Yesu Wabukilenga Bakolelwenga

YESU byo apitañenenga mu mizhi, wabukilenga bakolelwenga. Bino bya kukumya byonse byo aubilenga byayukanyikilwe monse mu mizhi icheche ne ikatampe. Onkao mambo, bantu baletelenga boba balemana, bampofu, bashinka matwi ne bakwabotu bakolelwe. Kabiji Yesu wibabukile bonse.

Papichile myaka kukila isatu kufuma kimye Yesu kyo bamubatizhe kwi Yoano. Kabiji Yesu waambijile batumwa banji amba wafwainwe pano kuya ku Yelusalema, ko akepaiwa kabiji ne kusangulwa mu bafu. Bino, kino kimye saka kikyangye ne, watwajijile na kubuka bakolelwenga.

Juba jimo, Yesu wafunjishishenga pa juba ja Sabado. Sabado jajinga juba ja Bayudea ja kukokoloka. Uno mwanamukazhi ye wamona pa kikye kipikichala, wakolelwe kimye kyabaya bingi. Pa myaka 18 wajinga wivungatu kabiji kechi wainukanga ne. Onkao mambo, Yesu wabikile maboko anji pa mwanamukazhi, kabiji ponkapo watendekele kwinuka. Wabukilwe!

Kino kyalengejile bantangi ba bupopweshi kuzhingila. Umo pe abo wabijikile ku jibumba amba: ‘Kuji moba atanu na jimo o twafwainwa kwingijilamo. Ao o moba a kwishilamo na kubukwa, kechi pa juba ja Sabado ne!’

Bino Yesu wakumbwile’mba: ‘Anweba banabalume batama, bonse mukasulula mbongolo wenu mu kipaka ne kumutwala ku mema mu ja Sabado. Nanchi uno mwanamukazhi muyanji wakolwa pa myaka 18, kechi wafwainwa kubukwa pa juba ja Sabado nenyi?’ Mukumbu wa kwa Yesu walengejile bano banabalume batama kumvwa bumvu.

Palutwe kacheche, Yesu ne batumwa banji bayile ku Yelusalema. Byo bakijingatu pangye ya muzhi wa Yeliko, bampofu babiji balulombo baumvwine’mba Yesu wapichilenga. Onkao mambo, babijikile’mba: ‘Yesu, tukwashai!’

Yesu wibechile bano banabalume bampofu ne kwibepuzha’mba: ‘Ki ka kyo musaka amba nemubile?’ Baambile’mba: ‘Nkambo, tusaka’mba meso etu alabe.’ Yesu wibakwachile pa meso abo kabiji ponkapotu batendekele kulaba! Nanchi wayuka ene mambo Yesu o aubijilenga bino bya kukumya byawama nyi? Ke na mambo a kuba’mba, watemenwe bantu kabiji wakebelenga’mba bekale na lwitabilo mwi aye. Onkao mambo, ne atweba twakonsha kuketekela’mba byo akalamanga ke Mfumu, kafwako muntu nangwa umo panopantanda ukakolwa jibiji ne.