Yesu byo Afunjishishe pa Mutumba

AKIMONA Yesu byo aikala papo. Wafunjishenga bano bantu bonse pa mutumba mu Ngalilea. Abe baikala nanji kipi kipi bajinga baana banji ba bwanga. Wasajile bantu 12 kwikala ke batumwa. Batumwa bajinga baana ba bwanga beikajila ba kwa Yesu. Nanchi wayuka mazhina abo nyi?

Kwajinga Shimona Petelo ne mulongo wanji aye Andeleo. Kabiji kwajinga Yakoba ne Yoano, nabo bajinga bankasa ne kolo. Mutumwa mukwabo wajinga Yakoba kabiji mukwabo naye wajinga Shimona. Batumwa babiji batelwanga na jizhina jimo ja kuba’mba Yudasa. Umo wajinga Yudasa Isakaliota kabiji mukwabo watelwanga’mba Tadeusa. Kabiji kwajinga Filipa ne Natanela (watelwanga’mba Batolomo), Mateo ne Tomase.

Byo bafumine ku Samaliya, Yesu watendekele kusapwila kimye kitanshi amba: ‘Bufumu bwa mwiulu buji pepi.’ Nanchi wayuka bobo bufumu nyi? Ke kafulumende wa kine wa kwa Lesa. Yesu ye mfumu wa uno kafulumende. Ukalaminanga mwiulu ne kuleta mutende panopantanda. Bufumu bwa Lesa bukalula panopantanda ponse ke paladisa wawama.

Pano Yesu wafunjishenga bantu pa mambo a bufumu. Walondolwele’mba: ‘Mwafwainwa kulomba bino kuba’mba, Tata wetu wa mwiulu, jizhina jenu jizhile. Bufumu bwenu bufike. Kyaswa muchima wenu kyubiwe pano panshi byonka byo kyubiwa mwiulu.’ Bantu bavula batela kino amba: ‘Lulombelo lwa Nkambo.’ Bakwabo batela’mba, ‘Tata Wetu.’ Nanchi wakonsha kulomba lulombelo lonse nyi?

Kabiji Yesu wafunjishenga bantu byo bafwainwa kwiubila bintu bene na bene. Waambile’mba: ‘Ubilainga bakwenu bintu byo mukeba’mba bemubile.’ Nanchi inge bakwenu bemubila lusa, kechi mumvwa bulongo nenyi? Onkao mambo, Yesu waambilenga’mba, twafwainwa kubilanga bantu lusa. Nanchi bantu bonse byo bakeubilanga lusa mu paladisa panopantanda kechi mukawama nenyi?