Yesu Watongwele Baana Banji Ba Bwanga

Panyuma ya kwikala moba 40 mungye, kabiji saka akyangye kubwela ku Ngalilea, Yesu wabwelele kwi Yoano yenka wamubatizhe. Yesu byo anangijilenga pepi, Yoano watanyikile kuboko kwi aye ne kubuula bo ajinga nabo amba: “Talai, Mwana Mukooko wa Lesa ufumyapo bundengamambo bwa ba pano pa ntanda! Uno ye yewa ye naambilepo namba: ‘Awa ubena kundondela watangilako kala kulutwe yami, mambo aye wajinga mutanshi amiwa saka nkyangye kwikalako.’” (Yoano 1:29, 30) Nangwa kya kuba Yoano wajinga mukulumpe pe Yesu, wayukile’mba aye saka akyangye kwikalako, Yesu wajingako kala saka aji kilengwa kya mupashi mwiulu.

Kabiji kimye Yesu kyo aishile na kubatizhiwa, kyamweka Yoano kechi wakiyukile bulongo amba Yesu ye ukekala Mesiasa ne. Yoano waambile’mba: “Ne amiwa kechi namuyukile ne, bino ene mambo o naishijile na kubatizha mu mema ajinga a kuba amba, aye asoloke ku bena Isalela.”—Yoano 1:31.

Yoano watwajijile kulumbulwila bantu bamutelekelenga kintu kyamwekele kimye kyo abatizhe Yesu amba: “Namwene mupashi saka ekila nobe nkunda kufuma mwiulu, kabiji waikele pe aye. Ne amiwa kechi namuyukile ne, bino Awa yenka wantumine na kubatizha mu mema, wañambijile’mba: ‘Yenka ye ukamona saka bamwikijila ku mupashi ne kwikala pe aye, uno ye ukabatizhanga na mupashi wazhila.’ Ne amiwa namumwene, kabiji nashimwine ne kushimuna namba uno ye Mwana Lesa.”—Yoano 1:32-34.

Juba jalondejilepo, Yoano wajinga na baana banji ba bwanga babiji kimye kyo amwene Yesu saka apita. Yoano waambile’mba: “Talai, Mwana Mukooko wa Lesa!” (Yoano 1:36) Yoano byo aambile bino, bano baana banji ba bwanga babiji bamulondejile Yesu. Umo wajinga Andeleo. Kyamweka mukwabo ke yenka wanembele bino bintu, kabiji naye watelwanga’mba Yoano. Uno Yoano ne Yesu bafwainwa bajinga bankasa ne kolo, mambo wajinga mwana Salome. Salome ne Maliya kyamweka bajinga bankasa ne kolo, kabiji mwatawanji Salome wajinga Zebede.

Byo aalulukile ne kumona ba Andeleo ne Yoano saka bamulondela, Yesu wibashikishe’mba: “Nanchi mubena kukeba ka?”

Ne abo bamushikishe’mba: “Labi, mwikala kwepi?”

Yesu wibakumbwile’mba: “Twayai mukamone ko ngikala.”—Yoano 1:37-39.

Kyajinga nobe ku ma 4 koloko a mabanga, ba Andeleo ne Yoano baikele ne Yesu pa joja juba jonse. Andeleo wasekejile bingi ne kuya lubilo na kukeba mulongo wanji aye Shimona watelwanga’mba Petelo ne kumubula’mba: “Twatana Mesiasa.” (Yoano 1:41) Andeleo wamutwajile Petelo kwi Yesu. Bintu byamwekele palutwe kacheche bimwesha’mba Yoano naye wataine Yakoba kolojanji ne kumuleta kwi Yesu. Pano bino, Yoano kechi wanembele bino byo aubile ne.

Juba jalondejilepo, Yesu wataine Filipa wafumine ku Beteseda. Wamutaine ku musezho wa Kalunga ka Ngalilea, monka mu muzhi mwafumine ba Andeleo ne Petelo. Yesu wamwambijile Filipa amba: “Ndondelenga.”—Yoano 1:43.

Kepo Filipa ataine Natanela watelwanga’mba Batolomo ne kumubula’mba: “Twataana yewa ye baambilepo kwi Mosesa mu Mizhilo ne mu byanembele Bangauzhi amba: Yesu, mwana wa kwa Yosefwa, wa ku Nazala.” Natanela wazhinaukile, kabiji washikishe Filipa amba: “Nanchi mu Nazala mwakonsha kufuma muntu wawama nyi?”

Filipa wamutundaikile’mba: “Twaya, ukamone.” Yesu byo amumwene Natanela saka eya ko aji, waambile pe aye amba: “Talai, mwina Isalela wa kine wabula bujimbijimbi.”

Natanela wamushikishe’mba: “Mwangyuka byepi?”

Yesu wamukumbwile’mba: “Filipa saka akyangye kukwita, byo wakijinga munshi ya kichi kya mukuyu, naji kukumona.”

Natanela wakuminye ne kwamba’mba: “Labi, anweba mwi Mwana Lesa, mwi Mfumu wa bena Isalela.”

Yesu wamushikishe’mba: “Nanchi wangitabila na mambo a kukubuula’mba naji kukumona munshi ya kichi kya mukuyu nyi? Ukamona bintu byakila pa bino.” Kepo Yesu alayile’mba: “Mukamona jiulu saka jashinkuka ne bamalaika ba Lesa saka bakanjila ne kwikila ku Mwana muntu.”—Yoano 1:45-51.

Panyumatu ya bino, Yesu pamo na baana banji ba bwanga batanshi bafumineko ku Kimpachiko kya Yodano ne kuya ku Ngalilea.