Pa Mutumba Wa Olebeta

AWE pa kikye kipikichala wajinga Yesu pa Mutumba wa Olebeta. Banabalume bana bo ajinga nabo ke batumwa banji. Bajinga ba Andeleo ne mulongo wanji aye Petelo kabiji Yakoba ne mulongo wanji aye Yoano. Aya nzubo yo wamona kwakalepa byobya, yajinga nzubo ya Lesa mu Yelusalema.

Papichile moba abiji kufuma patwelejile Yesu mu Yelusalema saka akanjila pa mwana mbongolo. Pajinga pa Kibiji. Mu joja juba lukelo, Yesu wajinga ku nzubo ya Lesa. Konkakwa, bañanga bakebelenga kukwata Yesu amba bamwipaye. Pano bino, bachiine kuba kino mambo bantu bamutemenwe Yesu.

Yesu wibambijile bantangi ba bupopweshi amba: ‘Anweba miloolo ne baana ba miloolo!’ Kabiji Yesu waambile’mba, Lesa ukebakambula na mambo a bintu byatama byo baubilenga. Panyuma ya bino, Yesu waishile ku Mutumba wa Olebeta kabiji ne bano batumwa bana batendekele kumwipuzha mepuzho. Nanchi wayuka byo bamwipwizhenga Yesu nyi?

Batumwa bamwipwizhenga pa bintu bya kulutwe. Bayukile’mba Yesu ukafumyapo bintu byonse byatama panopantanda. Pano bakebelenga kuyuka kimye kyo akobilamo kino. Nanchi kimye ka Yesu po akeya ne kwikala ke Mfumu jikwabo?

Yesu wayukile’mba baana banji ba bwanga panopantanda kechi bakonsheshe kumumona pa kwiya kwanji jibiji ne. Kiji bino, mambo uji mwiulu kabiji kechi bakonsheshe kumumona momwa ne. Bino Yesu wabujile batumwa banji bintu byakonsheshe kumwekanga panopantanda kimye kyo aikele Mfumu ne kutendeka kulama mwiulu. Nanchi bino bintu bimo byo byepi?

Yesu waambile’mba kukekala makondo akatampe, bantu bavula bakakolwanga ne kufwa nzala, bumbanzhi bukavula kabiji kukekalanga bitentanshi bikatampe. Kabiji Yesu waambile ne kuba’mba mambo awama a bufumu bwa Lesa akasapwilwa panopantanda ponse. Nanchi tubena kwibimona bino bintu saka byubiwa mu ano moba etu nyi? Ee! Onkao mambo, twakonsha kuketekela’mba Yesu ubena kulama mwiulu. Bukumotu akafumyepo bintu byonse byatama panopantanda.