bya kwibazhachisha.’
Bino Yona kechi wakebelenga kuyako ne. Wakanjijile mu bwato bwayilenga kungi mu kifulo kya kuya ku Ninevwa. Yehoba kechi wasekejilemo Yona byo anyemejile kungi ne. Yehoba watumine kipupu kikatampe. Kyakijishemo kubaya kya kuba’mba kyalengejile ne bwato ke bukebe kuloba. Bavuwilenga bwato baubile bingi moyo ne kutendeka kujijila balesa babo kwibakwasha.
Ponkapo Yona wibambijile’mba: ‘Amiwa mpopwela Yehoba, Lesa walengele jiulu ne ntanda. Kabiji nabombokele ne kukankalwa kuba kyo añambijile Yehoba.’ Onkao mambo, bavuwilenga bwato bamwipwizhe’mba: ‘Nanchi tukube byepi pa kuba’mba kipupu kipwe?’
Yona waambile’mba: ‘Ntayai mu kalunga ka mema kabiji kasa kuzhindama.’ Bavuwilenga bwato kechi bakebelenga kuba kino ne, bino manyaki pa kalunga byo akijilemo kubaya, kyapeleleko Yona bamutayile mu kalunga. Ponkapotu, kipupu kikatampe kyapwile kabiji ne kalunga kazhindaminepo.
Yona byo aibijile pa mema, jisabi jikatampe jamumiine. Pano bino, kechi wafwile ne. Pa moba asatu, mute ne bufuku, wajingatu munda ya joja jisabi. Yona wamwene’mba kintu kyo aubile kya kubula kukokela Yehoba ne kuya ku Ninevwa, kyatamine bingi. Nanchi wayuka byo aubile nyi?
Yona walombele kwi Yehoba amba amukwashe. Ne aye Yehoba walengejile jisabi kumulashila Yona ku kitulu. Panyuma ya kino, Yona wayile ku Ninevwa. Nanchi kino kechi kitufunjisha’mba kyanema bingi kuba bintu Yehoba byo etwambila kuba nenyi?
Buku wa mu Baibolo wa Yona 1-4.