Jishinda jo Afunjishishengamo Yesu

JUBA jimo Yesu wabujile mwanamulume umo amba wafwainwe kutemwa bakwabo. Uno mwanamulume wamwipwizhe Yesu amba: “Nanchi mukwetu ye ñanyi?” Yesu wayukile byalangulukilenga uno mwanamulume. Mwanamulume walangulukilenga’mba bakwabo ke boba bonkatu ba mutundu wanji ne ba mu bupopweshi bwanji. Onkao mambo, twaya tumone byamwambijile Yesu.

Bimye bimo Yesu wafunjishanga bantu kupichila mu kushimikizha jishimikila. Pa kino kimye byo byo aubile. Washimikizhe jishimikila ja Muyudea ne mwina Samaliya. Twafunjile’mba Bayudea bavula kechi batemenwe bena Samaliya ne. Jishimikila ja kwa Yesu jajinga bino:

Juba jimo Muyudea wayilenga ku Yeliko saka akunkuluka mu jishinda japita mu mitumba. Bino batupondo bamukwachile. Bamwangachile mali anji ne kumututaula bingi pepi na kufwa.

Palutwe kacheche, ñanga umo Muyudea wasolomokele. Wamwene uno mwanamulume ye bapumine. Walanguluka’mba waubilepo ka? Olo, wamusezhezhe keaye ne lwendo lwanji. Kabiji mukwabo muntu wajinga wa bupopweshi naye wafikile ponka. Wajinga mwina Levi. Nanchi waimene nyi? Ine, kechi waimene’mba akwashe uno mwanamulume ne. Mona awa ñanga wa Lesa ne mwina Levi pa kipikichala babena kuya mu jishinda.

Pano akimona uno muntu uji na mwanamulume ye batutawile. Wajinga mwina Samaliya. Wakwashishe Muyudea. Wamubikile muchi pa bilonda byanji. Panyuma ya kino, wamutwajile uno Muyudea ku nzubo imo ko bakonsheshe kumulama kuba’mba akose jikwabo.

Byo apwishishe jishimikila janji, Yesu waambijile yewa mwanamulume wamwipwizhe amba: ‘I ñanyi pa bano basatu ye walanguluka’mba ye wimwesheshe kwikala na kifyele ku yewa mwanamulume ye batutawile? Abya wajinga ñanga wa Lesa nyi, nangwa mwina Levi nyi, inyi mwina Samaliya?’

Awa mwanamulume wakumbwile’mba: ‘Mwina Samaliya. Mambo waubijile lusa yewa mwanamulume ye bapumine.’

Yesu waambile’mba: ‘Waamba bulongo. Onkao mambo, yanga, ukobilenga bakwenu byonka byaubile mwina Samaliya.’

Nanchi kechi watemwa jishinda Yesu jo afunjishishengamo nenyi? Twakonsha kufunda bintu byavula bingi byanema umvwe ketulondele bintu byaambile Yesu biji mu Baibolo, ke ibyo nenyi?