Kitango 13
Aba Baikele Ke Baana Ba Bwanga Ba Kwa Yesu
ÑANYI kalume wa Lesa wayukanyikwa bingi?— Ee ibyo, Yesu Kilishitu. Nanchi ne atweba twakonsha kwikala nobe aye nyi?— Baibolo waamba’mba witushijile kya kumwenako kyo twakonsha kulonda. Kabiji ukeba’mba twikale baana banji ba bwanga.
Nanchi wayuka byo kilumbulula kwikala mwana wa bwanga wa kwa Yesu nyi?— Kilumbulula bintu byavula bingi. Kitanshi, twafwainwa kufunda kwi aye. Bino kino kechi kyo kyonkatu ne. Kabiji twafwainwa kwibitabila bintu byoamba. Umvwe twauba bino, ne bintu byonse byo aketwambilanga tukobanga.
Bantu bavula bamba’mba baitabila mwi Yesu. Nanchi bantu bonse baana banji ba bwanga nyi?— Ine, kechi bonsetu ne. Bavula baya ne ku machechi. Pano bino kechi baji na kimye kya kufunda bintu bifunjisha Yesu ne. Kwambatu kine, baana ba bwanga ba kwa Yesu ke boba balonda kya kumwenako kyanji.
Leka pano twisambe pa bajinga baana ba bwanga ba kwa Yesu kimye kyo ajinga panopantanda. Filipa wajinga umo wa mu baana ba bwanga batanshi. Filipa naye wayile na kwita mulunda nanji aye Natanela (utelwa kabiji amba Batolomo), awe ye ubena kumona waikala munshi ya kichi pa kipikichala. Natanela byo aishile kwi Yesu, Yesu waambile’mba: ‘Talai, uno mwanamulume wa kishinka, mwina Isalela wa kine.’ Natanela wakuminye bingi kabiji waipwizhe’mba: ‘Mwangyuka byepi?’
Yesu waambile’mba: “Filipa byo aji ukyangye kwimwita, saka nemumona munshi ya mukuyu.” Natanela wakuminye bingi mambo Yesu wayukile ko ajinga, kabiji waambile’mba: “Anweba mwi Mwana Lesa; anweba mwi Mfumu wa bena Isalela.”—Yoano 1:49.
Ba Filipa ne Natanela saka bakyangye kwikala baana ba bwanga ba kwa Yesu, kwajinga bakwabo baikele kala baana ba bwanga. Bano bajinga ba Andeleo ne Petelo ye wajinga mukulumpe kabiji ne aye Yoano ne Yakoba kolojanji. (Yoano 1:35-51) Palutwe kacheche, bano bonse babwelelemo ku mwingilo wabo wa kukwata masabi. Juba jimo Yesu byo asezhezhenga kizhiba kya Ngalilea, wamwene ba Petelo ne Andeleo saka bata bukonde mu kizhiba. Yesu wibambijile’mba: “Ndondelai.”
Byo baendeleko pacheche, Yesu wamwene ba Yakoba ne Yoano. Bajinga mu bwato pamo ne shabo, na kununga makonde abo. Yesu wibechile’mba bamulondelenga. Umvwe yobe baichile kwi Yesu, inge waubilepo byepi? Nanchi umvwe wamulondejile ponkapotu nyi?— Bano banabalume bamuyukile Yesu. Bayukile’mba Lesa ye wamutumine. Ponkapotu bashile mwingilo wabo wa kukwata masabi ke bamulondele ne kumulondela.—Mateo 4:18-22.
Bano banabalume byo baikele baana ba bwanga ba kwa Yesu, nanchi kimye kyonsetu baubilenga byawama nyi?— Ine. Kampe ubena kukivulukamo bano banabalume byo bepachikilenga amba ñanyi mukulumpe pe abo. Pano bino, bamumvwijile Yesu, kabiji bakebeshe bingi kupimpula byubilo byabo. Umvwe netuwa twapimpula byubilo byetu, twakonsha kwikala baana ba bwanga ba kwa Yesu.
Yesu wakebelengatu bantu bonse kwikala baana banji ba bwanga. Juba jimo, ndamakyalo munonshi waishile kwi Yesu ne kumwipuzha byo akonsheshe kuba pa kuba’mba atambule bumi bwa myaka. Uno Ndamakyalo munonshi byo aambile’mba walaminenga mizhilo ya Lesa ne ku bwanyike bwanji, Yesu wamwichile’mba: “Mwiye mundondele.” Nanchi wayuka kyamwekele nyi?—
Uno mwanamulume byo bamubujile amba kyanema kwikala mwana wa bwanga wa kwa Yesu kukila kwikala na bunonshi, waumvwine ne ku muchima bwii. Kechi waikele mwana wa bwanga wa kwa Yesu ne, mambo watemenwe bingi mali kukila byo atemenwe Lesa.—Luka 18:18-25.
Panyuma ya kusapwila mwaka umo ne kichika, Yesu wasajile baana banji ba bwanga 12 kwikala ke batumwa. Watumine bano batumwa kuya na kwingila mwingilo wanema bingi. Nanchi wayuka mazhina abo nyi?— Twaya tumone umvwe twakonsha kwiayuka. Mona pa kikye kipikichala, kabiji utongaule ne mazhina abo. Pano eseka kutongola mazhina abo kwakubula kutalapo ne.
Mu kuya kwa moba mutumwa umo pa boba 12 waikele ke watama. Jizhina janji Yudasa Isakaliota. Palutwe kacheche, mwana wa bwanga mukwabo wasajilwe kwikala ke mutumwa. Nanchi wayuka jizhina janji nyi?— Ee, Matiasa. Kabiji ba Paulo ne Banabasa nabo baikele ke batumwa, bino kechi bajinga ba mu batumwa 12 ne.—Byubilo 1:23-26; 14:14.
Mu Kitango 1 kya uno buku, twafunjile kuba’mba Yesu watemenwe bingi baana ba bacheche. Mambo ka o ebatemenwe?— Mambo wayukile’mba nabo bakonsha kwikala baana banji ba bwanga. Baana bacheche bakonsha kwamba bintu byakonsha kulengela bakulumpe kumvwa ne kukeba kufunjilapo byavula pe Mufunjishi Wayukisha.
Banabakazhi bavula nabo baalukile ke baana ba bwanga ba kwa Yesu. Bamo bayanga nanji mu mizhi ikwabo na kusapwila. Bano bajinga ba Maliya Mangadala, Yoana, ne Susana. Bafwainwa bamunengezhezhangako ne kajo kabiji ne kumuchapilako bya kuvwala.—Luka 8:1-3.
Nanchi ne obewa ukeba kwikala mwana wa bwanga wa kwa Yesu nyi?— Vuluka’mba, kwambatu pa kanwa amba twi baana banji ba bwanga kechi kyo kitulengela kwikala mwana wa bwanga ne. Konse kotuji twafwainwa kumweshanga’mba twi mwana wa bwanga, kechi kimyetu kyo tuji ku kupwila kwa bwina Kilishitu ne. Ku mapunzha ka ko twafwainwa kumweshanga’mba twi baana ba bwanga ba kwa Yesu?—
Ee, twafwainwa kumweshanga kino pa nzubo. Kabiji mpunzha ikwabo ke ku sukulu. Pa kuba’mba twikale mwana wa bwanga wa kine wa kwa Yesu, kimye kyonse twafwainwa kubanga byonka byo aubilenga.
Pano tanga byaamba Baibolo pa baana ba bwanga ba kwa Yesu pa Mateo 28:19, 20; Luka 6:13-16; Yoano 8:31, 32; ne 1 Petelo 2:21.
[Kipikichala pa jipa 72]
Ñanyi we, kabiji waikele byepi mwana wa bwanga wa kwa Yesu?
[Kipikichala pa jipa 73]
Yesu ubena kwita bañanyi amba bekale baana banji ba bwanga?
[Bipikichala pa jipa 75]
Petelo
Andeleo
Yakoba (mulongo wa kwa Yoano)
Yoano
Filipa
Natanela
Mateo
Tomase
Yakoba (mwana Alefesa)
Shimona
Yudasa (nangwa’mba Tadeusa)
Yudasa Isakaliota
[Bipikichala pa jipa 76]
Bano banabakazhi bajinga bañanyi bakwashanga Yesu kimye kyo ayanga na kusapwila?
[Kipikichala pa jipa 76]
Kwepi ko twafwainwa kumwesha’mba kine twi baana ba bwanga ba kwa Yesu?